اۋەجاي قىزمەتكەرلەرىنە قىتاي ءتىلىن ءبىلۋدى مىندەتتەۋ كەرەك - ت. دۇيسەنعاليەۆ
بۇل جونىندە بۇگىن استانادا قازاقستان اۋەجايلارىندا جولاۋشىلارعا قىزمەت كورسەتۋدى جەڭىلدەتۋ بويىنشا IATA كونفەرەنتسياسىندا الماتى قالاسى تۋريزمدى باسقارۋ ءبولىمى باسشىسىنىڭ مىندەتىن اتقارۋشى تيمۋر دۇيسەنعاليەۆ ايتتى.
« ەكسپو جانە ۋنيۆەرسيادا كەزىندە جولاۋشىلاردىڭ قازاقستانعا كەلۋى 12 پايىزعا دەيىن وسەدى. سوندا ءبىز ولاردى قابىلداۋعا ساپا جاعىنان دا، قىزمەت كورسەتۋ جاعىنان دا دايىن بولۋىمىز كەرەك. ەلباسىنىڭ اعىمداعى جىلدىڭ تامىزىندا قىتاي ەلىنە ساپارى بارىسىندا بىرنەشە قۇجاتتارعا قول قويىلعان بولاتىن. ونىڭ شىندە قىتايمەن ۆيزا ماسەلەسى دە قارالدى. سوندىقتان، كورمەنى تاماشالاۋعا وڭتۇستىك-شىعىس ازيادان كوپتەپ كەلەتىنىن ەسكەرسەك، اۋەجاي قىزمەتكەرلەرىنىڭ قىتاي ءتىلىن دە بەلگىلى ءبىر دەڭگەيدە بىلگەنى دۇرىس. سونىمەن قاتار، قىزمەتكەرلەرىمىزدىڭ بىلىكتىلىگىن ارتتىرۋعا شەتەلگە جىبەرۋدىڭ قاجەتى جوق. ولاردى ەلىمىزدە-اق وقىتىپ الۋعا مۇمكىندىگىمىز بار»، - دەدى ول.
سونداي-اق، ەلدەگى اۋەجايلاردىڭ ءبىرقاتار باستى پروبلەمالارىن دا اتاپ ءوتتى.
«بىزگە اۋەجايدى قايتا سالۋدىڭ قاجەتى جوق. ول كوپ جىلداردى كەرەك ەتەدى. سوندىقتان قازىرگى بار اۋەجايدىڭ قىزمەتىن عانا جاقسارتۋعا ءتيىسپىز. ماسەلەن، بىزدە جۇكتى ساقتاۋ قىزمەتى دۇرىس جولعا قويىلماعان. شەتەلدەن قىدىرىپ كەلگەن تۋريستەردىڭ بار جۇگىن كوتەرىپ، قالانى ارالاعىسى كەلمەيتىنىن جاقسى بىلەمىز. سول سەبەپتى ونى قاجەتتى قۇرالدارمەن جابدىقتاپ، كولەمىن ۇلكەيتۋ كەرەك. سونىمەن قاتار، ەتيكا ماسەلەسىنە دە كوڭىل اۋدارعان ءجون. جولاۋشىلاردىڭ بىرنەشە ساعات بويى اۋە كولىگىندە وتىرعاندىعىن ەسكەرىپ، قىزمەتكەرلەر جاقسى كوڭىل-كۇيمەن قارسى الۋلارى ءتيىس»، - دەيدى ول.
ايتا كەتەيىك، بۇگىنگى كونفەرەنتسيانىڭ باستى ماقساتى - قازاقستاندىق اۋەجايلاردىڭ ەكسپو-2017 جانە ۋنيۆەرسيادا-2017 سەكىلدى ەلىمىزدىڭ الدىندا تۇرعان شارالار اياسىندا شەتەلدىك قوناقتاردى قارسى الۋعا دايىنداۋ جانە اۋەجايلاردى جولاۋشىلارعا قىزمەت كورسەتۋ بويىنشا حالىقارالىق ستاندارتتى ۇسىنۋ ماسەلەلەرىن تالقىلاۋ بولىپ تابىلادى.
نازەركە سۇيىندىكوۆا
Baq.kz
