قىز بەن جىگىت قارىم-قاتىناسى: قاتە قاعيدالار

استانا. قازاقپارات - قىز بەن جىگىتتىڭ قارىم-قاتىناسىندا عاشىقتاردىڭ بارلىعى دەرلىك جىبەرەتىن قاتەلەردى بايقاۋعا بولادى. ءبىراق كەزەكتى ماتەريالىمىزدا ايىرىلىسۋعا اكەلەتىن قاتەلىكتەر مەن ادەتتەردى تالداۋدى ءجون كوردىك.

قىزعانىش

ەڭ نازىك، ەڭ پاك، سابىرلى دەگەن ادامنىڭ ءوزى سۇيىكتىسىنە وزگە بىرەۋدىڭ كوز سالىپ، ونىڭ نازارىن وزىنە اۋدارۋ ءۇشىن ارەكەت جاساپ جاتقانىن كورگەن كەزدە، اشۋلانىپ، دورەكىلىك تانىتۋى مۇمكىن. ال ەڭ «سوراقىسى» - سۇيىكتىسىنىڭ كوڭىلىنە كەلىپ، نامىسىن اياق استى ەتەتىن سۇراق قويۋى، ونى اشۋلاندىرىپ، ەركىندىگىن شەكتەۋى. سۇيىكتىڭىزدى ەشۋاقىتتا قىزعانباڭىز. ول ءسىزدى تاڭداعان ەكەن، وعان سەنىم ارتىڭىز. ال ەگەر ونداي ارام نيەتتى ادامداردىڭ ارالارىڭىزعا تۇسۋىنە جاعداي جاساي بەرەتىن بولسا، ودان باس تارتۋ كەرەك شىعار؟ مۇنداي ادام ءسىزدى وتباسىلىق ومىردە باقىتتى ەتە الا ما؟

الەۋمەتتىك جەلى

مىناداي ءبىر قىزىق وقيعا بولعان ەكەن: ءبىر جىگىت ۆكونتاكتە جەلىسىنىڭ نەگىزىن سالعان پاۆەل دۋروۆ ەسىمدى ازاماتقا «ءسىزدىڭ ارقاڭىزدا مەن ومىرلىك جارىمدى تاۋىپ، ەكەۋىمىز شاڭىراق كوتەردىك، راحمەت» دەپ العىسىن بىلدىرگەن ەكەن. ال پاۆەل ءوز كەزەگىندە «وقاسى جوق، سەندەر ەندى ءبىزدىڭ ارقامىزدا اجىراساسىڭدار» دەپ جاۋاپ بەرگەن ەكەن.

الەۋمەتتىك جەلى ادامداردى تابىستىرىپ قانا قويماي، ولاردىڭ رەنجىسىپ، ءتىپتى ارالاسپاي كەتۋلەرىنە دە سەبەپشى بولۋى مۇمكىن. پاۆەل مىرزا ايتقانداي جاعدايعا تاپ بولماس ءۇشىن گادجەتتىڭ كوگىلدىر ەكرانىنا ەمەس، سۇيىكتىڭىزدىڭ جۇزىنە قاراڭىز. جەكە كەڭىستىككە ءوتىپ، بولماشى مايدا-شۇيدەلەرمەن بولىسە بەرۋدىڭ قاجەتى جوق.

تاجىريبەسىز كەڭەسشىلەر

قۇربىلارىڭ مەن دوستارىڭنىڭ كوپ بولعانى جاقسى. ولار راسىمەن دە، جانى اشىپ، دۇرىس جولعا سالۋى مۇمكىن. ءبىراق ادامدار ءارتۇرلى. وسىنى ۇمىتپاڭىز. بارلىعىن ءبىر قالىپقا سالىپ، بىردەي وي قورىتۋعا بولمايدى. كەيدە قۇربىلار قىزعانىشتان ايىرىلىسۋلارىڭىزعا سەبەپ بولاتىن كەڭەس بەرۋى مۇمكىن. سوندىقتان تەك وزىڭىزگە سەنىڭىز. قاتتى قينالساڭىز، سۇيىكتىڭىزبەن بارلىعىن اشىپ سويلەسىڭىز.

اڭدۋ

سۇيىكتىڭىز سىزدەن بىرنارسە جاسىرىپ ءجۇر دەپ ويلايسىز با؟ الدە ونىڭ قالتاسىنداعى زاتتارى مەن تەلەفونىنداعى سۋرەتتەر قىزىقتىرا ما؟ قانشا جەردەن قاتتى قىزىقساڭىز دا، سۇيىكتىڭىزدىڭ جەكە كەڭىستىگىن سىيلاڭىز. سىزدەن بىرنارسە جاسىرسا، ونىڭ دا ماڭىزدى سەبەبى بار.

بۇرىنعى عاشىعىم

بۇرىنعى جىگىتىڭىزبەن نەمەسە قىزىڭىزبەن قارىم-قاتىناسىڭىز جاقسى بولسا، نۇر ۇستىنە نۇر بولار ەدى. الايدا مۇنىڭ قازىرگى سۇيىكتىڭىزگە جاقپايتىنىن ءبىلىڭىز. توي-دۋماندا بىرگە وتىرعاندارىڭىزدان بولەك، تەلەفونمەن سويلەسۋلەرىڭىزدىڭ ءوزى ونىڭ اشۋىن كەلتىرەدى. وسىدان كەيىن ايىرىلىسىپ كەتۋلەرىڭىز دە عاجاپ ەمەس.

ەڭ باستىسى، ءسۇيىڭىز، سۇيە ءبىلىڭىز. ومىردە بۇدان اسقان باقىت جوق ەكەنىن ءبىلىڭىز!

massaget.kz