ايەل ەرىنەن قانداي جاعدايدا اجىراسۋعا قۇقىلى؟ - قازاقستان مۇسىلماندارى ءدىني باسقارماسى

الماتى. قازاقپارات - الماتى قالاسىندا بۇگىن قازاقستان مۇسىلماندارى ءدىني باسقارماسى جانىنداعى عۇلامالار كەڭەسىنىڭ وتىرىسى ءوتىپ جاتىر.

كەلەلى كەڭەس بارىسىندا قوعامداعى كۇردەلى ماسەلەلەردىڭ ءبىرى - تالاققا (اجىراسۋعا) بايلانىستى ارنايى ءپاتۋا شىعارىلدى. بۇل تۋرالى بۇگىن قازاقستان مۇسىلماندارى ءدىني باسقارماسىنىڭ باسپا ءسوز قىزمەتىنەن حابارلادى.

«قازىرگى تاڭدا تالاققا قاتىستى كەيبىر ماسەلەلەر ەلىمىزدە داۋعا اينالىپ وتىر. شاريعاتتا تالاق ەتۋ بيلىگى ەر كىسىگە بەرىلگەن. الايدا بەلگىلى ءبىر سەبەپتەر نەگىزىندە ايەلدىڭ قازيعا شاعىمدانۋى ارقىلى دا ەرىنەن اجىراسۋىنا رۇقسات بەرىلەدى. ايەلدىڭ نەمەسە تۋىستارىنىڭ قازيعا جۇگىنە وتىرىپ، ەرىنەن مىناداي جاعدايلاردا اجىراسۋىنا قۇقىعى بار:

1. كۇيەۋى بەلسىزدىك، سپيد سەكىلدى ايىقپاس قاتەرلى دەرتكە شالدىققاندا؛

2. ەرى ايەلىنە ءناپاقا تاۋىپ بەرە الماعان جاعدايدا؛

3. كۇيەۋى وتباسىن سەبەپسىز ۇزاق مەرزىمگە تاستاپ كەتكەن جاعدايدا؛

4. ەرى ايەلىن ۇدايى دەنەسىنە ءىز قالدىراتىنداي ۇرىپ-سوعاتىن بولسا؛

5. ەرى ءتورت اي نەمەسە ودان دا كوپ ۋاقىت ايەلىنە جاقىنداماۋعا انت ءىشىپ، سول ۋاقىت ارالىعىندا مۇلدەم جاقىندامايتىن بولسا؛

6. ەرى ايەلىن «زينا جاسادى» دەپ نەمەسە «مىناۋ مەنىڭ بالام ەمەس» دەپ ايىپتاپ، ءىس قازيدىڭ قۇزىرىندا قارالىپ، قازي ءبىر-بىرىنە لاعىنەت ايتقىزعاندا؛

7. ەرى ايەلىن قاراۋسىز قالدىرىپ، ايەلىنە تالاق بەرمەستەن سەبەپسىز ۇزاق ۋاقىت اۋرەلەسە.

مىنە وسىنداي جاعدايلار نەگىزىندە قازيعا ايەل نەمەسە تۋىستارى شاعىمدانعان كەزدە قازي ەرلى-زايىپتىلاردىڭ اراسىنا ارالاسىپ، ماسەلەنىڭ انىق- قانىعىنا كوز جەتكىزگەن سوڭ شەشىم شىعارادى»، - دەلىنگەن عۇلامالار كەڭەسى شىعارعان ءپاتۋادا.

سونىمەن قاتار، شەشىم بويىنشا بويىنشا ءبىرقاتار ەسكەرتۋلەر جاريالاندى. ياعني، ەكى جاقتىڭ تۋىستارى ەرلى- زايىپتىلاردى تاتۋلاستىرا الماعان جاعدايدا عانا قازيعا جۇگىنەدى جانە قازي قىزمەتىن ق م د ب شاريعات جانە ءپاتۋا ءبولىمى اتقارادى.

عۇلامالار كەڭەسىنىڭ ІX وتىرىسىنا ق م د ب ءتوراعاسى، باس ءمۇفتي ەرجان قاجى مالعاجى ۇلى، اپپارات جەتەكشىسى عىلىمبەك ماجيەۆ، ق م د ب ۋاعىز-ناسيحات ءبولىمىنىڭ مەڭگەرۋشىسى ەرشات وڭعاروۆ، الماتى قالاسىنىڭ باس يمامى نۇربەك ەسماعانبەت، ماڭعىستاۋ وبلىسىنىڭ باس يمامى سمايىل سەيىتبەكوۆ، شاريعات جانە ءپاتۋا ءبولىمى مەڭگەرۋشىسىنىڭ ورىنباسارى سانسىزباي قۇربان ۇلى، تەولوگ-عالىمدار، عىلىم دوكتورلارى - ءشامشيدين كەرىم، مۇحيتدين يسا ۇلى، الاۋ ءادىلباي، مۇحان يساحان، باۋىرجان ءالي ۇلى قاتىسۋدا.

كەڭەس جۇمىسى بۇگىن اياقتالادى.

ايتا كەتەلىك، ق م د ب عۇلامالار كەڭەسىنىڭ باستى مىندەتى - قازىرگى تاڭدا قوعامدا تۋىنداپ جاتقان جاڭا ماسەلەلەرگە شەشىم، ءپاتۋا شىعارىپ، ءدىني ساۋاتتىلىقتى ارتتىرۋ.

اۆتور: جاپپاربەرگەن ايبوتا