ەل ءۇمىتىن ارقالاعان ساڭلاقتار. قازاقستان اۋىر اتلەتتەرى الەم بىرىنشىلىگىندە قانشا التىن الا الادى؟
بۇل سايىس - 2016 - جىلعى وليمپيادا ويىندارىنا جولداما ۇلەستىرەتىن ماڭىزدى دودالاردىڭ ءبىرى. سوندىقتان جارىسقا الەمنىڭ تۇكپىر- تۇكپىرىنەن كىلەڭ مىقتىلار كەلەتىنى انىق.
حالىقارالىق اۋىر اتلەتيكا فەدەراتسياسى تاراتقان مالىمەتتەرگە سۇيەنسەك، اتالمىش بىرىنشىلىككە 105 مەملەكەتتەن 745 زىلتەمىرشى قاتىسۋعا نيەت ءبىلدىرىپتى. ونىڭ ىشىندە 16 اۋىر اتلەت (9 ەر، 7 ايەل) قازاقستان ۇلتتىق قۇراماسىنىڭ مۇشەلەرى.
قازاقستان زىلتەمىرشىلەرىن باپتايتىن الەكسەي ني ەرەكشە ماڭىزعا يە دودادا كىمدەرگە ءۇمىت ارتىپ وتىرعانى تۋرالى وسىعان دەيىن دە ايتقان بولاتىنبىز.
ولار مىنالار: ەرلەر اراسىندا 56 كەلى سالماقتا - ارلي چونتەي، 62 كەلىدە - فارحاد حاركي، 77 كەلىدە ەكى بىردەي سپورتشىمىزعا سەنىم ارتىلعان، ونىڭ ءبىرى - نيجات راحيموۆ، ەكىنشىسى - ايدار قازوۆ. 85 كەلىدە دە قوس سپورتشىمىزعا ءۇمىت ارتىپ وتىرمىز. ولار - دەنيس ۋلانوۆ پەن ەرمەك ءومىرتاي. ال 94 كەلى سالماقتا قازاقتىڭ قوس قىرانى جاسۇلان قىدىربايەۆ پەن الماس وتەشوۆ سىنعا تۇسەدى. جاسۇلان اۋىر اتلەتيكادان قازاقتان شىققان تۇڭعىش الەم چەمپيونى بولسا، الماس وسى سپورت تۇرىنەن قازاق بالاسىنان شىققان تۇڭعىش جۇلدەگەرى. ەكەۋى دە قازىر ناعىز بابىندا. ا ق ش- تا قازاقتىڭ تۋىن جەلبىرەتەدى دەگەن سەنىمدەمىز. ال 105 كەلى سالماقتا ەل نامىسىن الەكساندر زايچيكوۆ قورعايتىن بولادى.
ايەلدەر اراسىندا دا وسالدارى جوق. بارلىعى دا وسىعان دەيىنگى باسەكەلەردە جەڭىس تۇعىرىنىڭ بيىك ساتىلارىنان كورىنىپ جۇرگەن ساڭلاقتار. ولار: 53 كەلىدە مارگاريتا ەليسەيەۆا، 63 كەلىدە كارينا گوريچيەۆا سىنعا تۇسسە، 69 كەلى سالماقتا اۋىر اتلەتيكادان قازاق قىزدارى اراسىندا تۇڭعىش الەم چەمپيوناتىنىڭ كۇمىس جۇلدەگەرى اتانعان قاراكوز قارىنداسىمىز جازيرا جاپپارقۇل ەل نامىسىن قورعايدى. بۇل سالماقتا لوندون وليمپياداسىنىڭ چەمپيونى مايا مانەزا دا ءوز كۇشىن سىناپ كورمەك. ال 75 كەلى سالماق دارەجەسىندە تاعى ءبىر وليمپيادا چەميونىمىز سۆەتلانا پودوبەدوۆا كۇش سىناسادى. ال 75 كەلىدەن جوعارى سالماقتا ەكى بىردەي وتانداسىمىز ەل نامىسى ءۇشىن بارىن سالاتىن بولادى. ونىڭ ءبىرى - نادەجدا نوگاي، ەكىنشىسى - الەكساندرا ابورنيەۆا.
ال قازاقستان قۇراماسىندا يليا يلين، زۋلفيا چينچانلو، ۆلاديمير سەدوۆ بۇل جارىسقا قاتىسپايتىن بولدى. الەمنىڭ ءتورت دۇركىن، وليمپيادا ويىندارىنىڭ ەكى دۇركىن چەمپيونى يليا يلين بۇل بىرىنشىلىكتىڭ ورنىنا رەسەي فەدەراتسياسى پرەزيدەنتىنىڭ كۋبوگىنا قاتىسۋدى ءجون ساناپتى. ول جارىس 11-14 - جەلتوقسان كۇندەرى گروزنىيدا وتەدى.
