قازاقستان پرەزيدەنتى كاتار ءامىرى شەيح تاميم بەن حاماد ءال تانيمەن كەزدەستى - فوتو

استانا. قازاقپارات - قازاقستان پرەزيدەنتى نۇرسۇلتان نازاربايەۆ كاتار ءامىرى شەيح تاميم بەن حاماد ءال تانيمەن كەزدەستى، دەپ حابارلادى اقوردانىڭ باسپا ءسوز قىزمەتى.

 ەكى جاقتىڭ دەلەگاتسيالارىنىڭ كەڭەيتىلگەن قۇرامدا وتكەن كەزدەسۋلەرى بارىسىندا نۇرسۇلتان نازاربايەۆ ءبىزدىڭ ەلىمىز كاتار مەملەكەتىن وسى وڭىردەگى ماڭىزدى سەرىكتەس رەتىندە قاراستىراتىنىن ايتا كەلىپ، ىنتىماقتاستىقتى بۇدان ءارى دامىتۋ ءۇشىن ەكى ەلدىڭ الەۋەتى جەتكىلىكتى ەكەنىن اتاپ ءوتتى. وعان قازاقستان مەن كاتار اراسىندا جوعارى ساياسي دەڭگەيدە قالىپتاسقان ءوزارا سەنىمدى قارىم- قاتىناس نەگىز بولۋعا ءتيىس.

ەكى ەلدىڭ كوپتەگەن وڭىرلىك جانە حالىقارالىق ماسەلەلەرگە قاتىستى ۇستانىمدارى ۇقساس. كاتار مەملەكەتى سياقتى قازاقستان دا قازىرگى كەزدە ءوز ەكونوميكاسىن ءارتاراپتاندىرۋ ساياساتىن قارقىندى جۇرگىزىپ جاتىر. ەلدە اۋقىمدى ينستيتۋتسيونالدىق رەفورمالار، يندۋستريالىق- يننوۆاتسيالىق جانە ينفراقۇرىلىمدىق دامۋعا باعىتتالعان مەملەكەتتىك باعدارلامالار جۇزەگە اسىرىلۋدا. اتالعان باعدارلامالار ەكى ەلدىڭ كومپانيالارى اراسىندا بىرلەسكەن جوبالار ءۇشىن پەرسپەكتيۆالارعا جول اشادى.

ەلباسى سونداي-اق قازاقستان بۇگىندە ەۋروپا مەن وڭتۇستىك- شىعىس ازيانى بايلانىستىراتىن ىسكەرلىك، ترانزيتتىك جانە لوگيستيكالىق ءىرى حاب قۇرىپ جاتقانىن دا ەسكە سالدى. سول ارقىلى ەلىمىز الەم حالقىنىڭ تورتتەن ءۇشى تۇرىپ جاتقان 60 قا جۋىق ەلدى بايلانىستىراتىن جاڭا جىبەك جولىن قالىپتاستىرۋدا. ەلىمىزدىڭ كولىك- ترانزيتتىك مۇمكىندىكتەرى قىتايدىڭ، رەسەيدىڭ جانە ورتالىق ازيا ءوڭىرىنىڭ نارىقتارىنا قولجەتىمدىلىكتى قامتاماسىز ەتەتىن بولادى.

مەملەكەت باسشىسى 2017 -جىلى استانادا مامانداندىرىلعان ەكسپو حالىقارالىق كورمەسى وتەتىنىن ايتتى جانە كاتار كومپانيالارىن سول شاراعا بەلسەنە قاتىسۋعا شاقىردى.

نۇرسۇلتان نازاربايەۆ ەلىمىزدە ينۆەستورلار ءۇشىن بارىنشا قولايلى ينۆەستيتسيالىق احۋال قالىپتاستىرۋ ماقساتىندا كوپتەگەن جەڭىلدىكتەر مەن ارتىقشىلىقتاردىڭ زاڭ جۇزىندە بەكىتىلگەنىن ايتتى. استانادا بريتان قۇقىعىنا نەگىزدەلگەن حالىقارالىق قارجى ورتالىعى ىسكە قوسىلاتىنى، سونداي- اق رەسپاۋبليكادا يسلامدىق قارجىلاندىرۋ ىسىنە ايرىقشا ماڭىز بەرىلىپ وتىرعانى اتاپ ءوتىلدى. قازاقستاندا يسلامدىق قارجى يندۋسترياسى سالاسىندا زاڭنامالىق بازا قالىپتاستى، يسلام بانكينگى، ساقتاندىرۋ جانە ليزينگ سەكتورىندا ءبىرقاتار قارجى ينستيتۋتتارى جۇمىس ىستەيدى.

كاتار ءامىرى شەيح تاميم بەن حاماد ءال تاني قازاقستان پرەزيدەنتى بۇل ساپارى ەكىجاقتى قارىم- قاتىناستارعا قۋاتتى سەرپىن بەرەتىنىن، دوحا ءبىزدىڭ ەلمەن كەڭ اۋقىمداعى ىنتىماقتاستىق ورناتۋعا مۇددەلى ەكەنىن اتاپ ءوتتى. كاتار قازاقستاندى ورتالىق ازياداعى سەنىمدى ءارى ماڭىزدى سەرىكتەس رەتىندە قاراستىراتىنىن ايتتى.

قازاقستان پرەزيدەنتى مەن كاتار ءامىرى ەكى ەلدىڭ اراسىندا قارجى- ينۆەستيتسيا، بانك سەكتورىندا، اگروونەركاسىپ سالالارىندا ءوزارا ءتيىمدى ىنتىماقتاستىقتى دامىتۋ ءۇشىن زور الەۋەتتىڭ بار ەكەنىن اتاپ ءوتتى.

***

كەزدەسۋ قورىتىندىسىندا تومەندەگىدەي ەكىجاقتى قۇجاتتارعا قول قويىلدى:

1. ديپلوماتيالىق پاسپورتى بار تۇلعالاردىڭ ۆيزا تالاپتارىنان بوساتىلاتىنى تۋرالى قازاقستان رەسپۋبليكاسى ۇكىمەتى مەن كاتار مەملەكەتى ۇكىمەتى اراسىنداعى كەلىسىم؛

2. مادەنيەت جانە ونەر سالاسىنداعى ىنتىماقتاستىق تۋرالى قازاقستان رەسپۋبليكاسى ۇكىمەتى مەن كاتار مەملەكەتى ۇكىمەتى اراسىنداعى كەلىسىم؛

3. قازاقستان رەسپۋبليكاسىنىڭ ۇلتتىق بانكى مەن كاتار مەملەكەتىنىڭ ورتالىق بانكى اراسىنداعى ءوزارا تۇسىنىستىك تۋرالى مەموراندۋم.