نۇرعيسادان باتا العان دارىن يەسى

استانا. قازاقپارات - «ونەر - حالىقتىكى» دەيمىز، حالىق اندەرى مەن كۇيلەرىن، سونداي-اق قازاقستان كومپوزيتورلارىنىڭ تاماشا شىعارمالارىن تىڭداپ وسكەن ءبىز ءۇشىن ءوز جانىنان دا ءان-كۇي شىعارار تۇنبا دارىن يەلەرىنىڭ شىعارمالارى جات ەمەس.

«ولەڭ ايتساڭ دا جانىڭدى جەپ ايتاسىڭ» دەمەكشى، سول اندەردى جەرىنە جەتكىزەر جاقسى انشىلەر شىعارمانىڭ عۇمىرىنىڭ ۇزاق بولۋىنا، ناسيحاتتالۋىنا سەپتىگىن تيگىزەتىنى راس.

كۇي اتاسى قۇرمانعازى مەن ءان اتاسى ءبىرجان سال، اقانسەرى، ۇكىلى ىبىراي مەن سەگىز سەرى سىندى حالىق كومپوزيتورلارى قاي مەكتەپتەن ءدارىس الىپ، قاي كونسەرۆاتوريانى ءبىتىردى دەيسىز.

بۇلار اللانىڭ بەرگەن دارىنى بار ەرەك تۋعان شوقتىعى بيىك شىعارمالاردىڭ اۆتورى ءارى رۋحاني باي دۇنيەنىڭ يەلەرى. نوتا تانىماسا دا جۇرەكتەن، سەزىمنەن تۋعان دۇنيەلەرىن كەلەر ۇرپاققا جەتەر قۇندىلىعىمەن قوسا بىزدەرگە مۇرا ەتىپ قالدىرمادى ما؟!

راس، مۋزىكا ماماندارىنىڭ ايتۋىنشا ناعىز كومپوزيتور نەمەسە اۋەسقوي كومپوزيتور دەگەن ەگىز ۇعىم بار. ول شىندىق. كەيدە نوتا ساناپ جازعان شىعارمالارى جۇرەككە جەتپەي قالاتىن دا ناعىز كومپوزيتورلار بولادى. ال تابيعي تۋعان ءان مەن كۇيدىڭ جۇرەك قىلىن شەرتىپ، ارمانعا جەتەلەيتىنى بار.

ءومىر ءوز ارناسىندا اعىپ، كوپ جىلعى جيناقتاعان فيلوسوفيالىق ويلار بىردە ءان، بىردە جىر، ال كەيدە كۇمبىرلەگەن كۇي بولىپ ارنادان اسىپ جاتسا ايىبى نە؟!

قىدىرباي امانجولوۆتىڭ اندەرىن تىڭداعاندا مەنىڭ ءبىر تاڭعالعانىم، بۇل كىسىنىڭ شىعارمالارى باسقا كومپوزيتورلاردىڭ ءان-كۇيلەرىنە مۇلدە ۇقسامايدى. كەيبىر اۆتوردىڭ اندەرى بىرەر جولى حالىق انىنە، كەيبىر ىرعاعى تانىس اندەرگە ۇقساپ جاتادى عوي. مەنىڭ كوزىمنىڭ جەتكەنى - تۇنبا تابيعي دارىننىڭ ارقاسىندا شىققان دۇنيەلەردە اۆتوردىڭ ءوز قولتاڭباسى انىق بايقالادى ەكەن، وندا بوياما، اسىرەلەۋ، جاساندىلىق دەگەن مۇلدەم جوق. تازا جۇرەكتەن شىققان شىنشىل، تابيعي، تۇسىنىكتى، اسەرلى تۋعان تىڭ دۇنيەلەر. اۆتور وسىنىسىمەن دە باسقالاردان ەرەكشە، باسقا شىعارمالاردان اسەرلى.

ءبىز بۇگىن اتاعىنان ات ۇركەتىن ۇلكەن عالىم، قازاق مال شارۋاشىلىعى جانە جەمشوپ ءوندىرىسى عىلىمي زەرتتەۋ ينستيتۋتىنىڭ ءبولىم مەڭگەرۋشىسى، اۋىل شارۋاشىلىق عىلىمدارىنىڭ دوكتورى، اكادەميك قىدىرباي امانجولوۆتىڭ عىلىمي ەڭبەكتەرىمەن قوسا كوركەم دۇنيەسى-شىعارماشىلىعىنا توقتالعالى وتىرمىز.

