ن. نازاربايەۆ جاپونيا تاراپىمەن ىنتىماقتاستىقتا وتە ماڭىزدى سالالاردى اتادى

استانا. قازاقپارات - بۇگىن اقوردادا جاپونيا پرەمەر- ءمينيسترى سيندزو ابەمەن كەلىسسوزدەردەن كەيىن قازاقستان پرەزيدەنتى نۇرسۇلتان نازاربايەۆ جاپونيا تاراپىمەن سيرەك كەزدەسەتىن مەتالداردى بارلاۋ، اتوم ەنەرگەتيكاسى، بانك سەكتورى، حيميا ونەركاسىبى، اۋىل شارۋاشىلىعى، كولىك سالاسىنداعى ىنتىماقتاستىق وتە ماڭىزدى ەكەنىن اتادى.

«ءسىزدىڭ پرەمەر- مينيستر بولعاننان بەرگى بۇل ءبىزدىڭ ءتورتىنشى كەزدەسۋىمىز. ءار كەزدەسۋدە ەكى ەلدىڭ اراسىنداعى ديالوگقا ءارۋاقىتتا اشىقپىز دەپ، قارىم- قاتىناستى جاقىنداتامىز دەپ كەلىسكەن بولاتىنبىز. سول كەزدەسۋلەر بارىسىندا مەن ءسىزدى شاقىردىم جانە وسى ساپارىڭىز قازاقستان ءۇشىن ۇلكەن وقيعا. ءبىزدىڭ جان- جاقتى قارىم- قاتىناسىمىز تۇرعىسىندا ەلىمىز ءۇشىن جاپونيامەن قاتىناستاردى دامىتۋ ۇلكەن باسىمدىق بولىپ سانالادى. تاۋەلسىزدىگىمىزدىڭ ءبىرىنشى كۇنىنەن باستاپ جاپونيا مەن قازاقستاننىڭ اراسىنداعى قارىم- قاتىناستاردى جاقسارتۋ، ەكى ەلدىڭ ەكونوميكاسىن جاقىنداستىرۋ ءۇشىن كۇش سالىپ كەلەمىز» ، - دەپ توقتالدى ەلباسى.

وسى ورايدا پرەزيدەنت بۇگىندە ءبىرقاتار شارالار جۇزەگە اسىرىلعانىن اتاپ ءوتتى. مەملەكەت باسشىسى ءوز سوزىندە جاپونيا تاراپىنىڭ، اسىرەسە يادرولىق سىناقتاردان زارداپ شەككەن سەمەي وڭىرىنە كورسەتكەن كومەگى ءۇشىن ۇلكەن العىسىن جەتكىزدى. بۇل تۇرعىدا ن. نازاربايەۆ تەك رەسمي كومەك باعىتىندا قازاقستانعا 1,2 ميلليارد دوللار كولەمىندە قولداۋ جاساعانىن ەسكە سالىپ ءوتتى.

«ءبىز بولاشاقتا وسىنداي قارىم- قاتىناستى تەرەڭدەتۋگە مۇددەلىمىز. ەكى ەلدىڭ اراسىنداعى قاتىناستاردىڭ ەڭ باستى ماسەلەسى - ول ساۋدا- ساتتىق بولىپ سانالادى» ، - دەدى پرەزيدەنت.

«ءبىزدىڭ ەلدەردىڭ ءبىرىن- ءبىرى تولىقتىرىپ تۇراتىن مۇمكىندىكتەرى ءوزارا ءىس- قيمىلدار كوكجيەگىن ءارى قاراي كەڭەيتۋگە ىقپال ەتەدى. ولار اتوم ەنەرگەتيكاسىن، اۋىل شارۋاشىلىعىن، اۆتوموبيل جاساۋ، جوعارى تەحنولوگيالار سالاسىن قامتيدى» ، - دەدى پرەزيدەنت.

كەلىسسوزدەر بارىسىندا جاپوندىق ءىرى كومپانيالاردىڭ باسشىلارى قاتىسىپ، ولار ءوز كەزەگىندە قازاقستاندا جۇمىس ىستەۋگە دايار ەكەنىن مالىمدەدى. «ءبىزدىڭ ويىمىزشا، سيرەك كەزدەسەتىن مەتالداردى بارلاۋ، اتوم ەنەرگەتيكاسى، بانك سەكتورى، حيميا ونەركاسىبى، اۋىل شارۋاشىلىعى، كولىك سالاسىنداعى ىنتىماقتاستىق وتە ماڭىزدى» ، - دەدى ەلباسى.

 سونىمەن ن. نازاربايەۆ قازاقستاندا بۇگىندە وتە ماڭىزدى ينستيتۋتسيونالدىق رەفورمالار ءجۇرىپ جاتقاندىعىن، يندۋستريالىق ساياسات پەن ينفراقۇرىلىمدىق جوبالار بويىنشا ۇلكەن جۇمىستار ىسكە اسىرىلىپ جاتقاندىعىن اتاپ ءوتتى. وسى ورايدا تىنىق مۇحيتى ەلدەرىنىڭ ءبىزدىڭ وڭىرمەن، سونداي- اق ەۋروپامەن بايلانىسىن كۇشەيتۋ شارالارى اتقارىلىپ وتىرعاندىعىن جەتكىزدى. «بۇل جولداردى جاپوندىق بيزنەس تە پايدالانا الادى» ، - دەدى مەملەكەت باسشىسى.

  

اۆتور: رۋسلان عابباسوۆ