اۆتوتۇراقتا «جايعاسقان» تۇيە الەۋمەتتىك جەلىدە تانىمال بولدى - كەسكىن

استانا. قازاقپارات - ەكاتەرينبۋرگ قالاسىنداعى «گرينۆيچ» ساۋدا ورتالىعىنىڭ كوپدەڭگەيلى اۆتوتۇراعىنا بەلگىسىز ازامات تۇيەسىن شوكتىرىپ كەتتى.

الەۋمەتتىك جەلىلەرگە تاراعان فوتودا جانۋار مۇگەدەكتەرگە ارنالعان ورىنعا جايعاسقان. تۇيەسىن اۆتوتۇراققا توقتاتقان ەر ازامات اراب حالقىنا ءتان كيىنگەن. ەگەر دە بۇل ورىندى 3 ساعاتتان ارتىق ۇستاپ تۇرار بولسا، تۇيەنىڭ يەسىنە اۆتوكولىك يەلەرى سەكىلدى اقى تولەۋى ءتيىس، دەپ حابارلايدى Sobitiy.ru.

«تۇراققا قاتىستى ايتار بولساق، بىزدە قانداي كولىكپەن تۇراقتاۋعا بولمايتىنى جازىلماعان. سول سەبەپتى، ەگەر تۇيەنى كولىك قۇرالى ساناسا، نە ىستەيمىز. دەمەك، تۇيە دە كولىك»، - دەيدى ساۋدا ورتالىعىنىڭ جارناما ءبولىمىنىڭ باسشىسى يليا كليۋجين.

سوڭىرا، تۇيە «كاپريول» ات سپورتى كلۋبىنا تيەسىلى ەكەنى انىقتالدى. ۆاسيا ەسىمدى تۇيە بەينەكليپ ءتۇسىرۋ ماقساتىندا الدىرىلعان بولىپ شىقتى. ساۋدا ورتالىعىنىڭ اۆتوتۇراعىندا ءدال وسى ۋاقىتتا ءتۇسىرىلىم جۇرگەن كورىنەدى. ال شىن مانىندە، «ۆاسيانىڭ» موينىنا ەشكىم ءمىنىپ كەلمەگەن، ونى ارنايى ماشينامەن اكەلگەن ەكەن، دەپ جازادى e-islam.kz.