ولاي بولسا ەكەۋارا بولعان اڭگىمەگە كەزەك بەرەلىك:

قىدىرباي امانجول ۇلى! ءسىز عىلىم جولىندا جۇرگەن ادامسىز. ءبىراق تابيعي دارىنىڭىزدىڭ ارقاسىندا تۋعان تاماشا تۋىندىلارىڭىز. قازاق راديوسىنىڭ اۋە تولقىنىندا جيىرما جىلدان استام ۋاقىت ناسيحاتتالىپ كەلەدى. ءبىز ەندى ارىدەن باستاساق. ءوزىڭىزدىڭ بالا كەزىڭىزدەگى ونەرگە قۇشتار بولۋىڭىزعا كىمدەردىڭ اسەرى بولدى. بىردەن ونەر يەسى بولۋعا نە بوگەت بولدى؟ قازىرگى ماماندىعىڭىزدى قالاي تاڭداپ الدىڭىز؟ وسى جايلى بىلگىمىز كەلەدى.

مەن  قىزىلدىڭ قۇمىندا 1948-جىلى 1- ساۋىردە دۇنيەگە كەلىپپىن. مەن بالا كەزىمنەن ءان مەن كۇيگە ، ادەبيەتكە قۇشتار بولىپ ءوستىم. مەن قازاقتىڭ زاڭعار جازۋشىلارىنىڭ شىعارمالارىن ءسۇيسىنىپ، زەردەلەپ وقىدىم. كوبىنە ۇلى اباي، جۇبان مولداعاليەۆ، تۇمانباي مولداعاليەۆ، قادىر مىرزاليەۆ، مۇقاعالي ماقاتايەۆ سىندى اقىنداردىڭ جىرلارىن كوپ وقىدىم. كەيىن احمەت بايتۇرسىنوۆ، ماعجان جۇمابايەۆتىڭ ەڭبەكتەرىنە قانىق بولدىم.

مەن بالا كەزىمدە كيىز ءۇيدىڭ ورتاسىنداعى وتتىڭ شوعىنا كۇيىپ، قۋىرىلىپ قالىپپىن. قاتتى كۇيگەننەن تاماق ىشپەي، اۋزىما سۋ تامىزىپ، سۇيىق تاماق بەرگەن ەكەن. ءبىر جىل وتكەننەن سوڭ اۋزىمدى اشىپ، تاماق ىشەم دەپ سۇراي باستاعان ەكەنمىن. اجەم ەشكىنىڭ سۇتىنە سالىپ ءبىر جىل ەمدەگەندە سول كۇيگەننەن تىرتىق تا قالماپتى.

مەكتەپتى بىتىرگەن سوڭ مەن ءال-فارابي اتىنداعى ۇلتتىق قازاقتىڭ /بۇرىنعى كيروۆ اتىنداعى/ ۋنيۆەرسيتەتىنىڭ جۋرناليستيكا فاكۋلتەتىنە قۇجاتىمدى تاپسىرماق ەدىم، ول زاماندا ەكى جىل اۋىل شارۋشىلىعىندا جۇمىس ىستەمەسەڭ قابىلدامايتىن. مەنى دەكانات ماڭايلاتپادى. سوندا: «سىزدەر دۇرىس ىستەمەي وتىرسىزدار، ماڭدايالدى جازۋشى بولار ءبىر ادامنان ايىرىلىپ وتىرسىزدار، مەن ناق ادەبيەتتىڭ وكىلى بولاتىن ادام ەدىم» دەپ ءوزىمنىڭ وكىنىشتى ويىمدى ايتىپ كەتتىم. قاتتى كوڭىلىم قالعان سوڭ اعامنىڭ اقىلىمەن قازاقتىڭ مال شارۋاشىلىق ينستيتۋىنا ەمتيحان تاپسىردىم.

