ادامدار قورقاتىن ءۇش نارسە

استانا. قازاقپارات - كەز كەلگەن ادام ومىرىندە ءبىر رەت بولسىن اياعىن شالىس باسىپ، قاتەلىك جىبەرەدى. وسى قاتەلىگىنەن ساباق السا دا، جۇرەگىنىڭ تۇبىندە قورقىنىش قالىپ قويادى.

كوپكە دەيىن سول قورقىنىشتان ارىلا الماي جۇرەدى. بارلىعىنا تەك ءوزىمىز عانا قول جەتكىزدىك دەپ ايتۋ قيىن. ويتكەنى ءومىر اتتى ۇزاق جولدا جولىقتىرعان ادامدارىمىز بىزگە تاجىريبە ءۇشىن جىبەرىلگەن. بار ماسەلە ونىڭ قانداي تاجىريبە ەكەندىگىندە. ارتىڭىزعا قاراپ، وتكەن ءومىرىڭىزدى ەسىڭىزگە ءتۇسىرىڭىزشى. جولىقتىرعان ادامدارىمىزدىڭ ءبىرى ءبىزدى رەنجىتسە، ەكىنشىسى باقىتقا بولەگەن. ولاردىڭ ءارقايسىسىنىڭ وزىندىك ورنى مەن قۇنى بار.

فەدور ميحايلوۆيچ دوستويەۆسكي ءبىر كەزدەرى «ادامداردىڭ كوبىسى قورقاتىن ءۇش نارسە بار: سەنىم ارتۋ، شىندىقتى ايتۋ، شىنايى بولۋ» دەپ ايتقان ەكەن. ول ءوز زامانىندا ءومىر سۇرە تۇرا بۇگىنگى قوعامنىڭ قورقىنىشىن كورە بىلگەن سياقتى.

1. بىرەۋگە سەنىم ارتۋعا قورقامىز

مەيلى جاس بولايىق، كارى بولايىق، تالاي ساتقىندىقتى باستان كەشىرىپ، كوپ نارسەدەن كوڭىلىمىز قالعانى راس. ءومىر بىزگە ءوز ساباعىن ۇيرەتتى. ۋاقىت وتكەن سايىن ادامدارعا سەنىم ارتۋ قيىنداي ءتۇستى. جاسىمىز ۇلعايعان سايىن ادامنىڭ شىنايى بولمىسىن بىردەن تانىپ، ويىن ايتپاسا دا سەزەتىن دارەجەگە جەتتىك. ءيا، ارام پيعىلى بار ادامدى كورىپ تۇرىپ، ۇندەمەي قالۋ وتە قيىن. ءبىراق مۇنىڭ بارلىعى ءبىزدى دانا بولۋعا باۋليدى.

ءبىزدىڭ جانىمىزدىڭ تانىمىزدەن ءبىر ايىرماشىلىعى بار. وسىعان دەيىن ءتان جاراسا جازىلسا دا، جان جاراسىنىڭ جازىلمايتىندىعى تۋرالى كوپ ەستىدىك. جان جاراسىنىڭ ماڭگىلىك ەستە قالاتىنى دا ءجيى ايتىلادى. ءبىراق جانىمىزدىڭ تاماشا قاسيەتى بار. ول - ءوزىن تىرىلتە ءبىلۋى. ادامداردان قاشىپ، قوعامنان الشاقتاۋدىڭ قاجەتى جوق. ولارعا ءوزىمىزدى تانۋعا، جۇرەگىمىزگە ءۇڭىلىپ، كوڭىلىمىزدەگى سىردى ۇعۋعا مۇمكىندىك بەرەيىك. ياعني بەيتانىس ادامدارعا جۇرەگىمىزدى اشۋعا قورىقپايىق. كەشەگى بەيتانىس ادام، ەرتەڭ بولاشاق جارىمىزعا، ادال دوسىمىزعا اينالۋى مۇمكىن ەمەس پە؟ ! ءبىراق بۇل كەز كەلگەن ادامعا اعىنان جارىلۋ دەگەن ءسوز ەمەس، بىرەۋمەن تىلدەسكەندە شىنايى بولۋعا ۇيرەنۋ.

2. ءبىز شىندىقتى ايتۋعا قورقامىز

ءارقايسىمىز كىشكەنتاي كەزىمىزدە ءبىر رەت بولسىن وتىرىك ايتىپ، ونىڭ ارتى جاقسىلىققا اپارمايتىنىن بىلگەنبىز. وتىرىكشىنىڭ ەشۋاقىتتا جولى بولعان ەمەس. ول وزگەنى الداپ، الا ءجىبىن اتتاپ، تىنىش ءومىرىنىڭ شىرقىن بۇزادى نەمەسە ىشتەي «كىم، قاشان ءبىلىپ قويار ەكەن؟ » دەپ قىنجىلۋمەن بولادى. ءبىز شىندىقتى سيرەك ايتامىز، ايتساق، جارقىن بولاشاعىمىزعا كەدەرگى جاسايدى دەپ ويلايمىز. وتىرىك شىندىقتى ايتىپ تۇرىپ ۇرىس ەستىگەنگە قاراعاندا جەڭىل بولىپ كورىنەدى.

كەز كەلگەن سيتۋاتسيادا شىندىقتى ايتىپ ۇيرەنگەن ءجون. ەگەر ايتارىڭىز بولماسا، ءتىپتى ايتارىڭىز وتىرىك سوزبەن شەكتەلسە، ءۇنسىز قالعانىڭىز ارتىق. وزگەلەر ويلانباستان سەنىم ارتاتىن ادامعا اينالۋعا تىرىسىڭىز.

3. ءبىز شىنايى كەلبەتىمىزدى كورسەتۋگە قورقامىز

اينالامىزداعى ادامداردىڭ مىنەزىن ەسكەرىپ، شىنايى بەينەمىزدى كورسەتە المايتىنىمىزدى تۇسىنەمىز. قۇددى بەتپەردە باستى اشەكەيىمىزگە اينالعانداي. ال ءارقايسىمىزدىڭ ماقساتىمىز - كۇن استىنان ورىن الۋ. وزگەلەردى رەنجىتسەك تە، قۋانتساق تا، تابىستى بولۋعا ۇمتىلامىز. جەكە قالعاندا تۇلعالىق قاسيەتىمىزدى سەزىپ، ەرەكشە ەكەنىمىزگە كوزىمىز جەتسە دە، كوپتىڭ ورتاسىندا اداسىپ قالامىز. ولارعا ەلىكتەپ، قوعامعا ءسىڭىسۋدى ماقسات تۇتامىز.

ءوزىمىزدىڭ شىن مانىندە نە قالايتىنىمىزدى تۇسىنسەك، ارماندارىمىزعا ءبىر تابان جاقىنداي تۇسەر ەدىك. «وزگەلەر نە ويلايدى» دەگەن ويدى شەتكە ىسىرىپ، شىنايى ءومىر ءسۇرىڭىز. الەمگە شىنايى بەينەڭىزدى كورسەتسەڭىز، ول دا ءوز كەزەگىندە ەڭ قىمبات سىيىن ۇسىنارى انىق.

massaget.kz