قازاقستان مەكتەپتەرىندە قىتاي ءتىلىن دە وقىتۋ قاجەت - امەريكالىق ميللياردەر

استانا. قازاقپارات - قازاقستان مەكتەپتەرىندە قىتاي ءتىلىن دە وقىتۋ قاجەت.

مۇنداي پىكىردى بۇگىن «ASTANA INBEST 2015» VI حالىقارالىق ينۆەستيتسيالىق فورۋم اياسىندا وتكەن باسپا ءسوز ءماسليحاتىندا الەمگە اتى تانىمال ينۆەستور ءارى ميللياردەر، بىرنەشە كومپانيانىڭ نەگىزىن قالاعان دجيم رودجەرس ءبىلدىردى.

«قاستارىڭىزدا قىتايلىقتار وتە كوپ. سىزدەر مەكتەپتەرىڭىزدە قىتاي ءتىلىن وقىتپايسىزدار. سىزدەر قازاق، ورىس، اعىلشىن ءتىلىن وقىتاسىزدار. ولار وتە جاقسى تىلدەر. ءبىراق، سىزدەرگە قىتاي ءتىلىن دە وقىتۋ قاجەت»، - دەدى امەريكالىق ميللياردەر.

ونىڭ اتاپ وتۋىنشە، قازاقستاندىقتار قىتاي ءتىلىن بىلەتىن بولسا، ءبىراز تابىسقا جەتە الادى.

«ياعني، مەن قازاقستاندا بولسام، وندا قىتاي ءتىلىن وقىتۋعا كۇش سالار ەدىم»، - دەدى د. رودجەرس.

اۆتور: مارلان جيەمباي