قازاقستان كاتارمەن ۇزاقمەرزىمدى نەگىزدە سەرىكتەستىككە دايىن - ن. نازاربايەۆ
«قازىرگى ۋاقىتتا مەملەكەتارالىق قارىم-قاتىناسىمىزدا ءبىز بار مۇمكىنشىلىكتى تولىق پايدالانىپ وتىرعان جوقپىز. تاۋار اينالىمى وتە تومەن. مەن ءتىپتى ونىڭ نەبارى 25 مىڭ دوللار ەكەندىگىن ايتقىم دا كەلمەيدى. ەشتەڭە جوق دەسەك تە بولادى. مەملەكەتارالىق جاپ-جاقسى قارىم-قاتىناس كەزىندە نەلىكتەن مۇنداي ورىن الۋدا؟»، - دەدى ەلباسى.
قازاقستان پرەزيدەنتى مۇنداي جايتتىڭ ورىن الۋىنا تۇرتكى بولىپ وتىرعان نەگىزگى سەبەپتەردى دە اتاپ، ەكى ەلدىڭ ءبىر-بىرىنەن گەوگرافيالىق الشاق ورنالاسقانىن، لوگيستيكا دۇرىس جولعا قويىلماعانىن جەتكىزدى. وسى رەتتە مەملەكەت باسشىسى وتكەن جىلى اياقتالعان قازاقستاننان يراننىڭ پارسى شىعاناعىنداعى پورتقا دەيىنگى تەمىر جول ەكى ەلدىڭ ساۋدا-ساتتىعىنا سەرپىن بەرە الاتىندىعىن باسا ايتتى.
«كاتار مەن يران اراسىندا دۇرىس قارىم-قاتىناس بولعان كەزدە بۇل جول بىزدەرگە ساۋدا-ساتتىق پەن بايلانىستارىمىزدى جاقسارتا تۇسۋگە كومەكتەسەدى دەپ ويلايمىز. ءبىز ورنالاسقان ورتالىق ازيادا قازاقستان زور ەكونوميكالىق الەۋەتكە، مۇمكىنشىلىكتەرگە جانە ۇلكەن تەرريتورياعا يە. ءبىز ۇزاقمەرزىمدى نەگىزدە سەرىكتەستىككە دايىنبىز»، - دەدى ەلباسى.
اۆتور: مارلان جيەمباي
