ەلوردادا حالىقارالىق ينۆەستيتسيالىق فورۋم باستالدى
فورۋمنىڭ بيىلعى تاقىرىبى رەتىندە قازاقستان مەن استانانىڭ ينۆەستيتسيالىق مۇمكىندىكتەرى تالقىلانادى.
فورۋمنىڭ ماقساتى - استانا قالاسىنىڭ اكىمشىلىگى مەن قازاقستانداعى نەگىزگى ينۆەستورلار اراسىندا ديالوگ الاڭىن ورناتۋ.
فورۋم تاريحىندا العاش رەت «قازاقستاندىق-امىرلىك بيزنەس فورۋمى» ۇيىمداستىرىلىپ وتىر. سونىمەن قاتار فورۋم اياسىندا «استانادا جاسالعان»، «martS استانا»، «استانا EXPO-2017» جانە «قالاداعى قازىرگى كولىك» اتتى كورمەلەر ءوتىپ جاتىر.
فورۋم جۇمىسىنا الەمنىڭ وتىز ەلىنەن 3 مىڭنان استام دەلەگات قاتىسۋدا. ولاردىڭ اراسىندا الەمگە ايگىلى ميللياردەر دجيم رودجەرس، «fDi» جۋرنالىنىڭ باس رەداكتورى كورتني فينگار، جاھاندىق باسەكەگە قابىلەتتىلىك يندەكسىنىڭ اۆتورى كساۆەر سالا-ي-مارتين قاتىسۋدا.
ايتا كەتەر جايت، «fDi» جۋرنالىنىڭ باس رەداكتورى ەركىن ەكونوميكالىق ايماعى بار قالالار رەيتينگىندە استانا قالاسىنا وسى رەيتينگتىڭ 20- ورنىن العاندىعى تۋرالى سەرتيفيكات تابىس ەتەدى. فورۋمنىڭ باستى ناتيجەسى رەتىندە قازاقستان كومپانيالارى مەن شەت ەلدىك كومپانيالار اراسىندا جالپى قۇنى 1,99 ميلليارد دوللار كولەمىندەگى مەموراندۋمدارعا قول قويىلادى دەپ جوسپارلانۋدا.
اۆتور: كەنجەكەي توقتامۇرات قىزى
