ن. نازاربايەۆ جاپونيا پرەمەر- ءمينيسترى سيندزو ابەمەن كەزدەستى - فوتو
كەزدەسۋ بارىسىندا نۇرسۇلتان نازاربايەۆ س. ابەنى پرەمەر- مينيستر لاۋازىمىنا قايتا سايلانۋىمەن قۇتتىقتاپ، الەمدىك ەكونوميكاداعى كۇردەلى احۋال كەزەڭىندە قىزمەتىنىڭ تابىستى بولۋىنا تىلەكتەستىك ءبىلدىردى.
مەملەكەت باسشىسى قازاقستان مەن جاپونيانى كوپ نارسە بايلانىستىراتىنىن اتاپ ءوتتى.
«ءبىزدىڭ ەلدەرىمىز يادرولىق قارۋدى سىناقتان وتكىزۋ مەن قولدانۋدىڭ قاسىرەتتى زاردابىن باسىنان وتكەردى. سول سەبەپتى مەن جاھاندىق انتيادرولىق قوزعالىس جونىندە باستاما كوتەردىم جانە وسىعان وراي ءسىزدىڭ باستامالارىڭىزدى ءبىز تولىق قولدايمىز»، - دەدى نۇرسۇلتان نازاربايەۆ.
ەلباسى استانا قۇرىلىسى جاپون ارحيتەكتورى ك. كۋراكاۆانىڭ باس جوسپارى بويىنشا، ال ەلورداداعى جاڭا حالىقارالىق ۋنيۆەرسيتەتتى دامىتۋ جاپونيا وكىلى - رەكتور ش. كاتسۋدىڭ باسشىلىعىمەن جۇزەگە اسىرىلىپ كەلە جاتقانىن ايتتى.
سونىمەن قاتار نۇرسۇلتان نازاربايەۆ قازاق- جاپون قارىم- قاتىناستارىن دامىتۋ ماسەلەلەرىنە دە توقتالدى.
«ءبىزدىڭ ەلدەرىمىز اراسىندا ەكونوميكالىق تۇرعىدان دا، ساياسات سالاسىندا دا كەلىسپەۋشىلىك جوق. قازاقستان ءسىزدىڭ ەلمەن بارلىق باعىت بويىنشا ىنتىماقتاسۋعا نيەتتى. ءسىزدىڭ ورتالىق ازيا ەلدەرىنە ساپارىڭىز ماڭىزدى ءارى دەر كەزىندە جاسالىپ وتىر. ءبىز ءوزارا ءىس- قيمىلدىڭ «جاپونيا - ورتالىق ازيا» فورماتىن قولدايمىز جانە ونى قاجەت دەپ سانايمىز»، - دەدى قازاقستان پرەزيدەنتى.
مەملەكەت باسشىسى جاپونيا پرەمەر- ءمينيسترىنىڭ بۇل ساپارى ەكى ەلدىڭ ىنتىماقتاستىعىنا جاڭا سەرپىن بەرەدى دەپ ۇمىتتەنەتىنىن جەتكىزدى.
س. ابە قوناقجايلىق پەن ءىلتيپاتتى قابىلداۋ ءۇشىن قازاقستان تاراپىنا العىس ايتتى.
«مەن پرەمەر لاۋازىمىندا بولعان 9 جىل ىشىندە قازاقستانعا ءبىرىنشى رەت كەلىپ وتىرمىن. بۇرىن ءبىز ءتۇرلى حالىقارالىق شارالاردا ءۇش رەت كەزدەستىك، بۇل - ءبىزدىڭ ءتورتىنشى كەزدەسۋىمىز. وسىنداي تىعىز بايلانىستار ارقىلى قارىم- قاتىناستارىمىزدى بەلسەندى تۇردە دامىتىپ وتىرعانىمىز مەنى اسا قۋانتادى»، - دەدى س. ابە.
جاپونيا پرەمەر- ءمينيسترى قازاقستانعا ىسكەر توپتار وكىلدەرىنەن تۇراتىن كەڭ اۋقىمداعى دەلەگاتسيامەن بىرگە كەلگەنىن جانە ناقتى ناتيجەلەرگە ءۇمىت ارتاتىنىن اتاپ ءوتتى.
