لوندوندا ق ر پرەزيدەنتىنىڭ ۇلى بريتانيا پرەمەر- مينيسترىمەن كەزدەسۋى ءوتىپ جاتىر

 لوندون. قازاقپارات - بۇگىن لوندوندا ق ر پرەزيدەنتى نۇرسۇلتان نازاربايەۆ پەن  ۇلى بريتانيا بىرىككەن كورولدىگىنىڭ پرەمەر- ءمينيسترى دەۆيد كەمەرونمەن كەزدەسۋى وتۋدە،

 دەپ حابارلايدى «قازاقپارات» ءتىلشىسى.

شاعىن قۇرامداعى كەلىسسوز بارىسىندا ساۋدا- ەكونوميكالىق ىنتىماقتاستىقتى دامىتۋ ماسەلەلەرىنە باسا نازار اۋدارىلدى. ۇلى بريتانيا ق ر ەكونوميكاسىن ينۆەستيتسيالاۋ كولەمى بويىنشا كوشباسشىلاردىڭ ءبىرى بولىپ تابىلادى، دەپ مالىمدەدى ق ر پرەزيدەنتىنىڭ باسپا ءسوز قىزمەتى.

ۇلى بريتانيانىڭ قازاقستانعا ينۆەستيتسيا كولەمى 1995-2015 - جىلدارى 11,2 ميلليارد دوللاردى قۇرادى. ماقساتتى تاۋارلارعا باعانىڭ تۇسكەنىنە قاراماستان، قر تاۋاراينالىمىنىڭ جالپى كولەمى بويىنشا ۇلى بريتانيانىڭ ۇلەس سالماعى ەداۋىر وسكەنى بايقالادى.

 بۇدان باسقا، بريتاندىق ينۆەستيتسيانى شيكىزاتتىق ەمەس سەكتورلارعا جانە تەحنولوگيالىق وندىرىسكە، وڭدەۋشى سالالاردا بىرلەسكەن جوبالاردى ىسكە اسىرۋعا، اۋىل شارۋاشىلىعى، كولىك ينفراقۇرىلىمى مەن جاسىل تەحنولوگياعا تارتۋدى كەڭەيتۋ ماسەلەلەرى تالقىلاندى.

سونداي- اق كەلىسسوزدەر بارىسىندا الەمدىك ساياساتتىڭ ءبىرقاتار وزەكتى پروبلەمالارىن، سونىڭ ىشىندە قارۋسىزداندىرۋ، يادرولىق قارۋدى تاراتپاۋ، يادرولىق وتىن بانكىن قۇرۋ، ۋكراينا مەن سيرياداعى احۋال، ەكسترەميزمگە، ەسىرتكى تاسىمالىنا، زاڭسىز ميگراتسياعا قارسى كۇرەس ماسەلەلەرىن تالقىلاۋ جوسپارلانىپ وتىر.

ساپار اياسىندا ەكى ەل باسشىلارىنىڭ قاتىسۋىمەن قازاقستان جانە ۇلى بريتانيا ۇكىمەتارالىق كوميسسياسىنىڭ وتىرىسى وتەدى.

 مەملەكەت باسشىسى سونىمەن بىرگە ІІ ەليزاۆەتا پاتشايىممەن كەزدەسەدى.

اتاپ ايتۋ كەرەك، ق ر پرەزيدەنتى نۇرسۇلتان نازاربايەۆتىڭ بىرىككەن كورولدىككە رەسمي ساپارى پرەمەر- مينيستر د. كەمەروننىڭ شاقىرۋىمەن وتۋدە.