تەڭىز قاراقشىلارى تۋرالى قىزىقتى دەرەكتەر

استانا. قازاقپارات - ورتا عاسىرلاردا ءداۋىرى ءجۇرىپ تۇرعان تەڭىز قاراقشىلارى تۋرالى نە بىلەسىز؟ ولاردىڭ مۇحيت اسقان ساۋدا كەمەلەرىن توناۋمەن اينالىسقانى بەلگىلى. دەگەنمەن تەڭىز قاراقشىلارى بەلگىلى ءبىر يمپەريانىڭ مۇددەسىنە دە قىزمەت ەتكەن.

 اتاقتى قاراقشىلاردىڭ كاپيتاندارى ادام اياعى باسپاعان ارالداردا قازىناسىن ساقتاعان. قازىرگى تاڭدا ولاردىڭ بەلسەندىلىگى تومەندەگەن بولسا دا، ولار تۋرالى كوپتەگەن اڭىزدار قالدى. ەندەشە تەڭىز قاراقشىلارى تۋرالى قىزىقتى دەرەكتەر توپتاماسىنا نازار اۋدارىڭىزدار.

1. العاشقى قاراقشىلار تەڭىز جولدارى اشىلعان كەزدە پايدا بولعان. سايكەسىنشە الەمدەگى ەڭ العاشقى تەڭىز فلوتى دا تەڭىز ساۋداسىمەن اينالىساتىن كەمەلەردى قاراقشىلاردان قورعاۋ ماقساتىندا قۇرىلادى.

2. قاراقشىلار بەلگىلى ءبىر مەملەكەتتىڭ تاپسىرىسىن ورىندايتىن بولسا، ولاردى «كورسار» دەپ اتايتىن بولعان. ناقتىراق ايتار بولساق، ءبىر- بىرىنە قاس ەلدەر جاۋ كەمەلەرىن جويۋعا تاپسىرىس بەرەدى. قاراقشىلار بۇل سالادا تاجىريبەلى بولعاندىقتان، ارنايى سىياقى ءۇشىن كەمە توناۋمەن اينالىسادى. ايتا كەتسەك، الەمدى تەڭىز ارقىلى ەكىنشى بولىپ اينالىپ شىققان فرەنسيس درەيك شىندىعىندا قاراقشى بولعان. ول انگليا حانشايىمى ەليزاۆەتانىڭ تاپسىرىستارىن ورىنداپ، «اعىلشىن فلوتىنىڭ ۆيتسە- ادميرالى» تيتۋلىن يەمدەنەدى.

كورسار درەيكتىڭ تيتۋل يەمدەنۋ ءساتى

3. كورسارلار كەمە توناۋدان تۇسكەن تابىستى تەڭدەي بولگەن. كەمە كاپيتانى قازىنانىڭ وننان ءبىر بولىگىن العان. ال ەڭ از مولشەردەگى ولجا كەمە جوندەۋشىسىنە بەرىلگەن. سەبەبى ول شايقاسقا قاتىسپايتىن بولعان. ال شابۋىل كەزىندە جاراقات العان قاراقشىلارعا كوبىرەك ۇلەس تيگەن.

4. فرانسيا جانە انگليا سىندى ورتا عاسىر دەرجاۆالارى قاراقشىلىقتى زاڭدى دەپ قابىلدايدى. بۇل يسپان كورسارلارىنا قارسى تۇرۋدىڭ جاڭا ءادىسى ەدى. وسىلاي انگليا فلوتى يسپانيانىڭ جەڭىلمەيتىن «ارماداسىن» تەڭىز تۇبىنە باتىرادى.

5. تەڭىز قاراقشىلارى اراسىندا تانىمال ادامنىڭ باس سۇيەگى بەينەلەنگەن قارا ءتۇستى جالاۋ «كوڭىلدى رودجەر» دەپ اتالعان. ول تەك شابۋىل جاساۋعا دايىندىق كەزىندە كوككە كوتەرىلەتىن بولعان. ال كەيدە كەمەدە ەپيدەميا تاراعانىن ايعاقتاۋ ماقساتىندا قولدانىلعان.

massaget.kz