ن. نازاربايەۆ جاپوندىق كومپانيالاردى «استانا» حالىقارالىق قارجى ورتالىعىنا بەلسەندى قاتىسۋعا شاقىردى
بۇگىن جاپونيا پرەمەر- ءمينيسترى سيندزو ابەنىڭ ەلىمىزگە ساپارى اياسىندا استانادا وتكەن قازاقستان- جاپونيا بيزنەس فورۋمى بارىسىندا ءسوز سويلەگەن ق ر پرەزيدەنتى نۇرسۇلتان نازاربايەۆ وسىلاي مالىمدەدى.
ءسوز اراسىندا مەملەكەت باسشىسى «بولاشاق ەنەرگياسى» تاقىرىبىندا وتەتىن «ەكسپو-2017» حالىقارالىق كورمەسى ەكى ەلدىڭ ىنتىماقتاستىق اياسىن كەڭەيتە تۇسەتىنىن ايتىپ، اتالمىش تاقىرىپ اياسىندا قازاقستان ەكولوگيانى قورعاۋعا ءوز ۇلەسىن قوساتىنىن، تازا ەنەرگيانىڭ ورنىقتىلىعىنا قولجەتىمدىلىكتى قامتاماسىز ەتۋ جايى قاراستىرىلاتىنىن اتاپ ءوتتى.
«كورمەگە قاتىساتىنىن قازىرگى تاڭدا 42 مەملەكەت پەن 4 حالىقارالىق ۇيىم رەسمي تۇردە راستادى. جاپونيا ۇكىمەتى دە ەكسپو-2017 كورمەسىنە قاتىساتىنىن قۇپتادى، بۇل ءۇشىن ريزاشىلىق بىلدىرەمىز. وسى رەتتە جاپونيانىڭ وسىناۋ حالىقارالىق كورمەنى وتكىزۋدەگى باسىمدىق جاسالعان 20 مەملەكەتتەر توبىنىڭ تىزىمىنە ەنەتىنىن اتاپ وتكىم كەلەدى»، - دەدى ن. نازاربايەۆ.
بۇدان بولەك، ەلباسى ەكسپو-قالاشىعى بازاسىندا «استانا» حالىقارالىق قارجى ورتالىعى دا قۇرىلاتىنىن، ول الەمدەگى ەڭ وزىق ا ق ش، سينگاپۋر، ۇلى بريتانيا قارجى نارىقتارىنىڭ ۇلگىلەرىن وزىنە قامتيتىنىن اتاپ ءوتتى.
«بۇعان قاتىسۋ ءۇشىن تەڭدەسسىز جاعدايلار جاسالۋدا. اعىلشىن تىلىندە ءىس جۇرگىزۋ، سونىڭ ىشىندە سوت ءىسىن جۇرگىزۋ، قاتىناستاردى رەتتەۋ قاراستىرىلىپ جاتىر. ونداعى ينۆەستيتسيالىق داۋلار حالىقارالىق سۋديالاردىڭ قاراۋىنا جاتاتىن بولادى. ورتالىق قاتىسۋشىلارى ۇزاق مەرزىمگە كورپوراتيۆتىك، جەكە جانە تابىس سالىقتارىنان بوساتىلادى. ولار جۇمىسقا شەتەلدىك جۇمىس كۇشتەرىن رۇقسات الۋسىز دا تارتا الادى. ورتالىقتىڭ قاتىسۋشى قىزمەتكەرلەرى مەن ولاردىڭ وتباسىلارىنا جەڭىلدەتىلگەن ۆيزالىق رەجيم بەكىتىلەدى. وسى ايتىلعان شارتتاردى، سونىمەن قاتار، استانا قالاسىنىڭ ينفراقۇرىلىمىن ەسەپكە الساق، حالىقارالىق قارجىلىق ورتالىقتىڭ مىقتى بۋىنىن قۇرۋ مۇمكىندىگى بىزدە بارشىلىق. ءبىز جاپوندىق كومپانيالاردىڭ بۇل جوباعا بەلسەندى قاتىسۋىن كۇتەمىز»، - دەپ تۇيىندەدى نۇرسۇلتان نازاربايەۆ.
اۆتور: قانات مامەتقازى ۇلى