ءبىر ورىنعا سەگىز بالا ەكەن. بارىنەن بەس دەگەن باعا الدىم، ال ورىس تىلىنەن ەكى الىپ قالدىم. ءبارى وتكەن سوڭ سول كەزدەگى ينستيتۋتتىڭ رەكتورى ءمۇسىلىم ءامىرحانوۆيچ ەرمەكوۆ پرورەكتور ءماجيت اقجانوۆيچ بايتۋرينگە: «مىنا بالامەن سويلەس، ءبارى بەس، ورىس تىلىنەن نەگە ەكى بولدى، قاي جاقتان كەلگەن بالا ەكەن» دەگەن ەكەن.

سودان مەنى شاقىرىپ الىپ: «سەن رەكتورعا راحمەتىڭدى ايت، كوپتىڭ ىشىنەن وسى بالادان بىردەڭە شىعادى» دەپ قامقورلىققا الىپ وتىر، - دەدى. - بىزدە ساباق ورىسشا. ورىستىڭ ءتىلىن ۇيرەن!» دەپ، وتباسى جاعدايىن، نەگە ورىس ءتىلىن بىلمەي قالعانىن سۇرادى. قاراقۇمدا جالعىز ورىس بولۋشى ەدى، ورىس تىلىنەن ساباق بەرەتىن. ونىڭ ءوزى ءوز ءتىلىن شالا بىلەتىن. مەكتەپتەن ورىس ءتىلىن بىلمەي شىققانىم راس ەدى. سونى ايتتىم. مەن ويلايمىن، سول كىسىلەردىڭ شاپاعاتى بولار، مەن ورىس ءتىلىن جەتىك ۇيرەنىپ، ساباعىمدى جاقسى وقيتىن بولدىم. مادەت اعزام ۇلى مەنىڭ عالىم بولعانىمدى كوردى.

مەنى ينستيتۋتتى بىتىرگەننەن كەيىن قازاقتىڭ مالشارۋاشىلىق عىلىمي-زەرتتەۋ ينستيتۋتىندا اسپيرانتۋراعا قالدىردى. سول جەردە اكادەميك قيلىباي ۇسەنوۆيچ مەدەۋبەكوۆ ماعان: «مەن سەنەن ۇلكەن ءۇمىت كۇتەمىن، وقۋىڭدى جاقسى بىتىرگەن ەكەنسىڭ» دەپ، ماسكەۋگە اسپيرانتۋراعا جىبەردى. ونىڭ ۇستىندە قارپىق قۇسايىن ۇلى قۇسايىنوۆ اناتولي كولەستراتوۆيچ راسلەكوۆ دەگەن كىسى ەكەۋى مال شارۋاشىلىق ينستيتۋتىندا مەنىڭ عىلىمي جەتەكشىم بولدى.

ماسكەۋدە دوكتورلىق ديسسەرتاتسيامدى جاقسى قورعادىم. عىلىم كانديداتى بولدىم. ونداعى عىلىمي جەتەكشىم - س س س ر مەملەكەتتىك سىيلىعىنىڭ لاۋرەاتى، اۋىلشارۋاشىلىق عىلىمىنىڭ دوكتورى، پروفەسسور سەرگەي ياكوۆليەۆيچ دۋدين بولاتىن. الماتىعا كەلگەن سوڭ شامالى ۋاقىتتان كەيىن عىلىم دوكتورى بولعان جايىم بار.

ال ەندى عىلىمعا قوسقان ۇلەسىڭىز دەگەندە نە ايتار ەدىڭىز؟

ەندى، مىنە، عىلىم دوكتورى، پروفەسسورمىن. اۋىل شارۋاشىلىعى عىلىم اكادەمياسىنىڭ اكادەميگىمىن. رەسەي اۋىل شارۋاشىلىق اكادەمياسىنىڭ قۇرمەتتى دوكتورىمىن. قىتاي اۋىلشارۋاشىلىق عىلىم اكادەمياسىنىڭ قۇرمەتتى پروفەسسورىمىن. عىلىمدا سىڭىرگەن ەڭبەگىم ءبىرشاما بارشىلىق. 350 دەن استام عىلىمي ەڭبەگىم بار. جيىرما شاقتى كىتابىم بار. وتىزدان استام كىتاپشام بار. وتىزعا جۋىق وندىرىسكە ۇسىنىسىم بار. كىتاپتارىمنىڭ اتتارى ەتتى ءىرى قاراعا بايلانىستى «ەتتىڭ ساپاسى»، «تەحنولوگيا پرويزۆودستۆا ي ستاندارتيزاتسيا گوۆيادينى»، «ەتتى ستاندارتيزاتسيالاۋ» دەپ اتالادى. تاعى ءبىر كىتابىم - «ەتتى العاشقى وڭدەۋ» دەپ اتالادى.

