ەلباسى: استانا مەن توكيو - سەنىمدى سەرىكتەستەر

استانا. قازاقپارات - رەسمي استانا مەن توكيو سەنىمدى سەرىكتەس بولىپ قالۋدا. بۇل تۋرالى بۇگىن اقوردادا جاپونيا پرەمەر- ءمينيسترى سيندزو ابەمەن كەڭەيتىلگەن قۇرامداعى كەلىسسوزدەر بارىسىندا ەلباسى نۇرسۇلتان نازاربايەۆ ءمالىم ەتتى.

«قازاقستان مەن جاپونيا اراسى قاشىق بولعانىمەن، جاقىن دوستاس ەلدەر بولىپ تابىلامىز. ءسىزدىڭ ەلدەرىڭىزبەن جان- جاقتى قاتىناستاردى دامىتۋ ءبىزدىڭ تاۋەلسىزدىكتىڭ العاشقى كۇندەرىنەن باستاپ سىرتقى ساياساتتاعى ماڭىزدى باسىمدىقتاردىڭ ءبىرى بولىپ وتىر. وسى جىلدارى استانا مەن توكيو سەنىمدى سەرىكتەس بولىپ قالۋدا. ءبىز ءارقاشان دا ءبىرىمىزدى ءبىرىمىز قولداپ كەلەمىز جانە بىزدە ورتاق ىستەرىمىز كوپ، ياعني يادرولىق قارۋسىزدانۋ مەن ونى تاراتپاۋدا، سونداي- اق اتوم ەنەرگەتيكاسىن بەيبىت پايدالانۋدا وداقتاسپىز»، - دەدى پرەزيدەنت.

 سونىمەن قاتار ەلباسى، استانا ەكى ەلدىڭ اراسىنداعى دوستىق قاتىناستاردىڭ جارقىن سيمۆولى ەكەندىگىن اتاپ ءوتتى. ال ەلوردانىڭ دامۋى تۇجىرىمداماسىنا نەگىزىندە جاپوندىق اتاقتى ساۋلەتشى كيسيە كۋروكاۆانىڭ قوسقان ۇلەسى ولشەۋسىز ەكەندىگىن باسا ايتتى.

«ساۋدا- ەكونوميكالىق، ينۆەستيتسيالىق ءوزارا ءىس- قيمىلداردىڭ تەرەڭدەۋىن ايرىقشا اتاپ وتكىم كەلەدى. تەك 2013-2014 - جىلدارى ەكىجاقتى تاۋار اينالىمى ەكى ميلليارد دوللارعا جۋىقتادى جانە بيىلدىڭ ءبىرىنشى جارتىجىلدىعىندا بۇل كورسەتكىش 600 ميلليون دوللاردى قۇرادى. 10 جىلدا قازاقستان ەكونوميكاسىنا ينۆەستيتسيالار 5 ميلليارد دوللارعا جۋىق قارجىنى قۇرادى. سونىمەن قاتار قازاقستانعا رەسمي كومەك جەلىسى بويىنشا 1 ميلليارد 200 ميلليون دوللار ۇسىنىلدى»، - دەدى مەملەكەت باسشىسى.

اۆتور: رۋسلان عابباسوۆ