رەسمي ستاتيستيكا حالىققا قولجەتىمدى بولا ءتۇستى - ءا. سمايلوۆ

استانا. قازاقپارات - سوڭعى جىلدارى رەسمي ستاتيستيكا حالىق ءۇشىن قولجەتىمدى بولا ءتۇستى. بۇل تۋرالى ق ر ۇلتتىق ەكونوميكا مينيسترلىگى ستاتيستيكا كوميتەتىنىڭ ءتوراعاسى ءاليحان سمايلوۆ ءمالىم ەتتى.

«اقپاراتتىق تەحنولوگيالار سالاسىندا يننوۆاتسيالاردىڭ ەنگىزىلۋى ارقاسىندا مەملەكەتتىك ستاتيستيكانى قولدانۋ دەڭگەيى ارتتى. بيىل ون اي ىشىندە ستاتكوميتەت سايتىن 3 ميلليون ادام پايدالانعان. بۇل 2009 -جىلمەن سالىستىرعاندا 30 ەسە كوپ. باسقاشا ايتقاندا، رەسمي ستاتيستيكا حالىققا، بيزنەسكە، قوعامعا الدەقايدا قولجەتىمدى بولا ءتۇستى»، - دەپ اتاپ ءوتتى ول قازاقستان ستاتيستيكاسىنا 95 -جىل تولۋىنا وراي وتكىزىلگەن حالىقارالىق كونفەرەنتسيادا.

ونىڭ ايتۋىنشا، ۆەدومستۆو اقپاراتتى وڭدەۋ مەن ورنالاستىرۋدىڭ ءبىرىڭعاي «ە- ستاتيستيكا» اۆتوماتتاندىرىلعان جۇيەسىن ەنگىزدى.

«ە- ستاتيستيكا» اقپاراتتىق جۇيەسى 15 اقپاراتتىق جۇيەنىڭ باسىن قوسىپ وتىر. ول بيىل 1 -قاڭتاردان باستاپ، اقپاراتتىق قاۋىپسىزدىك بويىنشا وتكىزىلگەن اتتەستاتسيانىڭ بارلىق ساتىلارى جۇرگىزىلىپ بىتكەننەن سوڭ تولىق پايدالانۋعا بەرىلدى. جۇيە كەز كەلگەن ۋاقىتتا وزگەرىستەر ەنگىزىپ، رەسپوندەنتتەردەن ونلاين ادىسپەن ستاتيستيكالىق ەسەپتەردى جيناقتايدى، وڭدەيدى، ساقتايدى جانە ستاتكوميتەتتىڭ سايتىنان ونى بارلىق ازاماتتارعا قولجەتىمدى ەتە الادى.

ەسكە سالا كەتەيىك، 8 -قاراشا كۇنى قازاقستاننىڭ مەملەكەتتىك ستاتيستيكاسىنا 95 جىل تولادى. 1920 -جىلى ءدال سول كۇنى قازاق ا ك س ر ۇكىمەتى قازاق ا ك س ر مەملەكەتتىك ستاتيستيكاسىن قۇرۋ تۋرالى بۇيرىق شىعارادى. وسىلايشا، قازاقستاننىڭ ورتالىقتاندىرىلعان مەملەكەتتىك ستاتيستيكاسىنىڭ ىرگەسى قالانادى.

اۆتور: جاسۇلان جولدىبايەۆ