قازىرگى كۇندە ەت ساپاسى جونىندەگى قازاقستانداعى بەلگىلى عالىممىن. قازاقستان رەسپۋبليكاسى اۋىلشارۋاشىلىق مينيسترلىگىندە قۇرىلعان مالشارۋاشىلىعى سالاسى بويىنشا تەحنيكالىق كەڭەستىڭ مۇشەسىمىن. دوكتورلىق ديسسەرتاتسيا قورعايتىن ءوزىمىزدىڭ ينستيتۋتتا جيىرما بەس عىلىم دوكتورىنان تۇراتىن ۇلكەن ءتوراعانىڭ ورىنباسارى بولىپ قىزمەت اتقاردىم.

قىرعىز ەلىندە دوكتورلىق ديسسەرتاتسيا قورعايتىن كەڭەستە ون جىل مۇشە بولدىم. كوپتەگەن ماماندار دايىنداۋعا ءوز ۇلەسىمدى قوستىم. قازىرگى تاڭدا ءوز قولىمنان شىققان التى عىلىم كانديداتى بار. قازىر بىرنەشە عىلىم دوكتورلارىن قورعاۋعا دايىنداتىپ جاتىرمىن. قازاق مال شارۋاشىلىعى جانە جەم-ءشوپ ءوندىرىسى عىلىمي زەرتتەۋ ينستيتۋتىنىڭ مال ازىعىن ءوندىرۋ جانە ستاندارتيزاتسيالاۋ ءبولىمىنىڭ مەڭگەرۋشىسى بولىپ قىزمەت ەتۋدەمىن.

بۇل ەندى ءسىزدىڭ كوپ تەر توگۋدىڭ ارقاسىندا جەتكەن جەتىستىكتەرىڭىز، ەڭبەگىڭىزدىڭ جەمىسى دەسە دە بولعانداي. نەگىزگى تاقىرىبىمىزدى ونەرگە قاراي بۇرساق. ونەر اتا-بابانىڭ قاسيەتىنەن قونادى دەيمىز. ءسىزدىڭ بالا كەزىڭىزدەن ونەرگە قۇشتارلىعىڭىز تولىسقان شاعىڭىزداعى ءان-جىر، كۇمبىرلەگەن كۇي بولىپ مازاڭىزدى الىپ، ەرىكسىز قولىڭىزعا دومبىرا العىزعانى راس. سونىڭ سىرى نەدە؟ ساباقتاي وتىرساڭىز!

مەنىڭ ءۇش ۇيىقتاسام دا ويىمدا بولماعان عاجايىپ قۇبىلىس. ويدا جوقتا قىرىق بەس جاسىمدا ون ەكى جىل بۇرىن قايتىس بولعان اكەم تۇسىمە كىردى. سول كەزدە جۇرەكتەن اۋىرىپ قينالىڭقىراپ ءجۇر ەدىم. قينالعانىمدى سەزدى مە نەمەسە كوڭىلىن باسقا جاققا بۇرسىن دەدى مە، «بالام، قولىڭدى جاي، مەن باتا بەرەيىن، انىڭە سال تولعانا، ساعان اللاتاعالا جاس جىگىتتىڭ كۇشىن بەرەدى» دەپ اق باتاسىن بەردى.

سول باتانى العاننان كەيىن قولىم قالاي دومبىراعا بارا بەرگەنىن ءوزىم دە بايقاماي قالدىم. ناعاناي بابام ايان بەرگەن سوڭ كۇي شىعارا باستادىم. اندەرىم شىعا باستاعاندا بىرگە وسكەن دوستارىم «ءومىرى ءان ايتپايتىن، كۇي شەرتپەيتىن، بۇل قالاي بولدى» دەپ تاڭعالىستى.

مەن ينستيتۋتتا وقىپ جۇرگەندە احمەت جۇبانوۆتىڭ جيەنى دومبىرادا ويناۋدى ۇيرەتكەن بولاتىن. سونىڭ پايداسى بولار، مەن ءان شىعارا باستادىم.