جوعارىداعى الەم بىرىنشىلىگىنە قاتىساتىن جەرلەستەرىمىزدىڭ اتى- جوندەرىنە قاراپ وتىرساق، قازاقتىڭ قارا دومالاق ۇلدارى مەن قاراكوز قىزدارىنىڭ سانى جىلدان جىلعا ارتىپ كەلە جاتقانىن بايقايمىز. بۇل كىمدى دە بولسا قۋانتاتىنى انىق. وسى ورايدا، اۋىر اتلەتيكادان قازاق سپورتشىلارىنىڭ الەۋەتى قالاي دەگەن سۇراققا قىسقا عانا توقتالا كەتكەندى ءجون كورىپ وتىرمىز.
سوڭعى جىلدارى قىز- جىگىتتەر قازاققا ءزىل تەمىر باعىنبايدى دەگەن قاعيدانى تەرىسكە شىعارا باستادى. ەل ءىشى- سىرتىنداعى باسەكەلەردە بىرىنەن كەيىن ءبىرى جەڭىس تۇعىرىنان كورىنىپ، مەرەيىمىزدى تاسىتىپ ءجۇر. تاۋەلسىزدىك العاننان كەيىن قۋانىش رىمقۇلوۆ 1996 - جىلى اتلانتا وليمپياداسىنا قاتىسقانىنا ءماز بولعان ەدىك. ال 2006 -جىلعى قازاق جاستارى اراسىنان تۇڭعىش رەت جەڭىستى جولدى باستاعان قۋانىش راحاتوۆتان كەيىن زىلتەمىر قازاققا جات سپورت ەمەس ەكەنىن بايقادىق. ول وسى جىلى قىتايدىڭ حاڭجۋ قالاسىندا وتكەن جاستار اراسىنداعى الەم بىرىنشىلىگىندە 69 كەلى سالماقتا سىنعا ءتۇسىپ، قولا جۇلدەگەر اتانىپ قايتتى.
2008 - جىلى كانازاۆا جانە 2009 - جىلى تالدىقورعاندا ۇيىمداستىرىلعان ەرەسەكتەردىڭ ازيا چەمپيوناتىندا 85 جانە 94 كەلى سالماقتا ونەر كورسەتكەن الماس وتەشوۆ قاتارىنان ەكى مارتە جەڭىس تۇعىرىنا كوتەرىلدى. 2009 - جىلى تايلاندتىڭ چيانگماي قالاسىنداعى جاسوسپىرىمدەردىڭ الەم بىرىنشىلىگىنىڭ تۇساۋى كەسىلدى. وندا قوس قانداسىمىز قازاقستان قورجىنىنا ەكى مەدال سالدى. ونىڭ ءبىرى 77 كەلى سالماقتاعى ەربول مەيىرمانوۆ بولسا، ەكىنشىسى 94 كەلى سالماقتاعى عالىمبەك تىلەۋوۆ.
2010 - جىلى سينگاپۋردە دۇنيەجۇزىلىك جاسوسپىرىمدەر ويىندارىندا جازيرا جاپپارقۇل (63 كەلى) چەمپيون اتانسا، رۋستەم سىباي (77 كەلى) قولا جۇلدەگەر اتانىپ قايتتى. وسى جىلى قاراشا ايىندا گۋانچجوۋدا وتكەن ازيا ويىندارىندا داۋرەن شاۋەتەيەۆ ۇزدىك ۇشتىكتەن كورىندى.
2011 - جىلى پەرۋدە وتكەن جاسوسپىرىمدەر اراسىنداعى الەمدىك دودادا ادىلبەك بالقايەۆ (77 كەلى) جەڭىس تۇعىرىنىڭ ءۇشىنشى ساتىسىنان كورىندى. ال وسى جىلى مالايزيادا وتكەن جاستار اراسىنداعى الەم چەمپيوناتىندا قازاقتىڭ قاراكوز قىزى اننا نۇرمۇحامبەتوۆا ەل قورجىنىنا كۇمىس جۇلدە سىيلادى. ول 2012 - جىلى لوندون وليمپياداسىنا قاتىسىپ، 5 - ورىنعا دەيىن قول جەتكىزە الدى. ايتا كەتەيىك بۇل وليپياداعا الماس وتەشيەۆ تە قاتىسىپ، 7 - ورىنعا تابان تىرەگەن بولاتىن.
