شىمكەنتتە ۇشقىشسىز ۇشاق شىعارىلادى
«روب اۆيا» - قازاقستاندا ۇشقىشسىز ۇشاق شىعاراتىن جانە ونى قولدانىسقا ەنگىزگەن جالعىز كومپانيا.
شاعىن عانا ۇشاقتىڭ سالماعى - نەبارى 20-30 كەلى. رەسەيدەن ارنايى شاقىرىلعان ماماندارمەن بىرگە شىمكەنتتىڭ قۇراستىرۋشى-ينجەنەرلەرى بىرلەسە جاساپ شىعارعان. بارلىق قادام نەگىزىنەن كومپيۋتەرلىك جۇيەلەر ارقىلى قاداعالانىپ، مەحانيكالىق جانە ەلەكتروندى اۆتوپيلوت ارقىلى باسقارىلادى.
ول ءۇشىن بورتتا باسقارۋ قۇرالى ورناتىلعان. وپەراتور بار بولعانى ۇشىقتىڭ باعىتىن، ۇشۋ اۋماعىن، بيىكتىگىن، جالپى كوورديناتتارىن باقىلاپ وتىرادى. ەگەر قانداي دا ءبىر توسىن جاعداي ورىن السا، اپپاراتتى كەرى قايتاراتىن جۇيە جۇمىس ىستەيدى.
«ۇشاقتىڭ سالماعى اۋىر ەمەس، 20-30 كەلى شاماسىندا. ودان وزگە 6-10 كەلىگە جۋىق جۇك تاسۋعا مۇمكىندىگى بار. ۇشۋ ۇزاقتىعى 2 ساعاتتان 9 ساعاتقا دەيىن جەتەدى. بەلگىلەنگەن تاپسىرماعا سايكەس 100 مەتردەن باستاپ 7000 مەترگە دەيىنگى بيىكتىككە كوتەرىلە الادى.
ورتاشا جىلدامدىعى ساعاتىنا 70-150 شاقىرىمدى قۇرايدى. مۇنداي جىلدامدىقتا كەز كەلگەن نارسەنى بايقاپ، جۇمىستاردى اتقارۋعا بولادى. اپپاراتتىڭ قاۋىپسىز تۇردە جۇمىس ىستەۋىن قامتاماسىز ەتەتىن باعدارلاما ورناتىلعان»، - دەيدى «روب اۆيا» كومپانياسىنىڭ باس قۇراستىرۋشىسى ۆيتالي ساۋلياك.
«روب اۆيا» كومپانياسى شىمكەنتتە 2014-جىلى قۇرىلعان. ءبىر جىلدىڭ ىشىندە وسىنداي ۇشقىشسىز ۇشىرىلاتىن 10 اپپارات جاساپ شىعارىپتى. ءارقايسىسىنىڭ ءوز اتاۋى بار. ماسەلەن، العاشقىسىن «سامۇرىق 3م» دەپ اتاسا، كەلەسىسى «سامۇرىق 5م» دەگەن اتاۋعا يە. ولار ءتۇرلى جاعدايعا ىڭعايلانىپ جاسالىنادى. ءبىرى اۋىل شارۋاشىلىعى، ەندى ءبىرى اسكەري سالادا ىزدەستىرۋ شارالارىنا لايىقتالعان. كومپانيا وكىلدەرىنىڭ دايىن ۇشاقتارى اشىق الاڭقايدا سىنالدى.
«ۇشقىشسىز ۇشۋ اپپاراتىن كوبىنە حالىق شارۋااشىلىعىنا پايدالانۋعا بولادى. ەگىستىك القاپتاردى دارىلەۋدە، گاز-مۇناي قۇبىرلارى بار ارنايى ايماقتاردى قولدانۋدا تاپتىرمايتىن دۇنيە. ءتىپتى ورمان شارۋاشىلىعىندا ورىن العان ءورت كەزىندە وتە قاجەت. ويتكەنى ۇشۋ اپپاراتىنىڭ ورتتەن حابار بەرەتىن ارنايى دىبىستىق بەلگىسى بولادى. حالىق تىعىز ورنالاسقان جەرلەرگە ۇشىرۋ دا قاۋىپسىز جانە باعاسى دا قىمبات ەمەس»، - دەيدى قۇرىلتايشى الەكساندر ۆەلەسەك.
بۇگىندە مۇنداي ۇشۋ اپپاراتىنا قاجەتتىلىك ارتىپ كەلەدى دەيدى كومپانيا وكىلدەرى. ويتكەنى بۇل ارزان، ۇشقىشتى قاجەت ەتپەيدى جانە قولدانىستا وتە ءتيىمدى. سوندىقتان ماماندار الداعى ۋاقىتتا شاعىن ۇشاقتاردىڭ سانىن كوبەيتۋدى كوزدەپ وتىر.