اكەم دومبىرادا ەركىن وينايتىن. انام ەكەۋى حالىق اندەرىن شەبەر ورىندايتىن. شەشەم قىلقوبىزدا ويناۋشى ەدى. ناعاشى جۇرتىمدا ءمامىش دەگەن اتامىز ايتىسقان ادامىن جەڭبەي قويمايدى ەكەن. اعام قايىربەك تە ويىنان ءان شىعاراتىن. بيجان دەگەن بابامىز وتە ونەرلى كىسى بولعان ەكەن. ول كىسىنى كورگەندەر «اسقارداي بيىك تۋعان ازامات» دەپ كەرەمەت باعا بەرگەن ەكەن. سول كىسىنىڭ سوڭىنان كىلەڭ جاقسى-جايساڭدار ەرگەن ەكەن. سول كىسىلەردىڭ ونەرىنىڭ ۇشقىنى بىزگە دارىعان عوي...

ەڭ العاشقى شىعارعان ءانىڭىز؟

العاش تەبىرەنىپ وتىرىپ شىعارعان ءانىم - «ادال جار» دەپ اتالادى. ءاننىڭ ولەڭىن دە ءوزىم جازىپ ورىنداپ ءجۇردىم. كۇندەردىڭ ءبىر كۇنىندە ساعاتبەك مەدەۋبەكوۆ دەگەن جىگىتپەن تانىستىم. «مەن ءسىزدىڭ ءانىڭىزدىڭ ماتىنىنە وزگەرىس كىرگىزىپ، اۆتورى بولايىن» دەپ قولقا سالدى. ءسويتىپ ءانى مەنىكى، ءسوزى ساعاتبەكتىكى بولىپ، ول ءاندى تۇڭعىش ءانشى رامازان ستامعازيەۆ ورىندادى، وعان سەبەپشى بولعان كۇيشى ەرمۇرات ۇسەنوۆ بولاتىن. مەنىڭ اندەرىم مەن كۇيلەرىمدى العاش نوتاعا تۇسىرگەن دە سول كىسى.

ەرمۇرات «اعا، ءسىز تەگىن ادام ەمەس ەكەنسىز» دەپ ەلەپ، انشىلەردى تاۋىپ بەردى. ءبىراز ءان-كۇيلەرىمنىڭ نوتاسىن كومپوزيتور تەمىر تايبەكوۆ پەن كۇيشى وتەگەن ءجۇسىپوۆ تۇسىرگەن بولاتىن. «ادال جار» ءانىن كەيىن ساكەن قالىموۆ انسامبلمەن ورىنداپ، قازاق راديوسىنىڭ التىن قورىنا جازدى.

اۋە تولقىنىنان ناسيحاتتالا باستادى. «التىن شىققان جەردى بەلدەن قاز» دەگەندەي، ءبىر ءان شىققان سوڭ شابىتتانا ءتۇسىپ، ۇزدىكسىز ىزدەنىستىڭ ارقاسىندا 300 گە جۋىق شىعارمام دايىن بولدى، كوبىسى نوتادا.

ءسىز «نۇرعيسادان باتا الدىم» دەدىڭىز، دايىن پارتيتۋرالار جايلى ايتا وتىرساڭىز!

حالىق قاھارمانى نۇرعيسا تىلەنديەۆتىڭ باسشىلىق جاساۋىمەن «وتىرار سازى» وركەسترىنىڭ جىگىتتەرى توعىز پارتيتۋرانىڭ دايىن بولۋىنا كومەك ەتتى. كۇيلەردىڭ كوپشىلىگىن نۇراعاڭ ءوز ۇيىندە تىڭدادى، وتە جوعارى باعالادى. سونىڭ ىشىندە ەرەكشە توقتالعانى- «دومالاق انا» كۇيى. ونىڭ الدىندا كونسەرۆاتوريانىڭ، پەتر چايكوۆسكي اتىنداعى مۋزىكا ۋچيليشەسىنىڭ ستۋدەنتتەرى ورىنداپ جۇرەتىن.

