قازاقستاندا وندىرىلگەن باعالى مەتالدار مەن اسىل تاستاردان جاسالعان زەرگەرلىك بۇيىمدار تاڭبالانادى - ءماجىلىس

 استانا. قازاقپارات - بۇگىن ماجىلىستە پالاتا دەپۋتاتتارى «باعالى مەتالدار مەن اسىل تاستار تۋرالى» زاڭ جوباسىن ءبىرىنشى وقىلىمدا ماقۇلدادى.

 زاڭ جوباسىنىڭ ماقساتى باعالى مەتالدار مەن اسىل تاستاردى ءوندىرۋ جانە ولاردىڭ اينالىمى، باعالى مەتالدارمەن جانە اسىل تاستارمەن وپەراتسيالاردى مەملەكەتتىك رەتتەۋ جانە باقىلاۋ بولىپ تابىلادى. بۇدان بولەك، قازاقستاندا زەرگەرلىك ونەركاسىپتى دامىتۋعا جاعداي جاسالىپ، وسى باعىتتا تۋىندايتىن قوعامدىق قاتىناستاردى رەتتەۋدىڭ ءبىرىڭعاي زاڭنامالىق نەگىزى قالىپتاسادى.

 سونىمەن قاتار زاڭ جوباسىندا ۇكىمەتتىڭ، ۇلتتىق بانكتىڭ، باعالى مەتالدار مەن اسىل تاستار اينالىمى سالاسىنداعى ۋاكىلەتتى ورگاننىڭ قۇزىرەتىن ايقىنداپ، وسى سالاداعى زاڭنامانى بۇزعاندارعا جاۋاپتىلىق بەلگىلەنەدى.

ۇلتتىق بانكى باعالى مەتالدار اكتيۆتەرىن تولىقتىرۋ ءۇشىن، باعالى مەتالدار ءوندىرىسى سۋبەكتىلەرىمەن جانە قايتا وڭدەۋ ناتيجەسىندە مەنشىك يەلەرى بولعان تۇلعالارمەن اففينيرلەنگەن التىندى ساتىپ الۋ جونىندە مامىلەلەر جاساسۋعا مەملەكەتتىڭ باسىم قۇقىعى بەلگىلەنەدى. سونىمەن قاتار قۇجاتتا قازاقستاننىڭ اۋماعىندا وندىرىلگەن جانە وتكىزىلەتىن باعالى مەتالدار مەن اسىل تاستاردان جاسالعان زەرگەرلىك بۇيىمداردى سىنامالاۋ، ولاردى تاڭبالاۋ مىندەتى قاراستىرىلادى. ونداي اتاۋلى تاڭبالار ۋاكىلەتتى ۇيىمدا تىركەلۋگە مىندەتتى بولادى.

اۆتور: قانات مامەتقازى ۇلى