ەلباسى «ريو تينتو» كومپانياسىنىڭ باسشىسىمەن گەولوگيالىق بارلاۋ جوبالارىن جۇزەگە اسىرۋ اسپەكتىلەرىن قاراستىردى

لوندون- استانا. قازاقپارات - مەملەكەت باسشىسى نۇرسۇلتان نازاربايەۆ «ريو تينتو» كومپانياسىنىڭ باس ديرەكتورى سەم ۋولشپەن كەزدەستى، دەپ حابارلايدى اقوردانىڭ باسپا ءسوز قىزمەتىنەن.

كەزدەسۋدە گەولوگيالىق بارلاۋ سالاسىنداعى بىرلەسكەن جوبالاردى ودان ءارى جۇزەگە اسىرۋدىڭ نەگىزگى اسپەكتىلەرى قاراستىرىلدى. تاراپتار سونداي-اق زاماناۋي ىزدەۋ جانە بارلاۋ تەحنولوگيالارىنىڭ ترانسفەرتى، سونداي-اق قازاقستان ماماندارىن وقىتۋ سياقتى ىنتىماقتاستىق باعىتتارىن تالقىلادى.

مەملەكەت باسشىسى بىرلەسكەن جۇمىستىڭ جەمىستى ءارى تابىستى بولاتىنىنا سەنىم ءبىلدىردى.

- قازاقستان اۋماعى رەسۋرستارعا باي. وسىنى ەسكەرە وتىرىپ، ءسىزدىڭ كومپانيانىڭ جۇمىسىنان زور ناتيجەلەر كۇتەمىز، - دەدى نۇرسۇلتان نازاربايەۆ.

س. ۋولش كومپانيا قازاقستاندا ءبىراز ءبىر ۋاقىتتان بەرى جۇمىس ىستەيتىنىن جانە «ريو تينتو» ءۇشىن ءبىزدىڭ ەل قىزىعۋشىلىق تۋدىرىپ وتىرعانىن ايتتى.