قازاقستان ينۆەستيتسيا تارتۋ سالاسىندا ۇلكەن جەتىستىكتەرگە قول جەتكىزدى - د. كەمەرون

لوندون- استانا. قازاقپارات - ق ر پرەزيدەنتى لوندوندا ۇلى بريتانيا پرەمەر- ءمينيسترى دەۆيد كەمەرونمەن كەزدەستى.

بۇل تۋرالى اقوردانىڭ باسپا ءسوز قىزمەتىنەن حابارلادى.

كەزدەسۋ بارىسىندا تاراپتار قازاقستان مەن بريتانيا اراسىنداعى ىنتىماقتاستىقتىڭ نەگىزگى باعىتتارىن تالقىلادى.

 ەلباسى د. كەمەروننىڭ 2013 - جىلعى قازاقستانعا ساپارى ەكىجاقتى ىنتىماقتاستىقتى دامىتۋعا سەرپىن بەرگەنىن اتاپ ءوتتى. سونداي- اق نۇرسۇلتان نازاربايەۆ قازاقستان ۇكىمەت مۇشەلەرىنىڭ بريتاندىق تاراپپەن جاسالعان كەلىسسوزدەر اياسىندا ماڭىزدى ۋاعادالىستىققا قول جەتكىزىلگەنىن اتاپ ءوتتى.

 سونىمەن قاتار، قازاقستان پرەزيدەنتى  ۇلى بريتانيا پرەمەر- ءمينيسترىن وتكەن پارلامەنت سايلاۋىنداعى ايقىن جەڭىسىمەن جانە جاڭا ۇكىمەتتىڭ جاساقتالۋىمەن قۇتتىقتادى.

«قازىرگىدەي زاماندا ءسىزدىڭ ەلدىڭ جەتكەن جەتىستىكتەرىن ايتا كەتكىم كەلەدى. مەنىڭ ساپارىمداعى تىعىز باعدارلامانىڭ بولۋى ءبىزدىڭ قارىم- قاتىناسىمىزدىڭ جوعارى دەڭگەيدە ەكەنىن بىلدىرەدى»، - دەدى ەلباسى.

 ءسوز العان د. كەمەرون قازاقستان ينۆەستيتسيا تارتۋ، يندۋستريا جانە ساۋدا سالاسىندا ايتارلىقتاي جەتىستىككە جەتكەنىن اتاپ ءوتتى. سونىمەن قاتار،  ۇلى بريتانيا پرەمەر- ءمينيسترى بۇگىنگى كۇنى ەكى ەل ءۇشىن كەلىسسوزدەردىڭ كەڭ الاڭى بار ەكەنىن جانە نۇرسۇلتان نازاربايەۆ ۇسىنعان رەفورمانى جۇزەگە اسىرۋدى تالقىلاۋعا نيەتتى ەكەنىن ءبىلدىردى.

كەلىسسوزدەر قورىتىندىسىندا تومەندەگىدەي ەكىجاقتى قۇجاتتارعا قول قويىلدى:

قازاقستان رەسپۋبليكاسى مەن ۇلى بريتانيا جانە سولتۇستىك يرلانديا بىرىككەن كورولدىگى اراسىنداعى ءوزارا قۇقىقتىق كومەك تۋرالى شارت؛

قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى مەن ۇلى بريتانيانىڭ مينيسترلەر كابينەتى حاتشىلىعى اراسىنداعى ءوزارا تۇسىنىستىك تۋرالى مەموراندۋم؛

ۇلى بريتانيا جانە سولتۇستىك يرلانديا بىرىككەن كورولدىگىنىڭ «ەكسپو-2017» كورمەسىنە قاتىسۋ تۋرالى شارت.

كەزدەسۋ سوڭىندا قازاقستان پرەزيدەنتى ۇلى بريتانيا پرەمەر- ءمينيسترىن I دارەجەلى «دوستىق» وردەنىمەن ماراپاتتادى.