ەۋروپالىق عالىمدار بەرەل قورعانى مەن تامعالى پەتروگليفتەرىن زەرتتەۋگە قىزىعۋشىلىق تانىتۋدا
بۇل تۋرالى بۇگىن ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.
«مينيسترلىك رەسپۋبليكالىق كىتاپ مۋزەيىنىڭ بازاسىندا «مادەنيەتتەردىڭ جاقىنداسۋى ورتالىعىن» قۇرۋ ماسەلەسىن قاراپ جاتىر. حالىقارالىق ارىپتەستىكتى دامىتۋ ماقساتىندا، ءبىز شەتەلدىك عالىمدارمەن بايلانىس ورناتۋدامىز. كەيىن بۇل ورتالىق يۋنەسكو ەگيداسى اياسىندا جۇمىس ىستەمەك»، - دەپ اتاپ ءوتتى ا. مۇحامەدي ۇلى مينيسترلىكتىڭ القا ماجىلىسىندە.
ونىڭ ايتۋىنشا، وسىناۋ دەڭگەيدەگى ورتالىق تەك يۋنەسكو- نىڭ باس كونفەرەنسياسىنىڭ قارارى نەگىزىندە عانا قۇرىلا الادى.
«نورۆەگيا جانە نەمىس عالىمدارى قازاقستاننىڭ بەرەل قورعانى مەن تامعالى پەتروگليفتەرى سىندى تاريحي ەسكەرتكىشتەردى زەرتتەۋگە جانە ونى ساقتاۋعا قاتىستى جەرگىلىكتى عالىمداردىڭ جوبالارىنا قاتىسۋعا قىزىعۋشىلىق تانىتۋدا. قازاقستان ءوز كەزەگىندە شەتەلدىك عالىمدارمەن وسىنداي ارىپتەستىككە تەك قولداۋ بىلدىرەدى»، - دەدى ول.
اۆتور: جاسۇلان جولدىبايەۆ
