ءۇرىمجى مەن استانا ءوزارا ءتيىمدى ىنتىماقتاستىق ورناتپاق

استانا. قازاقپارات - ءۇرىمجى قالاسى ق ك پ پارتيا كوميتەتىنىڭ حاتشىسى چجۋ حايلۋن استاناعا رەسمي ساپارمەن كەلدى.

كەشە استانا اكىمى ادىلبەك جاقسىبەكوۆ مەيمانمەن ەلوردا اكىمدىگى عيماراتىندا كەزدەستى، دەپ حابارلادى astana.gov.kz رەسمي سايتى.

«جەتى جىل بۇرىن ءبىزدىڭ قالالار دوستىق قارىم-قاتىناستىڭ نەگىزىن قالاعان بولاتىن. ءۇرىمجى شىنجاڭ-ۇيعىر اۆتونوميالىق ولكەسىنىڭ تەك اكىمشىلىك ەمەس، سونىمەن قاتار، ەكونوميكالىق جانە وندىرىستىك ورتالىعى بولا وتىرىپ، ەكى مەملەكەت كاسىپكەرلەرىنىڭ ىسكەر بايلانىستارىندا ماڭىزدى ورىن الادى. ءسىزدىڭ استاناعا جاساعان رەسمي ساپارىڭىز ارىپتەستىك قارىم-قاتىناسىمىزعا جاڭا سەرپىن بەرەدى دەپ سەنەمىن» - دەدى كەزدەسۋ بارىسىندا ادىلبەك جاقسىبەكوۆ.

ءۇرىمجى ءوزىنىڭ گەوگرافيالىق ورنالاسۋىنىڭ ارقاسىندا قازاقستان مەن ق ح ر اراسىنداعى بايلانىستىرۋشىنىڭ ءرولىن اتقارادى. لانسيندىك تەمىر جولداعى ءىرى ترانزيتتىك پۋنكت بولىپ تابىلاتىن بۇل قالا ارقىلى قازاقستاندىق كاسىپكەرلەردىڭ قىتايداعى ارىپتەستەرى اراسىنداعى بايلانىستارى جۇزەگە اسىرىلادى.

وڭتۇستىك قىتايلىق اۋە جولدارىنىڭ شەشىمىمەن ۇرىمجىدەن استانا مەن الماتىعا ۇشاتىن اۋە رەيستەرىنىڭ سانىن 10 نان 15 كە دەيىن ارتتىرۋ، ەكونوميكا، كاسىپكەرلىك جانە اۋىل شارۋاشىلىعى سالالارىنداعى ورتاق جۇمىس، سونىمەن قاتار، قازاقستان استاناسىنىڭ قىتايدىڭ ىسكەر جانە تۋريستىك ورتالارىنىڭ ەكسپو-2017 كورمەسىنە تارتىلۋىنا قىزىعۋشىلىعى ەكى جاقتى قارىم-قاتىناستى كەڭەيتىپ، ودان ءارى دامىتا تۇسۋگە مۇمكىندىك بەرەدى.

ءۇرىمجى قالاسى ق ك پ پارتيا كوميتەتىنىڭ حاتشىسى چجۋ حايلۋن قوناقجايلىلىق ءۇشىن العىس بىلدىرە وتىرىپ، ەلوردا باسشىلىعىن استانانىڭ جەتكەن جەتىستىكتەرىمەن قۇتتىقتادى.

«ءبىزدىڭ ساپارىمىزدىڭ باستى ماقساتتارىنىڭ ءبىرى قالالارىمىز اراسىنداعى ارىپتەستىكتى دامىتۋ بولىپ تابىلادى. ءبىز باۋىرلاس قارىم-قاتىناستار ورناتۋعا كەلىسىم بىلدىردىك، سوندىقتان، بۇل باعىتتاعى جۇمىستارعا ۇلكەن ءمان بەرەمىز» - دەدى چ. حايلۋن. ءۇرىمجى قالاسى ق ك پ پارتيا كوميتەتى حاتشىسىنىڭ ايتۋىنشا، ءۇرىمجى قالاسى دەلەگاتسياسى قۇرامىندا كەلگەن بيزنەس-قاۋىمداستىعى وكىلدەرى باياعىدان استانادا جەمىستى ەڭبەك ەتىپ ءجۇر.

ق ح ر- دان كەلگەن قوناقتار تاراپتار اراسىندا ءتۇرلى سالالار بويىنشا تاجىريبە الماسىپ، سەرىكتەستىك ورناتۋعا ۇسىنىس ءبىلدىردى، سونداي-اق، استانادا ەكسپو كورمەسىنىڭ ءوتۋى كەزىندە تۋريستەر اعىمىن ۇلعايتۋعا قولداۋ كورسەتەتىندىكتەرىن ايتتى. سونىمەن قاتار، تاراپتار ەكى قالا كاسىپكەرلەرىنىڭ تۇراقتى تۇردە كەزدەسۋلەرىن ۇيىمداستىرۋ مەن بيزنەس-كونفەرەنسيالاردى وتكىزۋ جانە يندۋستريالدى پاركتەگى ۇرىمجىدەن كەلەتىن قوناقتار سانىنىڭ كولەمىن ارتتىرۋ ماسەلەلەرىن تالقىلادى.

بۇگىن ءۇرىمجى دەلەگاتسياسى استانا دامۋىنىڭ باس جوسپارىمەن تانىسىپ، قالانىڭ مادەني نىساندارىن كورەدى. ەرتەڭ، 29- قازاندا، قوناقتار «استانا ينۆەست-2015» فورۋمىنىڭ سەسسياسىنا قاتىسىپ، يندۋستريالدى پارك نىساندارىن ارالايدى.