ۇلتتىق ادەبيەتىمىزدىڭ ۇلكەن قۋانىشى
«سوتسياليزم اڭگىمەلەرى» مەن «ايەل پاراساتى» توپتاما اڭگىمەلەرى ءۇشىن بىرىككەن ۇلتتار ۇيىمى اياسىندا قۇرىلعان حالىقارالىق جازۋشىلار وداعىنىڭ «ۇلت ماقتانىشى» توسبەلگىسى تابىس ەتىلدى. توسبەلگىنى «بەيبىتشىلىك الەمى» حالىقارالىق قازاق شىعارماشىلىق بىرلەستىگىنىڭ وكىلەتتى وكىلى مۇحامەدقالي بايمۇقانوۆ تاپسىردى.
«اڭگىمە - اۋليە جانر» دەپ بەكەر ايتىلعان دەيسىز بە، اڭگىمە جازۋدىڭ قىر- سىرىن شەبەر يگەرە بىلگەن الىبەك اسقاروۆتىڭ «سوتسياليزم اڭگىمەلەرى» مەن «ايەل پاراساتى» اڭگىمەلەر سيكلى - بۇگىنگى وقىرماننىڭ جوعارى باعاسىنا يە بولعان ۇلگىلى، ۇزدىك اڭگىمەلەر. جازۋشىنىڭ وسى اڭگىمەلەرى جونىندە باسپا ءسوز بەتىندە گەرولد بەلگەر، قادىر مىرزا- ءالي، سەيىت قاسقاباسوۆ، تولەن ابدىكوۆ، ءامىرحان مەڭدەكە، زاريا جۇمانوۆا، جانات اسكەربەك قىزى كەزىندە جازدى دا.
بۇگىنگى ادەبيەتىمىزدىڭ كورنەكتى وكىلى، قوعام قايراتكەرى ءا. اسقاروۆتىڭ سونى ءتاسىل، تىڭ ورنەكتەرمەن ورىلگەن قاي- قاي اڭگىمەسى دە - ەستەتيكالىق تۇرعىدان اسەرلى، كوركەمدىك دەڭگەيى اسا بيىك دۇنيەلەر. جازۋشى وبراز سومداۋداعى وزىندىك تاسىلىمەن، بوياۋىنىڭ قانىقتىعىمەن، تابيعاتتى سۋرەتتەۋدەگى نازىك ناقىشتارىمەن ەرەكشە كوزگە تۇسەدى. جازۋشى شەبەرلىگىنىڭ ءبىر سىرى - كەز كەلگەن ۋاقىت وزگەرىستەرىن، زامان تالقىسىن وقىرمان جۇرەگىنە قونىمدى ءارى وتە ۇعىنىقتى ەتىپ جەتكىزە بىلۋىندە.
سونىمەن بىرگە الىبەك اسقاروۆتىڭ اڭگىمەلەرىن وقىعاندا ونىڭ قازاق اڭگىمەلەرىمەن قاتار الەم ادەبيەتىنىڭ وزىق ۇلگىلەرىن دە بەس ساۋساعىنداي جەتىك بىلەتىندىگى ايقىن اڭعارىلادى. ءسوز ساپتاۋىنان، وي ىرعاعىنان. ءا. اسقاروۆتىڭ اڭگىمەلەرىنىڭ وتىمدىلىگىن ۆاسيلي شۋكشين اڭگىمەلەرىمەن سالىستىرىپ جۇرگەن ادەبيەت سىنشىلارىنىڭ پىكىرىندە دە جان بار.
نە دەسەك تە، ءدال قازىرگىدەي وتپەلى، ورنىقسىز، قۇبىلمالى زاماندا اڭگىمە جانرىنا ايرىقشا ىنتا قويىپ، «اڭگىمە جازساڭ، وسىلاي جاز!» دەپ ايتۋعا تولىق لايىق «سوتسياليزم اڭگىمەلەرى» مەن اۋىل ايەلدەرىنىڭ («قازاق ايەلدەرىنىڭ» دەپ ۇعىڭىز) انا رەتىندەگى ۇلى بەينەسىن، ولاردىڭ پاراساتىن، وتباسىن ساقتاۋعا دەگەن شەگەدەي بەرىكتىگىن بەينەلەگەن «ايەل پاراساتى» اتتى سيكلدى اڭگىمەلەرىن دۇنيەگە اكەلگەن الىبەك اسقاروۆتىڭ ب ۇ ۇ تاراپىنان ماراپاتتالىپ جاتۋى - تەك سۋرەتكەر ءۇشىن عانا ەمەس، ۇلتتىق ادەبيەتىمىز ءۇشىن دە ۇلكەن ماقتانىش. ۇلكەن مەرەي.
«جاس الاش» گازەتى
