پارلامەنت سەناتىنىڭ جالپى وتىرىسىندا «استانا» حالىقارالىق قارجى ورتالىعى تۋرالى» زاڭ قابىلداندى
اتالعان زاڭ «100 ناقتى قادام» ۇلت جوسپارىن ىسكە اسىرۋ شەڭبەرىندە «استانا» حالىقارالىق قارجى ورتالىعىن قۇرۋ، كاپيتال نارىعىن جانە يسلامدىق قارجىلاندىرۋدى دامىتۋ جونىندەگى مەملەكەت باسشىسىنىڭ تاپسىرماسىن ورىنداۋدى كوزدەيدى.
جالپىلاما العاندا پارلامەنت قابىلداعان زاڭ «استانا» حالىقارالىق قارجى ورتالىعى ءدال بەلگىلەنگەن شەكارالارى بار، استانا قالاسىنىڭ شەگىندەگى اۋماقتى بىلدىرەدى. ورتالىقتىڭ اۋماعىندا ءوزىنىڭ زاڭناماسى بولۋى ىقتيمال، ەرەكشە قۇقىقتىق رەجيم قولدانىلاتىن بولادى. حالىقارالىق قارجى ورتالىعىنىڭ قولدانىستاعى قۇقىعى قابىلدانىپ وتىرعان كونستيتۋتسيالىق زاڭنان، انگليا جانە ۋەلس قۇقىعىنىڭ قاعيداتتارىنا، نورمالارى مەن پرەتسەدەنتتەرىنە نەگىزدەلگەن اكتىلەردەن، سونداي- اق رەتتەلمەگەن بولىكتە قولدانىلاتىن قازاقستان رەسپۋبليكاسىنىڭ قولدانىستاعى قۇقىعىنان تۇرادى.
زاڭناماعا سايكەس، ورتالىقتى باسقارۋ جونىندەگى كەڭەس قازاقستان رەسپۋبليكاسىنىڭ پرەزيدەنتى باسقاراتىن، تۇراقتى جۇمىس ىستەيتىن القالى ورگان قۇرىلادى. ونىڭ قۇزىرەتىنە ورتالىقتىڭ دامۋ ستراتەگياسىن ايقىنداۋ، قاۋلىلار تۇرىندەگى ورتالىقتىڭ اكتىلەرىن قابىلداۋ جاتادى. ورتالىق اكىمشىلىگى، ورتالىقتىڭ قارجىلىق قىزمەتتەر كورسەتۋدى رەتتەۋ جونىندەگى كوميتەتى، ورتالىق سوتى جانە باسقا دا قاجەتتى ورگاندار قۇرىلۋى مۇمكىن. ەرەكشە تارتىمدى جاعدايلار جاساۋ ماقساتىندا ورتالىقتا وزگەشە سالىقتىق، ۆاليۋتالىق، ۆيزالىق رەجيم، سونداي- اق شەتەلدىك جۇمىس كۇشىن تارتۋدىڭ رەجيمى كوزدەلگەن. وسىلايشا، سالىق سالۋ بولىگىندە ورتالىقتىڭ ورگاندارى مەن قاتىسۋشىلارىن 2066 - جىلعى 1- قاڭتارعا دەيىن ەلۋ جىلعا كورپوراتيۆتىك تابىس سالىعىن، مۇلىك سالىعىن جانە جەر سالىعىن تولەۋدەن بوساتۋ بەلگىلەنگەن.
بۇدان باسقا، شەتەلدىك قىزمەتكەرلەر جەكە تابىس سالىعىن تولەۋدەن بوساتىلادى. ۆيزالىق رەجيم بولىگىندە قىزمەتكەرلەر بولىپ تابىلاتىن شەتەلدىكتەر مەن ازاماتتىعى جوق ادامداردىڭ، سونداي- اق ولاردىڭ وتباسى مۇشەلەرىنىڭ ۆيزا الۋ ءراسىمىن جەڭىلدەتۋ كوزدەلگەن. اتالعان ادامدار بەس جىلعا دەيىن قولدانىلۋ مەرزىمىمەن كەلۋ ۆيزاسىن الادى، ال ەكونوميكالىق ىنتىماقتاستىق جانە دامۋ ۇيىمى ەلدەرىنىڭ جانە باسقا دا بەلگىلى ءبىر مەملەكەتتەردىڭ ازاماتتارى قازاقستان رەسپۋبليكاسىنىڭ اۋماعىنا كەلگەن كۇننەن باستاپ كۇنتىزبەلىك وتىز كۇنگە دەيىنگى مەرزىممەن ۆيزاسىز كەلۋ قۇقىعىن الادى.
شەتەلدىك جۇمىس كۇشىن تارتۋ بولىگىندە ورتالىقتىڭ قاتىسۋشىلارى مەن ورگاندارى شەتەلدىكتەر مەن ازاماتتىعى جوق ادامداردى رۇقسات الماي تارتۋعا قۇقىلى ەكەنى كوزدەلگەن. داۋلاردىڭ سوتتا قارالۋىن ورتالىق سوتى جۇزەگە اسىرادى، ول ءوز قىزمەتىندە تاۋەلسىز جانە قازاقستان رەسپۋبليكاسىنىڭ سوت جۇيەسىنە كىرمەيدى. ورتالىقتىڭ ورگاندارىنىڭ، قاتىسۋشىلارىنىڭ جانە ولاردىڭ شەتەلدىك جۇمىسكەرلەرىنىڭ قاتىسۋىمەن تۋىندايتىن داۋلاردى قاراۋ مەن شەشۋ سوتتىڭ ايرىقشا قۇزىرەتى بولىپ تابىلادى. ايتا كەتەرلىگى «استانا» حالىقارالىق قارجى ورتالىعىنىڭ رەسمي ءتىلى اعىلشىن ءتىلى بولىپ تابىلادى. جەكەلەگەن ماسەلەلەر بويىنشا قازاق نەمەسە ورىس تىلىنە اۋدارۋعا جول بەرىلەدى.
پارلامەنت قابىلداعان زاڭ مەملەكەت باسشىسىنىڭ قول قويۋىنا جولدانادى.
اۆتور: قانات مامەتقازى ۇلى