سول كۇيدى نۇراعاڭنىڭ الدىندا وتەگەن ءجۇسىپوۆ وينادى. كۇيدىڭ ءتورت-بەس تاكتىسى وينالعاننان كەيىن شتريحىنا باسا كوڭىل اۋداردى. وتەگەننىڭ قولىنان دومبىرانى الىپ «مىنانى نوتاعا تۇسىرگەن كىم؟» دەدى. سوندا وتەگەن «مەن» دەدى. «سەن بولساڭ نەگە شتريحىن دۇرىس قويماعانسىڭ؟» دەپ كەيىدى.

سودان كەيىن «ناعاناي» دەگەن كۇي ورىندالدى. بۇل كۇي قوڭىرات بابامىزعا ارنالعان كۇيىم ەدى. بۇنىڭ دا شتريحىن جوندەدى. كۇيدى تىڭداپ بولىپ، «وسىنداي كۇيدى دە ادام شىعارادى ەكەن» دەپ تاڭعالدى. وسىدان سوڭ «جالعىز اققۋ» كۇيى ورىندالدى. نۇراعاڭ «سەن ءوزىڭ وينامايسىڭ با؟» دەپ ماعان بۇرىلدى.

الدىندا دايىندالىپ كەلگەم، جۇرەكسىنگەنىمدى بىلدىرمەي، «ونەر ادامدارىنىڭ الدىندا كۇيلەرىمدى ويناماۋشى ەدىم» دەپ قۇتىلدىم. ول كىسى ماعان اڭ-تاڭ بولىپ قارادى. «جالعىز اققۋعا» ەشقانداي تۇزەتۋ ەنگىزگەن جوق. ول كىسىگە ۇنادى. «كەلىنشەگىڭ ولگەن جوق پا ەدى؟» دەپ سۇرادى.

«جوق، امان-ساۋ» دەدىم. سودان كەيىن ويلانىپ ورنىنان تۇردى دا: «ماەسترو، - دەدى، - قىز بالا بولساڭ بەتىڭنەن سۇيەر ەدىم، جىگىت بولعان سوڭ سەنىڭ ماڭدايىڭنان سۇيەيىن»، - دەپ، ماڭدايىمنان ءسۇيدى. وسىدان باستاپ ولە-ولگەنشە اعا-ىنىدەي جاقسى ارالاستىق، مۋزىكا الەمى جايلى كوپتەگەن ماعلۇماتقا قانىق بولدىم.

ول كىسى: «كۇي - قۇدايدىڭ كۇبىرى» دەپ ۇنەمى ايتىپ وتىراتىن. ءبىر جولى ساياجايدا دەمالىپ جاتىپ: «اينالايىن، قىدىرباي! سەنىڭ قاي جەردە وسى شىعارمالاردى شىعاراتىنىڭدى، تابيعاتىڭدى كورۋگە كەلدىم. سونشالىقتى اسەم ءان-كۇي بوستان-بوسقا تۋمايدى عوي. سەنى بۇگىننەن كەيىن «اۋليە كومپوزيتور» دەپ اتايمىن. ويتكەنى ساعان تۇسىڭدە ايان بەرگەننەن كەيىن وسىلاي دەۋ ورىندى، سەن حالىق كومپوزيتورىسىڭ» دەدى.

ودان كەيىن نۇراعاڭ «استانا كۇنىنىڭ تويىن اتقارىپ كەلەيىن، سوسىن سەنىڭ كونسەرتىڭدى ۇيىمداستىرىپ، بەلگىلى كومپوزيتورلارعا تىڭداتامىن، تورەلىگىن سولار ايتار، وسىنداي كومپوزيتور بار دەپ بۇكىل قازاق ەلىنە جاريا ەتەمىن، ونەرىڭدى سىناتامىن، ولار قالاي باعالار ەكەن» دەپ ۋادە بەرگەن.

استانادان كەلگەن سوڭ ءبىزدىڭ ساياجايدا دەمالىپ جاتقاندا نۇراعاڭ اۋىرىڭقىراپ تۇرىپ، «مەنى ۇيگە جەتكىز!» دەدى. ءتۇن ورتاسىندا ۇيىنە جەتكىزدىم، سوڭعى كورگەنىم سول بولدى. اعاي قايتىس بولدى. الدىن الا جوسپارلاعان شىعارماشىلىق كەشىم وتپەي قالدى.

