گيننەسستىڭ رەكوردتار كىتابىنا ەنگەن كويلەك ۇلگىلەرى

استانا. قازاقپارات - جاقىندا زايسان اۋدانىنىڭ ءبىرجان اۋىلىنا كەلگەنىمىزدە كورشى قىتايدىڭ التاي ايماعىنان توركىندەپ كەلىپ جاتقان فازيلا قابدراحمانوۆا دەگەن شەبەر جايلى ەستىدىك.

 مۇنىڭ الدىندا عالامتوردان جانە «تاڭشولپان» باعدارلاماسىنان فازيلانىڭ تىككەن كويلەكتەرى گيننەسستەر رەكوردتار كىتابىنا ەنگەنى جايلى حاباردى كوزىمىز شالىپ قالعان. شەبەردىڭ «ەڭ بيىك» ، «ەڭ ۇلكەن باتىر» ، «ەڭ مەيىربان انا» ، «قازاقتىڭ ارۋى» اتتى بيىكتىگى 4,5 مەترلىك، سان تۇسكە مالىنعان اسەم كويلەكتەرى ءادىل قازىلار القاسىن تاڭعالدىرىپتى. ەندى، مىنە، گيننەسستىڭ رەكوردتار كىتابىنا ونىمدەرى ەنگەن قانداسىمىزبەن اڭگىمەلەسىپ وتىرمىز.

 - قازاقتىڭ ۇلتتىق ناقىشتاعى كيىمدەرىن، كەستە تىگۋمەن وسىدان جارتى عاسىر بۇرىن شۇعىلدانا باستادىم. ول انا سۇتىمەن كەلگەن. انامىز دا شەبەر. 25  جىل بۇرىن التاي قالاسىندا «اقجول» اتتى ۇلتتىق كيىمدەر تىگەتىن زاۋىتتى اشتىق. وندا نەگىزىنەن قازاق قىزدارى ەڭبەك ەتەدى. كاسىپورىندا كيىز ءۇي جابدىقتارى، ساياحات جاساۋعا ارنالعان سپورتتىق كيىمدەر، ۇلتتىق ءداستۇردى ايگىلەيتىن كورپە- جاستىقتار تىگىلەدى. سونىمەن بىرگە، ساپالى تىگۋ ماشينالارىن قاجەت ەتەتىندەرگە ساتامىز. بىزگە قىتايدىڭ بارلىق ايماقتارىنان تاپسىرىس ءجيى تۇسەدى. شاڭىراق كوتەرىپ جاتقان جاستار ۇيلەنۋ تويىنا ارنالعان كيىمگە تاپسىرىس بەرەدى، ولاردى ساپالى ەتىپ ورىندايمىز. سونىمەن بىرگە، كەستەدەن كيىم تىگۋدى ادەتكە اينالدىردىق. 2013 -جىلى ماعان شىنجاندا «قولونەر ماماندىعىنىڭ شەبەرى» دەگەن اتاق بەرىلدى، - دەيدى فازيلا قابدراحمانوۆا.

فازيلا تۋىستارىنا وزدەرى جاساعان ءتۇرلى- ءتۇستى جاستىق، الاشا بۇيىمدارىن الىپ كەلىپتى. ولار اسەمدىگىمەن كوزدىڭ جاۋىن الادى. شەبەردىڭ ارمانى اتا قونىستاعى اعايىندارمەن ارالاس- قۇرالاس بولىپ، ءوز تاجىريبەسىن ۇيرەتۋ. ەگەر جاقسىلىققا جانى قۇمار سىڭلىلەرىم مەنى ىزدەسە، تاۋىپ الادى، - دەيدى كورشى ەلدە تۇرىپ جاتقان قولى التىن، شەبەر قارىنداسىمىز.

 وڭداسىن ەلۋباي. «ەگەمەن قازاقستان»