قازاقستانداعى ەڭ ۇزدىك توي اسابالارى - فوتو

استانا. قازاقپارات - قىسى جازى ۇزىلمەيتىن قازاقتىڭ تويى ايتۋلى اساباسىز وتپەيدى. قازاق تويىنىڭ كوركىن قىزدىرىپ، ءسانىن كەلتىرىپ جۇرگەن قانداي اسابالار؟ بەس التى ساعاتقا سوزىلاتىن توي ءۇشىن، اسابالاردىڭ الاتىن قۇنى قانشا؟

بۇگىندە توي بيزنەستىڭ تىزگىنىن ۇستاپ، كوپتىڭ كوڭىلىنەن شىعىپ، سۇرانىسقا يە بولعان اسابالاردىڭ ءتىزىمىن Comode ءتىزىپ شىقتى.

1. تۇرسىنبەك قاباتوۆ

 تۇرسىنبەك قاباتوۆتىڭ اسابالىق جۇمىس كەستەسى جارتى جىل بۇرىن قۇرىلىپ، الدىن الا جازىلىپ قويىلادى.

قازىرگى تاڭدا تويشىل قازاقتىڭ قالاۋىنا اينالعان تۇرسىنبەك تەاتر جەتەكشىسى عانا ەمەس، اسابالىقتى قاتار الىپ جۇرگەن اكتەر، ءارى جۇرگىزۋشى.

ونىڭ ەرەكشە ءسوز ساپتاۋى مەن توي باسقارۋ ءادىسىنىڭ ارقاسىندا دۋماندى كەشتەر قىزىقتى ءوتىپ جاتادى. الماتى جەرىندە وتەتىن ءبىر توي ءۇشىن قاباتوۆتىڭ الاتىن ەڭبەكاقىسى 5-8 مىڭ دوللار ارالىعى.

2. نۇرجان تولەنديەۆ

«شانشار» تەاترىندا تۋكا، ءىبان دەگەن اتپەن تانىمال بولعان نۇرجان دا سۇرانىسقا يە بولىپ جۇرگەن اسابالاردىڭ ءبىرى.

بۇگىندە جەكە تەاتر اشىپ، باعى جانعان اكتەر سوڭعى ۋاقىتتا كينوعا ءتۇسىپ، ءان دە شىرقايدى. وڭتۇستىك ءوڭىرىنىڭ تۋماسى كوبىنە سول جاقتىڭ ازىلدەرىن ايتىپ، ادامدى قىران توپان كۇلكىگە قالدىرادى.

تويدى ۋ- شۋسىز باسقارا بىلەتىن نۇرجاننىڭ قۇنى 2-5 مىڭ دوللار.

3. ەرلان ءبىلال

اكىم، تەاتر اكتەرى. بىرنەشە جىل ساحنادا ونەر كورسەتىپ كەلە جاتقان ەرلان توي جۇرگىزگەندە ادەپتەن اسپاي، مادەني تۇردە قالجىڭدى جەتكىزە بىلەدى.

جاتتاندى ءسوز ايتپاي، يمپروۆيزاتسيالىق قابىلەتىنىڭ ارقاسىندا كوپتىڭ تالعامىنا ساي. توي بيزنەسىندە اسا ۇلكەن شاقىرتۋعا يە بولعان تامادانىڭ تابىسى 3 مىڭ دوللار.

4. جاناتبەك بايتەكوۆ

جاناتبەك بايتەكوۆ تە «باۋىرجان شوۋ» مەن «تاماشا» تەاترىنىڭ تۇلەگى. تەليەۆيزيا سالاسىندا دا ونەرىن پاش ەتىپ جۇرگەن جاناتبەك، توي تىزگىنىن قولىنا العانىنا دا ءبىراز بولدى.

تىلگە شەشەن، ۇشقىر ويلى تامادانىڭ جۇرگىزگەن ءاربىر تويى ەرەكشە جاعدايدا وتەدى. قازاقتىڭ تويىن قىزدىراتىن اسابانىڭ بوس ۋاقىتى بولا بەرمەيدى ەكەن.

