فرانسۋز بيزنەسىنىڭ وكىلدەرى قازاقستانمەن بىرلەسىپ جاڭا جوبالاردى جۇزەگە اسىرۋعا زور قىزىعۋشىلىق تانىتتى
بۇل تۋرالى اقوردانىڭ باسپا ءسوز قىزمەتىنەن حابارلادى.
كەزدەسۋگە قاتىسۋشىلار الدىندا سويلەگەن سوزىندە مەملەكەت باسشىسى ولاردىڭ كوپشىلىگىنىڭ ەلىمىزدە جۇمىس ىستەپ جاتقانىن، قازاقستاننىڭ مۇمكىندىكتەرى مەن ۇزاقمەرزىمدى باسىمدىقتارىن جاقسى بىلەتىنىن ايتتى.
«مىسالعا، فرانسيانىڭ 24 كومپانياسى قازاقستاندا قازىردىڭ وزىندە 2 ميلليارد دوللاردان اساتىن جوبالاردى جۇزەگە اسىردى، 14 جوبا جۇزەگە اسىرىلۋ كەزەڭىندە تۇر، تاعى 10 ى - كەلەشەكتىڭ ەنشىسىندە. ءبىر عانا مەنىڭ ساپارىم بارىسىندا جالپى قۇنى 5 ميلليارد دوللاردان اساتىن كەلىسىمشارتتارعا قول قويىلاتىن بولادى»، - دەدى قازاقستان پرەزيدەنتى.
نۇرسۇلتان نازاربايەۆ قازاقستان مەن فرانسيانىڭ ساۋدا- ەكونوميكالىق جانە ينۆەستيتسيالىق ىقپالداستىعىنا ەگجەي- تەگجەيلى توقتالدى.
«فرانسيا قازاقستاننىڭ جەتەكشى ەكونوميكالىق سەرىكتەستەرىنىڭ قاتارىنا كىرەدى. ءبىزدىڭ ءوزارا ساۋدا اينالىمىمىز سوڭعى جىلدارى سىرتقى جاعدايدىڭ كۇردەلىلىگىنە قاراماستان، 6 ميلليارد دوللار كولەمىندە تۇراقتاپ وتىر. فرانسۋز بيزنەسىنىڭ سوڭعى 10 جىلدا ءبىزدىڭ ەكونوميكامىزعا سالعان ينۆەستيتسياسى شامامەن 12 ميلليارد دوللار بولدى. قازاقستان نارىعىندا 130 فرانتسۋز كومپانياسى ءتۇرلى سالالاردا جۇمىس ىستەيدى»، - دەدى مەملەكەت باسشىسى.
قازاقستان پرەزيدەنتى بۇگىندە دايىن ءونىم الاتىن بىرلەسكەن تابىستى جوبالار جۇزەگە اسىرىلىپ جاتقانىن اتاپ ءوتتى.
«ولاردىڭ قاتارىندا «الستوم» ەلەكتروۆوزدارى، «ەۆروكوپتەر» تىكۇشاعى، «پەجو» جانە «سيتروەن» اۆتوموبيلدەرى، كۇن باتارەيالارى، سەمەنت، «دانون» ءسۇت ونىمدەرىنىڭ جاڭا تۇرلەرى مەن باسقا دا وندىرىستەر بار. «ەيرباس دەفەنس ەند سپەيس» كومپانياسىمەن بىرلەسىپ جەردى قاشىقتان زوندتايتىن ەكى جەرسەرىك ۇشىردىق جانە عارىش اپپاراتتارىن قۇراستىرۋ- سىناۋ كەشەنى عيماراتىنىڭ قۇرىلىسىن اياقتاۋدى جوسپارلاپ وتىرمىز»، - دەدى نۇرسۇلتان نازاربايەۆ.
مەملەكەت باسشىسى جۇزەگە اسىرىلىپ جاتقان بىرلەسكەن ينۆەستيتسيالىق جوبالار قاتارىندا Airbus كومپانياسىمەن جۇمىسقا ارنايى توقتالدى.
«ەلىمىز تيتاننان جوعارى تەحنولوگيالى ءونىم جاسايتىن زاۋىت اشتى، بۇل ءونىم Airbus ۇشاقتارىن قۇراستىرۋ ءۇشىن پايدالانىلادى. قازاقستاننىڭ «ەير استانا» كومپانياسى فرانسۋز اۆياتسيا ونەركاسىبىنىڭ ۇشاقتارىن پايدالانۋ ارقىلى وسى سيكلدى اياقتايدى»، - دەدى قازاقستان پرەزيدەنتى.
مەملەكەت باسشىسىنىڭ ايتۋىنشا، استانا مەن پاريج اراسىندا تىكەلەي اۋە قاتىناسىن اشۋ جانە ينۆەستورلار ءۇشىن ۆيزاسىز رەجىم ەنگىزۋ ەكى ەلدىڭ ينۆەستيتسيالىق ىقپالداستىعىنا وڭ اسەرىن تيگىزەدى.
سونىمەن قاتار ەكى ەلدىڭ ىسكەر توپتارى اراسىندا قول قويۋعا ازىرلەنىپ جاتقان كەلىسىمشارتتار فرانتسياعا ۋران جەتكىزۋ، اۆتوموبيل ونەركاسىبى، سۋمەن قامتاماسىز ەتۋ، قالدىقتاردى جويۋ جانە باسقا دا ماڭىزدى باعىتتاردى قامتيتىنى اتاپ ءوتىلدى.
مەملەكەت باسشىسى قازاقستاننىڭ ينۆەستيتسيالىق احۋالدى ودان ءارى جاقسارتۋ، بەس ينستيتۋتسيونالدىق رەفورمانى جانە ۇلت جوسپارىن، «نۇرلى جول» باعدارلاماسىن جۇزەگە اسىرۋ، سونداي- اق استانادا «ەكسپو-2017» حالىقارالىق مامانداندىرىلعان كورمەسىن وتكىزۋگە دايىندىق جۇمىستارى تۋرالى دا ايتتى.
سوڭىندا نۇرسۇلتان نازاربايەۆ فرانسۋز بيزنەسىن قازاقستاندى يندۋستريالاندىرۋعا، جوسپارلانىپ وتىرعان ءىرى كاسىپورىنداردى جەكەشەلەندىرۋگە جانە قۇرىلىپ جاتقان «استانا» حالىقارالىق قارجى ورتالىعىنىڭ جۇمىسىنا بەلسەنە قاتىسۋعا شاقىردى.
فرانسۋزدىڭ ءىرى كومپانيالارىنىڭ باسشىلارى قازاقستانداعى قولايلى ينۆەستيتسيالىق احۋال قالىپتاستىرۋ ساياساتىنا جوعارى باعا بەرىپ، ءبىزدىڭ ەلدىڭ ءوزىن سەنىمدى سەرىكتەس رەتىندە كورسەتكەنىن اتاپ ءوتتى. سونىمەن قاتار، فرانسۋز بيزنەسىنىڭ وكىلدەرى قازاقستان بيزنەسىمەن بىرلەسىپ جاڭا جوبالاردى جۇزەگە اسىرۋ ىسىنە زور قىزىعۋشىلىق تانىتتى.
ءىس- شاراعا Airbus, Alstom Transport, Vicat, Soufflet, Rothschild Group, Veolia Asia, Areva جانە باسقا دا كومپانيالاردىڭ باسشىلارى قاتىستى.
