ن. نازاربايەۆتىڭ قازاقستان رەسپۋبليكاسىنىڭ سەناتىنا ۇندەۋى

استانا. قازاقپارات - بۇگىن مەملەكەت باسشىسى نۇرسۇلتان نازاربايەۆ قازاقستان رەسپۋبليكاسى پارلامەنىنىڭ سەناتىنا ۇندەۋ جولدادى. بۇل تۋرالى اقوردانىڭ باسپا ءسوز قىزمەتى حابارلادى.

 مەملەكەت باسشىسى ءوز ۇندەۋىندە ق. كەلىمبەتوۆتى ۇلتتىق بانك ءتوراعاسى لاۋازىمىنان بوساتۋ تۋرالى شەشىم قابىلدانعانىن مالىمدەدى.

 قازاقستان رەسپۋبليكاسى كونستيتۋتسياسىنىڭ 44-بابىنىڭ 4-تارماعىنا، 55-بابىنىڭ 2-تارماعىنا سايكەس، نۇرسۇلتان نازاربايەۆ ۇلتتىق بانك ءتوراعاسى لاۋازىمىنا پرەزيدەنتتىڭ كومەكشىسى قىزمەتىن ۋاقىتقا اتقارۋشى - پرەزيدەنت اكىمشىلىگىنىڭ الەۋمەتتىك- ەكونوميكالىق مونيتورينگ ءبولىمىنىڭ مەڭگەرۋشىسى دانيار اقىشيەۆتى تاعايىنداۋعا كەلىسىم بەرۋ جونىندە پارلامەنت سەناتىنا ءوتىنىش جولدادى.

نۇرسۇلتان نازاربايەۆ د. اقىشيەۆتىڭ بىلىكتىلىگىن جانە مول تاجىريبەسى بار ەكەنىن اتاپ ءوتتى.

«ول قازاق مەملەكەتتىك باسقارۋ اكادەمياسىن ۇزدىك بىتىرگەن. 18 جىلدان استام ۋاقىت ۇلتتىق بانكتە ەڭبەك ەتتى، سونىڭ جەتى جىلىندا ءتوراعانىڭ ورىنباسارى بولدى. قازىرگى ۋاقىتتا پرەزيدەنت اكىمشىلىگىندە قىزمەت ىستەيدى، ەلىمىزدەگى احۋال مەن ەكونوميكالىق ماسەلەلەردى جان- جاقتى زەردەلەي بىلەدى»، - دەدى مەملەكەت باسشىسى.

قازاقستان پرەزيدەنتى ۇلتتىق بانك باسقارۋ جۇيەسىنىڭ، اسىرەسە مەملەكەتتىك قارجىنى باسقارۋدىڭ ماڭىزدى ەلەمەنتى بولىپ سانالاتىنىن ايتتى.

«قازىر بانككە جانە ۇلتتىق ۆاليۋتا - تەڭگەگە دەگەن سەنىم ازايدى، بۇعان جول بەرۋگە بولمايدى. ەلدە تەڭگە وتىمدىلىگىنىڭ تاپشىلىعى سەزىلەدى، ەكونوميكانى نەسيەلەۋ كولەمى تومەندەۋدە. بۇلار - تومەن كورسەتكىشتەر، ولاردى تۇزەتۋ ءۇشىن جۇمىس ىستەۋ كەرەك. د. اقىشيەۆتىڭ ءبىلىمى مەن تاجىريبەسى وعان وسى مىندەتتى اتقارۋعا سەپتىگىن تيگىزەتىنىنە سەنىمدىمىن. پارلامەنت سەناتىنان ەلدىڭ قارجى جۇيەسىنىڭ يگىلىگى ءۇشىن مەنىڭ وسى شەشىمىمدى قولداۋدى سۇرايمىن»، - دەدى نۇرسۇلتان نازاربايەۆ.

 مەملەكەت باسشىسى وتاندىق ەكونوميكانىڭ جاعدايىنا ءبىرقاتار فاكتورلار ىقپال ەتەتىنىن ايتتى. ولاردىڭ قاتارىندا نەگىزگى ەكسپورتتىق تاۋارلار باعاسىنىڭ تومەندەۋىن، الەمدەگى گەوساياسي جاعدايدى، سونداي- اق قىتايداعى ەكونوميكالىق احۋالدى اتاۋعا بولادى.

 «ءبىز بۇل قاتەردىڭ ءبارىن ەڭسەرەمىز، ول ءۇشىن قاجەتتى مۇمكىندىكتەر بار، جوسپارلار ازىرلەنگەن. قازاقستاننىڭ مەملەكەتتىك قارىزى تومەن دەڭگەيدە. ى ج ءو- ءنىڭ 40 پايىزى كولەمىندە رەزەرۆتەرىمىز بار، ەگەر سونى ءتيىمدى پايدالاناتىن بولساق، ەكونوميكانىڭ دامۋىن جالعاستىرا الامىز جانە حالىقتىڭ الەۋمەتتىك كوڭىل- كۇيىنىڭ ناشارلاۋىنا جول بەرمەيمىز. ءبىز جۇرگىزىپ جاتقان يندۋستريالاندىرۋ جانە «نۇرلى جول» ينفراقۇرىلىمدىق باعدارلاماسى سىرتقى تەرىس ىقپالداردىڭ اسەرىن ازايتۋعا باعىتتالعان. بارلىق ونەركاسىپتىك ءىرى كاسىپورىندارعا تاعى دا ءسوز ارناي وتىرىپ، جۇمىس ورىندارىن ساقتاۋدى قامتاماسىز ەتۋگە شاقىرامىن»، - دەدى قازاقستان پرەزيدەنتى.