الماتى ەمەس، ەلىمىزدىڭ كەز كەلگەن جەرىندە تويدى ويداعىداي الىپ شىعا بىلەتىن جاناتبەكتىڭ باعاسى 3 مىڭ دوللار.

5. قانات ءالجاپپاروۆ

  قانات ءالجاپپاروۆ سوڭعى جىلدارى «بازار جوق» تەاترى ارقىلى تانىلىپ جۇرگەن اكتەر. اۆتوماتتىڭ داۋسىن سالىپ، ەلدى ەلەڭ ەتكىزگەن قانات تا اسابالىقپەن اينالىسىپ كەلەدى.

ازىلدەردى ءوزى جازىپ، ءتۇرلى يدەيالارمەن كوپتىڭ الدىنا شىعىپ جۇرگەن اسابانىڭ توي باسقارۋ ءتارتىبى دە وزگەشە. سوزگە شەبەر، تامادانىڭ قالاماقىسى 2-3 مىڭ دوللار.

6. ازامات ساتىبالدى

جىگىتكە جەتى ونەر دە از دەگەندەي، ازامات تەاتر، كينو اكتەرى. سونداي اق كونسەرت جۇرگىزۋمەن قاتار، اسابالىق قىزمەتتى دە ورىنداپ كەلەدى.

تويدى باستان اياق ءبىر قالىپتا جۇرگىزىپ، ءارى ءسوزدىڭ مايىن تامىزا بىلەتىن اسابانىڭ كوپشىلىككە ۇناپ جاتاتىنى بەلگىلى. ەليتالىق تويلاردى جوعارى دەڭگەيدە وتكىزە بىلەتىن، كاسىبي اسابانىڭ قۇنى 5 مىڭ دوللار.

7. ەربولات تولەگەنوۆ

ەربولات تولەگەنوۆتىڭ باسقالاردان ەرەكشەلەگى اجەنىڭ وبرازىن ويناۋى. قارياعا ءتان ءىس قيمىلداردى كورسەتىپ، سولار سەكىلدى سويلەۋى كوپتى تاڭعالدىرادى.

توي بيزنەسىندە جاس تا بولسا، تاجىريبەلى ەربولاتتىڭ اقىسى 2 مىڭ دوللار.

8. راحمان ومار

راحمان ومار دا كوگىلدىر ەكران ارقىلى بەلگىلى بولىپ جۇرگەن اسابا. راحماننىڭ وزگەشەلىگى ءان ايتىپ، ءبي بيلەۋى. تويدى كوڭىلدى، قىزىقتى وتكىزۋ ول ءۇشىن قيىنعا سوقپايدى.

ابدەن ماشىقتانعان ول، كەز كەلگەن ورتادا تويدى جانداندىرىپ، قىزدىرا اكەتەدى. قىرىقتىڭ قىرقاسىنان اسقان اسابانىڭ قۇنى 2-3 مىڭ دوللار.

9. ارمان دۇيسەنوۆ

ارمان دۇيسەنوۆ كومپوزيتور، اسابا. ءتۇرلى تۋىندىنى ومىرگە اكەلىپ جۇرگەن ارماننىڭ توي دۋمانداردى جۇرگىزە بىلەتىن قابىلەتى دە جوعارى.

تاجىريبەلى، سۇرانىسقا يە بولىپ جۇرگەن تامادانىڭ الاتىن اقشاسى 2-3 مىڭ دوللار.

10. ۋاليبەك ءابدىرايىموۆ

ۋاليبەك ءابدىرايىموۆ «شانشار» تەاترىنىڭ جەتەكشىسى، ءارى اسابا. جاسى 50 دەن اسقان تامادانىڭ سويلەۋ مانەرى، توي جۇرگىزۋ ءادىسى الدەقايدا ساپالى.

 ۇنەمى ىزدەنىستە جۇرەتىن ۋاليبەكتىڭ ازىلدەرى كوبىنە ۇلكەندەردىڭ كوڭىلىنەن شىعىپ جاتادى. ماعىنالى قالجىڭداردى حالىق الدىنا پاش ەتىپ جۇرگەن تامادانىڭ باعاسى 2-3 مىڭ دوللار.

  

سايتقا دايىنداعان: ريزابەك نۇسىپبەك ۇلى