بەيبىت سارىباي. اپام قاتىرادى، ءا
- وسى اقىن- جازۋشى، ءانشى، جىرشىنى، اكتەردى الدەقانداي قىلىپ اقىل سۇرايسىڭدار دا وتىراسىڭدار. نە تۋرالى اڭگىمە بولسا دا سولاردى شاقىراسىڭدار. سوندا ەلدەگى ەسى دۇرىس سولار دا، باسقالارىمىز ميعۇلامىز با؟ ەڭ قۇرىماسا ادامنىڭ دەنساۋلىعى جايىنداعى تاقىرىپقا ءوزىمىزدى اسىقپاي سويلەتىڭدەرشى. جوق، ەندى عانا بىردەڭەنى ايتىپ باستاي بەرەيىن دەسەڭ جۇرگىزۋشى: - ءسوزىڭىز اۋزىڭىزدا، ەندى مىنا جاعدايعا نازار اۋدارايىقشى، - دەپ ميكروفوندى تارتىپ الىپ، تاعى سول "قايراتكەرلەرىڭدى" سويلەتىپ قويادى. اينالايىندار- اۋ، نۇرلان ەسپانوۆ گينەكولوگيا تۋرالى نە بىلەدى؟
- اپاي، ءسوزىڭىز اۋزىڭىزدا، ناقتى نە ايتايىن دەپ ەدىڭىز؟
- اۋزىمدا ەمەگەندە، قايدا دەيسىڭ؟ . نۇرلان اۋزىمدا. وي، نۇرلان دەپپىن عوي، ءسوزىم اۋزىمدا. كەشىر، اينالايىن. ءوزىڭ دە كىشكەنە ءسوزدى بولە بەرمەي، تىڭداشى. سول عوي اينالايىن، اركىم ءوز سالاسىنا قاتىستى ايتسىن دا. سەنى تانىپ قالىپ ايتىپ جاتقانىم عوي.
- اپاي، بۇعان مەنىڭ نە قاتىسىم بار؟ ماعان نە ءۇشىن ايتىپ جاتىرسىز؟
- بىلمەيمىن عوي، سەنى ءبىر جەردەن كورگەن سياقتىمىن.
- اپاي كەشىرىڭىز، مەن دەگەن جازۋشىمىن، جازامىن. تەلەبىزىردە ەشقانداي قاتىسىم جوق. ءبىر- ەكى رەت شاقىرعاسىن، ءوزىڭىز قۇساپ ءبىر- ەكى توكشوۋعا قاتىسقانمىن.
- ە- ە- ە، ەندى ەسىمە ءتۇستى. سەنى سونداي ءبىر جەردە قوناق بولىپ، اڭگىمەگە ارالاسىپ وتىرعانىڭدا كورگەن ەكەنمىن عوي. ايتپاقشى، سەنىڭ دە قاتىسپايتىن تاقىرىبىڭ جوق.
- قويىڭىز اپاي، مەنى ادەبيەتكە، مادەنيەتكە، رۋحانياتقا جاقىن تاقىرىپتارعا شاقىرادى. كەيدە راس توي تاقىرىبى سياقتى جەڭىل تاقىرىپتارعا دا شاقىرادى. بارمايىن دەسەم، «اۋليە بولماشى، نەمەنەگە كىسى بولا قالعاسىڭ» دەيدى. جالپىسىندا كەيبىر قىزدار سياقتى، ەكى- ءۇش رەت قيىلىپ ايتسا، كەز- كەلگەن وتىنىشكە كونە كەتەتىنىم بار.
- جاقسى، اينالايىن. سول سەنى قايتا- قايتا شاقىرىپ جۇرگەن دوستارىڭا ايت، ءبىزدى دە شاقىرسىن. ءبىز دە سويلەي الامىز. ءسوزدىڭ ءتۇبىن تۇسىرەمىز.
- جاقسى، اپاي، ايتايىن. ساۋ بولىڭىز.
- ءاي سەن مەنەن قۇتىلۋعا اسىعىپ، وتىرىكتەن وك، وك دەگەنىڭدى قوي.
- جوق، اپاي مەن سىزدەن قۇتىلۋعا اسىعىپ تۇرعان جوقپىن.
