ەكسترەميزمگە تەك مادەنيەتارالىق جانە ءدىنارالىق ديالوگ نەگىزىندە عانا قارسى تۇرۋعا بولادى - ن. نازاربايەۆ
«بۇگىندە شۇعىل مىندەتتەردىڭ ءبىرى - تەرروريزمگە قارسى ءبىرتۇتاس حالىقارالىق مايدان اشۋ»، - دەدى ن. نازاربايەۆ.
«الەمدىك وركەنيەتتەر مەن نەگىزگى دىندەردىڭ بەسىگى بولعان ەجەلگى مەسوپوتاميا جەرى بۇگىندە اياۋسىز ءبۇلىنىپ، توناۋعا ءتۇستى. «يسلام مەملەكەتى» دەگەن اتتى جامىلعاندار تاياۋ شىعىستىڭ بىرەگەي تاريحي-مادەني مۇراسىنا ورنى تولماس زيان كەلتىرۋدە. قازاقستان تەرروريزم مەن ەكسترەميزمنىڭ كەز كەلگەن كورىنىسىن باتىل ايىپتايدى. ءبىز بىرىككەن ۇلتتار ۇيىمىنىڭ قولداۋىمەن حالىقارالىق تەرروريزم مەن ەكسترەميزمگە قارسى ارەكەتتىڭ الەمدىك ءبىرىڭعاي جەلىسىن قۇرۋدى ۇسىنامىز»، - دەدى قازاقستان پرەزيدەنتى.
قازاقستان پرەزيدەنتى يسلام راديكاليزمىمەن كۇرەس كەزىندە ونى بەيبىتسۇيگىش يسلاممەن شاتاستىرىپ الماۋ ماڭىزدى ەكەنى، ال ەكسترەميزمگە تەك مادەنيەتارالىق جانە ءدىنارالىق ديالوگ نەگىزىندە عانا قارسى تۇرۋعا بولاتىنىن اتاپ ءوتتى.
نۇرسۇلتان نازاربايەۆتىڭ ايتۋىنشا، ءبىزدىڭ ەل ۇسىنعان «يسلام تەرروريزمگە قارسى» اتتى فورۋم ناق وسى ماقساتقا باعىتتالعان.
