جاپونيا پرەمەر- ءمينيسترىنىڭ جۇبايى استاناداعى وقۋشىلار سارايىن ارالادى - فوتو
وقۋشىلار سارايىنىڭ نانو- تەحنولوگيالار پاركىن ارالاپ كوردى.
الدىمەن «جاس جۋرناليست» ۇيىرمەسىنە باس سۇققان اكيە حانىم ولارمەن ەمەن- جارقىن اڭگىمەلەسىپ، بالالاردىڭ سۇراقتارىنا جاۋاپ بەردى، ءارى اڭگىمە اراسىندا ءوزىنىڭ اقىلىن ايتىپ وتىردى.
«مەن پرەمەر- ءمينيستردىڭ جۇبايى رەتىندە كوپتەگەن ەلدەرگە ساپارلايمىن، جاپونيادا دا كوپتەگەن شارالارعا قاتىسامىن. سونىمەر قاتار توكيودا شاعىن مەيرامحانام بار. ءبىلىم بەرۋ سالاسىندا ءبىرقاتار جوبالاردى جۇزەگە اسىرعانمىن. بولاشاقتاعى ويىم - شالعاي پروۆينتسيالاردا ورتا مەكتەپ اشۋ»، - دەيدى ا. ابە بالالاردىڭ سۇراعىنا جاۋاپ بەرە وتىرىپ.
جالپى، وقۋشىلار سارايىنداعى «جاس جۋرناليست» ۇيىرمەسى قازاق جانە ورىس تىلدەرىندە جۋرناليستيكاعا ىنتاسى بار وقۋشىلاردى وقىتادى. بالالاردىڭ اياق الىسى جامان ەمەس، سەبەبى، شەتەلدىك پرەمەر- ءمينيستردىڭ جۇبايىنا وزدەرىنە ءتان قىزىقتى دا ءماندى سۇراقتار قويدى. مىسالى، ءبىر وقۋشى «جۇبايىڭىزدىڭ جۇمىس بابىندا ءسىز ىقپال ەتەتىن جايتتار بولدى ما؟» دەپ سۇراسا، ەكىنشىسى «جاپون بالالارى مەن قازاق بالالارىنىڭ ۇقساستىعىن، سىرت كوزگە بايقالاتىن ايىرماشىلىعىن ايتىپ بەرىڭىزشى» دەدى.
«مەن باسقا ادامعا تۇرمىسقا شىقسام، تاعدىرىم مۇلدە وزگەشە بولار ەدى. قازىر جاپونيا پرەمەر- ءمينيسترىنىڭ جارى بولعاندىقتان، كەيدە ساياسي شارالارعا قاتىسامىن. جولداسىممەن ەرىپ، شەت مەملەكەتتەرگە ساپارعا شىعامىن. جۇبايىما ءارقاشان قولداۋ بىلدىرەمىن»، - دەي كەلە اكيە حانىم كوپتەگەن ەلدەردە قازىر بالانىڭ دامۋىنا، ءبىلىم الۋىنا بارلىق جاعداي جاسالعانىن جانە ولار سول مۇمكىندىكتى پايدالانۋى كەرەكتىگىن اتاپ ءوتتى.