- شاقىرتاسىڭ با؟
- شاقىرتامىن.
- نەڭمەن شاقىرتاسىڭ؟ . سەن مەنىڭ ءنومىرىمدى العان دا جوقسىڭ عوي.
- ايتىڭىز.
- 8775
***
اپايدىن ارەڭ قۇتىلدىم. وسى اڭگىمەنى ءبىر داستارحان باسىندا ايتىپ ەدىم، توكشوۋدا قىزمەت ەتەتىن دوسىم:
- ويباي ول كىسىنىڭ ءنومىرىن بەر بىزگە. وتە كەرەك، - دەدى. بەردىم. بۇل اڭگىمە سونىمەن ۇمىتىلعان. ءبىر كۇنى سول دوسىم حابارلاسىپ تۇر.
- وسىندايدا وسىنداي كۇنى ءتۇسىرىلىم. 10 مينۋت ەرتەرەك كەل. گريمعا كىرەسىڭ.
- تاقىرىپ قانداي ەدى؟
- «قالىڭ قالاي، قازاق ءتىلى».
- اكەم- اۋ، مەنىڭ نە قاتىسىم بار بۇل تەماعا؟
- قاتىسىڭ بار.
- دوسىم كەشىرشى، ءدال وسى جولى ۇيات.
- جوق سەنىڭ انا اپايىڭنان باستالعان تەما عوي.
***
ايتىلعان كۇنى حاباردىڭ تۇسىرىلىمىنە باردىق. باياعى مەنىمەن تانىسقان اپاي بالە شىعاردى.
- ءبىزدى نەگە ءوز سالامىزعا قاتىستى تاقىرىپتارعا شاقىرمايسىڭدار؟ قازاق ءتىلىنىڭ قالىن ءبىز قايدان بىلەمىز؟ . بىزدەن قازاقتاردىڭ ءحالىن سۇراڭدار. دەنساۋلىعى قالاي دەپ. مىنا تاقىرىپقا نە قاتىسىمىز بار؟
- اپاي، اناۋكۇنى ءوزىڭىز رەنجىپ وتىر ەدىڭىز عوي. دەنساۋلىق تۋرالى تەماعا ونەرپازداردىڭ نە قاتىسى بار دەپ؟ . سول سياقتى ءسىزدى دە وزىڭىزگە قاتىسى جوق تەماعا شاقىرىپ وتىرمىز. بۇنى توك شوۋدىڭ تابيعاتى دەيدى. ءارتۇرلى مامانداردى قاتىستىرا وتىرىپ تاقىرىپتى اشادى.
- ا- ا- ا، اينالايىن، - دەپ اپاي جۋاسىدى.
سودان نە كەرەك، حابار باستالدى. قازاق ءتىلى قاي سالادا اقساپ جاتىر، قاي سالادى ىلگەرىلەۋ بار دەگەن سياقتى وي قوزعالدى. اپايمەن بىرگە كەلگەن 10 دارىگەر ەشكىمدى سويلەتپەدى. ءبارى شەشەن ەكەن. ماقال- ماتەلدەتىپ تۇرىپ جىبەردى دەيسىڭ. جۇرگىزۋشى ەشقايسىسىن توقتاتا المادى.
- اينالايىندار، وسى ۋاقىتقا دەيىن سويلەتپەي كەلدىڭدەر عوي، ەندى بۇگىن سويلەيمىز.
- جۇرگىزۋشى بالا، سەن دە ءسوزىڭىز اۋزىڭىزدا دەپ ايتا بەرمە. بۇيتە بەرسەڭ اۋزىمىزداعى ءسوزىمىزدى گينەكولوگيالىق ايماققا سالىپ الىپ كەتىپ جۇرەرمىز.
سودان اپايدىڭ ايتۋى بويىنشا سولاردى سويلەتتىك تە وتىردىق. تەما قازاق ءتىلىنىڭ عانا ەمەس، ۇلتتىڭ جاعدايىن، دەنساۋلىعىن دا تەرەڭ قوزعادى. سونىمەن سول حاباردىڭ سوڭىندا ءبىر ەمحانادان كەلىپ وتىرعان ون دارىگەر ون تىلەك ايتتى. ءار دارىگەر ءوز سالاسىمەن بايلانىستىرا ايتتى.