2012 - جىلى گۆاتەمالانىڭ انتيگۋا قالاسىندا جازيرا جاپپارقۇل (69 كەلى) قازاق قىزدارى اراسىنان العاشقى بولىپ جاستار اراسىندا الەم چەمپيونى اتاندى. وسى بىرىنشىلىكتە تاعى ءبىر قازاق ۇلانى جاسۇلان قىدىربايەۆ (94 كەلى) قولا جۇلدەگە قول جەتكىزدى. سونداي- اق وسى جىلى گۇلناز ناۋرىزوۆا (75 كەلى) ازيا چەمپيوناتىندا قولا مەدال جەڭىپ الدى. بۇل ەرەسەكتەر دۋىندا قازاق قىزدارىنىڭ العان العاشقى جۇلدەسى بولىپ، تاريح بەتىنە التىن ارىپپەن جازىلعان بولاتىن. وسى باسەكەدە ەرلەر اراسىندا نۇرسۇلتان راحاتوۆ (77 كەلى) كۇمىس جۇلدەنى قانجىعاسىنا بايلادى. ال سلوۆاكيانىڭ كوشيتسە قالاسىندا جاسوسپىرىمدەر اراسىندا وتكەن الەم بىرىنشىلىگىندە عالىمجان جۇباتقانوۆ (77 كەلى) قولا جۇلدەگەر اتاندى.
2013 - جىلى پولشانىڭ ۆروتسلاۆ قالاسىندا ەرەسەكتەر اراسىندا الەم بىرىنشىلىگى ءوتتى. وسى دودادا الاشتىڭ ۇلى سىر بويىنىڭ ساڭلاعى الماس وتەشيەۆ اۋىر اتلەتيكادان قازاقتان شىققان تۇڭعىش جۇلدەگەر اتاندى. ول 94 كەلى سالماقتا سىنعا ءتۇسىپ، كۇمىس مەدالدى ولجالاپ قايتتى. ال سول جىلى استانادا وتكەن ازيا بىرىنشىلىگىندە اننا نۇرمۇحامبەتوۆا (75 كەلى) ازيا چەمپيونى اتاندى. پەرۋدە جازيرا جاپپارقۇل (69 كەلى) جاستار اراسىنداعى الەم بىرىنشىلىگىندە كۇمىس جۇلدەنى جەڭىپ الدى.
2014 - جىل. بۇل جىلدى قازاق جانكۇيەرلەرى استە ەسىنەن شىعارمايتىنى انىق. تامىز ايىندا نانكيندە وتكەن جاسوسپىرىمدەردىڭ دۇنيەجۇزىلىك وليمپياداسىندا جاسۇلان قالييەۆ (77 كەلى) قولا مەدال يەگەرى اتانىپ قايتسا، قىركۇيەك ايىندا ينچحوندا وتكەن ازيا ويىندارىندا الماس وتەشيەۆ كۇمىس جۇلدەنى قانجىعاسىنا بايلادى.
ال وسى جىلى الماتىدا وتكەن الەم چەمپيوناتىندا قوس بىردەي تاريحي وقيعا ورىن الدى. 14 - قاراشا كۇنى قوس بىردەي قانداسىمىز جەڭىس تۇعىرىنا كوتەرىلدى. العاشىندا 19 جاسار جازيرا جاپپارقۇل (69 كەلى) كۇمىس مەدالدى يەلەنسە، كوپ كەشىكپەي 22 جاستاعى جاسۇلان قىدىربايەۆ (94 كەلى) الەم چەمپيونى اتاندى. مىنە، بۇل قازاق قىز- جىگىتتەرىنىڭ الەم بىرىنشىلىگىندەگى بۇرىن سوڭدى بولماعان جەتىستىكتەرى ەدى. اۋىر اتلەتيكادان قازاق ورەندەرىنىڭ جەتىستىكتەرى وسىلاي وركەندەپ كەلەدى. بۇل جولى دا جازيراعا، الماسقا، جاسۇلانعا بيىكتەردەن كورىنۋىنە تىلەكتەسپىز.
ال بيىل تايلاندتا وتكەن ازيا چەمپيوناتىندا ءۇش بىردەي قانداسىمىز التىن تۇعىرعا كوتەرىلدى. ولار: ايدار قازوۆ (77 كەلى) ، ەرمەك ءومىرتاي (85 كەلى) جانە رۇستەم سىباي (94 كەلى). ال اسەم سادىقوۆا (58 كەلى)، فاينا سىبانبايەۆا (63 كەلى) جانە مايرا فايزوللايەۆا (63 كەلى) قولا جۇلدەگەر اتانىپ قايتتى. مىنە، جوعارىداعى قازاق قىز- جىگىتتەرىنىڭ جەتىستىكتەرىنە كوز جۇگىرتەر بولساڭىز جىلدان جىلعا زىلتەمىردى سەرىك ەتكەن قازاق جاستارىنىڭ تابىسىندا قارقىندى ورلەۋ بار ەكەنىن اڭعارۋ قىيىن ەمەس.
كۇنسۇلتان وتارباي
