ن. نازاربايەۆ ب. وبامانىڭ يادرولىق قارۋلاردى تاراتپاۋ سالاسىنداعى باستامالارىنا قولداۋ ءبىلدىردى

استانا. قازاقپارات - قازاقستان پرەزيدەنتى نۇرسۇلتان نازاربايەۆ امەريكا قۇراما شتاتتارىنىڭ مەملەكەتتىك حاتشىسى دجون كەرريمەن كەزدەسۋ وتكىزدى، دەپ حابارلادى اقوردانىڭ باسپا ءسوز قىزمەتى.

قازاقستان پرەزيدەنتى د. كەرريدىڭ ءبىزدىڭ ەلگە جانە وسى وڭىرگە العاشقى ساپارمەن كەلگەنىنە ريزاشىلىق ءبىلدىردى.

«تاياۋدا مەن نيۋ-يوركتە ا ق ش پرەزيدەنتى باراك وبامامەن كەزدەستىم، ەكىجاقتى ىقپالداستىق ماسەلەلەرى جونىندە سويلەستىك. ءبىزدىڭ رەسپۋبليكامىز جەلتوقساندا 24  جىلدىعى تويلاناتىن تاۋەلسىزدىگىنىڭ العاشقى كۇندەرىنەن بەرى ءسىزدىڭ ەلمەن ىنتىماقتاسىپ كەلەدى، ەگەمەندىگىمىز بەن ەكونوميكامىزدىڭ دامۋىنا ۇدايى كورسەتىلىپ كەلە جاتقان قولداۋ ءۇشىن قازاقستان حالقى ريزا. بۇگىندە ەلىمىزدە امەريكالىق كاپيتالدىڭ قاتىسۋىمەن 500  گە جۋىق كومپانيا جۇمىس ىستەيدى. ءبىز وسى جۇمىستى جالعاستىرۋعا نيەتتىمىز»، - دەدى مەملەكەت باسشىسى.

نۇرسۇلتان نازاربايەۆ قازاقستان مەن ا ق ش يادرولىق قارۋسىزدانۋ جانە تاراتپاۋ ماسەلەسى بويىنشا دا ىنتىماقتاسىپ وتىرعانىن ايتتى. وسىعان بايلانىستى ب. وبامانىڭ بۇل باعىتتاعى باستامالارىنا مەملەكەت باسشىسى قولداۋ ءبىلدىردى.

نۇرسۇلتان نازاربايەۆ پەن ب. وبامانىڭ نيۋ-يوركتە وتكەن يادرولىق قارۋدى تاراتپاۋ، قارۋلى ەكسترەميزمگە قارسى ءىس-قيمىل، اۋعانستانداعى جاعداي جانە دايش توپتارىنا قارسى كۇرەس ماسەلەلەرى تالقىلانعان كەلىسسوزدەرىنىڭ قورىتىندىسىن ا ق ش مەملەكەتتىك حاتشىسى جوعارى باعالايتىنىن اتاپ ءوتتى.

سونىمەن قاتار، د. كەرري قازاقستان مەن ا ق ش- تىڭ تىعىز سەرىكتەستىگى بەس ينستيتۋتسيونالدىق رەفورما مەن «100 ناقتى قادام» ۇلت جوسپارىن جۇزەگە اسىرۋ ىسىنە ەلەۋلى ىقپال ەتەتىنىنە سەنىم ءبىلدىردى.

«ا ق ش راسىندا دا قازاقستانداعى ءىرى ينۆەستورلاردىڭ ءبىرى بولىپ سانالادى. بۇگىن مەن امەريكا ساۋدا پالاتاسىنىڭ قازاقستانداعى وكىلدەرىمەن كەزدەستىم. ولار وزدەرىنىڭ ءسىزدىڭ ەلدە قول جەتكىزگەن تابىسىنا قاناعاتتاناتىندارىن ءبىلدىردى»، - دەدى ا ق ش مەملەكەتتىك حاتشىسى.