***
ستاماتولوگ باستادى: «ءتىسىڭ باردا تاس شاينا، ءتۇس كەتكەن سوڭ اس قايدا» دەمەكشى، تىستەرىڭىزدى كۇتىپ ۇستاڭىزدار.
رەنتگەنولوگ: ساناسىندا ساڭىلاۋى بار، كەۋدەسىندە ساۋلەسى بار ۇرپاعىمىز كوپ بولسىن.
لور: مۇرنىڭ باردا ءبىر ءسىڭبىر دەگەندەي، ءبىز دە ءبىر تىلەگىمىزدى ايتايىق. اۋىزعا نە كەلسە، سونى ايتقاننان ساقتاسىن. ءبىر-اق تىلەك ايتامىن، اباي اتامىز ايتقانداي: قۇر ايقاي باقىرعان.. قۇلاققا ءان بە ەكەن؟. ەلباسىمىزدىڭ ارقاسىندا جاقسى اندەردى تىڭداپ جۇرە بەرەيىك.
تراۆماتولوگ: «باس جارىلسا بورىك ىشىندە، قول سىنسا، جەڭ ىشىندە» دەگەن. دۇشپاندارىمىزدىڭ الدىندا بىرلىگىمىزدى ساقتايىق. باسقاسى بىردەڭە بولار.
پەدياتر: «بالالى ءۇي بازار، بالاسىز ءۇي قۋ مازار» دەگەن عوي بابالارىمىز. سول بالاردىڭ دەنساۋلىعى ۇلتتىڭ بولاشاعى. وزدەرىڭىزدى كۇتپەسەڭىزدەر دە بالالارىڭىزدىڭ دەنساۋلىعىن ءارقاشان نازاردا ۇستاڭىزدار.
ۋرولوگ: مەن «بۇيرەكتەن سيراق شىعارماي»، جوعارىداعى تىلەكتەرگە قوسىلامىن. ي تاك تا كوپ سويلەپ كەتتىك. ءبارىبىر مونتاجداپ تاستايسىزدار.
وسىلاي شەتتەرىنەن شەشەن دارىگەرلەر تىلەكتى جىبەردى دەيسىزدەر. ءبىر كەزدە اپاي ءسوز الدى دا:
- مەن وسى ەمحانانىڭ باس دارىگەرىمىن، قىزمەتكەرلەرىم ايتقان تىلەكتى ءوزىم قورىتىندىلايمىن. مەنىڭ دە تىلەگىم ءوز سالاما بايلانىستى. مەن گينەكولوگپىن...- دەدى.
ءبارىمىز شوشىپ كەتتىك... وپەراتور كامەرانى ءوشىرىپ تاستادى. «ءبارىبىر قىسقارىپ كەتەدى»، دەپ ويلاسا كەرەك. اپام بۇلدىرەتىن بولدى دەپ مەن وتىرمىن. نە دە بولسا «تاڭنان سالسا كەشكە وزعان» دەپ باستايتىن شىعار دەپ وتىرعام.
جوو- و- و- وق، كەشىرىپ قويىڭىز، اپام سونشالىقتى ءبىز ويلاعانداي ەشتەڭە دە بۇلدىرگەن جوق. وتە كەرەمەت تىلەك ايتتى. سونداعى تىلەگى نە دەيسىزدەر عوي. مىناۋ:
- «جال- قۇيرىعى قابا دەپ،
جابىدان ايعىر سالماڭىز.
قالىڭ مالى ارزان دەپ،
جامان قاتىن الماڭىز.
جابىدان ايعىر سالساڭىز،
جاۋعا مىنەر ات تۋماس.
جامان قاتىن الساڭىز،
توپقا تۇسەر ۇل تۋماس»، - دەپ دوسپانبەت بابامىز ايتقانداي، ءار قازاقتىڭ جىگىتىنە تەكتى جەردەن قىز الۋدى بۇيىرتسىن دەدى. دۋ قول شاپالاق. جارىق ءوشىرىلدى. اپام قاتىرادى، ءا.