حالىق قاھارمانى نۇرعيسا تىلەنديەۆتىڭ قايتىس بولعانى 1998-جىل ەكەن، سودان بەرى ءوز شىعارمالارىڭىزدى ناسيحاتتاي الماۋىڭىزعا نە سەبەپ؟

مەن، بىرىنشىدەن، عىلىم سوڭىنا تۇسكەن اداممىن. شىعارمالارىمنىڭ كوبىرەك ناسيحاتتالماي كەلگەنى دە سودان. ءبىراق ۇلكەن ساحنادا ونەرىمدى كورسەتپەگەنمەن ءان-كۇي شىعارۋدى بىردە ءبىر توقتاتقان جوقپىن، قايتا بۇرىنعىدان دا كوپ جاڭا اندەر ومىرگە كەلدى. ءبىر مۇقاعالي ماقاتايەۆتىڭ ماتىنىنە الپىس ءان شىعارىپپىن. ول مەنىڭ مۇقاعالي جىرلارىنىڭ مەنىڭ ويىممەن استاسقاندىعى بولار.

ءبىر جىلدارى ورتانشى قىزىم بالجان قوستانايلىق جىگىتكە كۇيەۋگە شىعىپ تويعا باردىق. سول جەردە ءانشى تۇلكىبەك ىرىسماعامبەتوۆ دەگەن ءانشى جىگىتپەن تانىسىپ، ونىڭ ورىنداعان اندەرى مەنىڭ كوڭىلىمنەن شىققان سوڭ جيناعىمدى بەرىپ، جيىرما شاقتى ءانىمدى ورىنداتتىم. ءساتتى شىقتى.

سول تويدا اقىن اقىلبەك شاياحمەتوۆپەن تانىسىپ، سول اقىنعا عانا ءبىراز اندەرىمە ارنايى ءسوز جازدىردىم. سونىمەن جيىرما ءانىم اقىلبەكتىڭ سوزىنە جازىلدى. اقىلبەك - ورەسى، تالعامى جوعارى، وتكىر جازاتىن اقىندارىمىزدىڭ ءبىرى.

مەنىڭ «ناعاناي»، «جالعىز اققۋ»، «ءاز اعا»، «ەركىن دالا ەركىڭ قايدا» كۇيلەرىمدى ەرمۇرات ۇسەنوۆ ورىنداسا، «اناما» كۇيىن وتەگەن ءجۇسىپوۆ، «جەتىم قوزى»، «ەسىمدە»، «اققۋ ءانى» اندەرىمدى سۇلۋشاش نۇرماعامبەتوۆا، «تۋعان جەر» ءانىن نۇرعالي ءنۇسىپجانوۆ، ال «بيبىگۇلگە»، «ساعىندىم، اكە، ساعىندىم» اندەرىن قايرات ءادىلوۆ، «نەگە سەنى ۇناتتىم» ءانىن نازىم ساعالوۆا، «ەي باۋىرىم» ءانىن ينديرا ماقايەۆا ورىنداعان.

مەنىڭ ءان-كۇيلەرىمنىڭ جيناقتارى «ءان- اققۋ»، «ءان - سامال»، «ءان-اينا» دەگەن اتپەن جارىققا شىقتى.

ءسىزدىڭ شىعارعان تۋىندىلارىڭىز بىرنەشە كونسەرتكە جەتەرلىك. حالىقپەن قاۋىشاتىن كۇن دە الىس ەمەس شىعار؟

ارينە، ون بەس ءان مەن بىرنەشە كۇيدىڭ پارتيتۋرالارى دايىن تۇر، ءوز ويىمشا «وتىرار سازى» وركەسترىمەن ءبىر جاقسى كونسەرت بەرگىم كەلەدى. ازىرشە تۋعان جەردەن باستاسام دەپ ويلايمىن. مەنىڭ اندەرىمدى ورىندايتىن جاستار كوبىرەك شىقسا الداعى ۋاقىتتا وسى ءىستى تۇبەگەيلى قولعا السام دەيمىن.

قىدىرباي امانجول ۇلى! ساليقالى دا ماعىنالى اڭگىمەڭىزگە راحمەت!. سىزگە ىسكە ءسات دەگىم كەلەدى.

قازاقستاننىڭ ەڭبەك سىڭىرگەن قايراتكەرى،

ق ر مادەنيەت قايراتكەرى،

قازاقستان جۋرناليستەر وداعى سىيلىعىنىڭ لاۋرەاتى

التىن يمانبايەۆا