ن. نازاربايەۆ: قازاقستان يۋنەسكو قىزمەتىن تولىقتاي قولدايدى

پاريج- استانا. قازاقپارات - مەملەكەت باسشىسى نۇرسۇلتان نازاربايەۆ يۋنەسكو-نىڭ باس ديرەكتورى يرينا بوكوۆامەن كەزدەستى.

بۇل تۋرالى اقوردانىڭ باسپا ءسوز قىزمەتىنەن حابارلادى.

كەزدەسۋ بارىسىندا مادەني جانە تاريحي مۇرالاردى ساقتاۋ ىسىندە، ءبىلىم جانە عىلىم سالاسىندا حالىقارالىق بايلانىستار اياسىن كەڭەيتۋدەگى قازاقستان مەن يۋنەسكو-نىڭ ءوزارا ىقپالداستىعى ماسەلەلەرى تالقىلاندى.

ەلباسى قازاقستاننىڭ يۋنەسكو-نى قولدايتىنىن جانە بەلسەنە ىنتىماقتاسىپ كەلە جاتقانىن ايتتى. نۇرسۇلتان نازاربايەۆ ي. بوكوۆانىڭ 2012 -جىلى استاناعا ساپارى اياسىندا الەمدىك جانە ءداستۇرلى دىندەر ليدەرلەرىنىڭ سەزىنە قاتىسۋىنىڭ ماڭىزدىلىعىن اتاپ ءوتتى.

«يۋنەسكو- مەن ءبىزدىڭ ارامىزدا جاقسى قارىم- قاتىناس ورنىققان. «ادامزاتتىڭ ار- ۇجدانى» اتالعان بۇل ۇيىم داستۇرلەر مەن مادەني قۇندىلىقتاردى قورعايدى. قازاقستان مادەنيەتىنىڭ كوپتەگەن ايشىقتى داتالارى يۋنەسكو-دا اتاپ ءوتىلدى»، - دەدى قازاقستان پرەزيدەنتى.

ي. بوكوۆا ءوز سوزىندە قازاقستان يۋنەسكو-نىڭ ەڭ بەلسەندى ءارى ىلكىمدى سەرىكتەسى بولىپ سانالاتىنىن، سوعان بايلانىستى ۇيىمنىڭ 70 جىلدىعىندا ونىڭ باس كونفەرەنسياسىنىڭ نۇرسۇلتان نازاربايەۆسىز ءوتۋىن ەلەستەتۋ مۇمكىن ەمەستىگىنە نازار اۋداردى.

يۋنەسكو باس ديرەكتورى قازاقستاننىڭ مادەنيەتتەردى جاقىنداستىرۋعا بايلانىستى ۇسىنعان باستامالارى مەن جوبالارىنىڭ الەمدەگى كەلىسىمدى نىعايتۋ ىسىندە زور ماڭىزى بار ەكەنىن دە اتاپ ءوتتى.

سونداي-اق، يۋنەسكو باس كونفەرەنتسياسىنىڭ 38- سەسسياسىندا ءسوز سويلەۋ بارىسىندا ق ر پرەزيدەنتى ن. نازاربايەۆ قازاقستان يۋنەسكو قىزمەتىن تولىقتاي قولدايتىنىن ايتتى.

«قازاقستان يۋنەسكو قىزمەتىن تولىقتاي قولدايدى»، - دەدى ن. نازاربايەۆ.

ق ر پرەزيدەنتى مەملەكەتىمىزدىڭ جەتىستىكتەرىنە توقتالىپ ءوتتى.

«مەن 20 جىل بۇرىن ەلىمىزدىڭ تاۋەلسىزدىگى ەندى قالىپتاسا باستاعان كەزدە وسى مىنبەردە ءسوز سويلەگەنىمدە جاس مەملەكەتىمىزدىڭ ماقساتتارى مەن مىندەتتەرى جايلى ايتقانمىن. بۇگىن ءبىز ب ۇ ۇ مىڭجىلدىق دامۋىنىڭ كوپتەگەن ماقساتتارىنا قول جەتكىزدىك»، - دەپ اتاپ ءوتتى ن. نازاربايەۆ.

قازاقستان پرەزيدەنتى ەلدەگى كەدەيشىلىك دەڭگەيى 11 ەسە (34 پايىزدان 3 پايىزعا دەيىن) ازايعانىن اتاپ ءوتى.

«ءبىز جۇزدەگەن اۋرۋحانا، مەكتەپتەر سالدىق. قازاقستاننىڭ ىشكى جالپى ءونىمى 19 ەسە ءوستى. جان باسىنا شاققانداعى تابىس ورتاشا دامىعان مەملەكەتتەر كورسەتكىشىنە جەتتى. قازاقستاندىقتاردىڭ ورتاشا ءومىر ءسۇرۋ ۇزاقتىعى - 70 جىل. انا مەن بالا ءولىمى ازايدى»، - دەدى ن. نازاربايەۆ.