قازىرگى جاعدايدا قازاقستان قوعامىن «ماڭگىلىك ەل» تۇرعىسىنان زەردەلەۋ قاجەت - س. نۇرمۇراتوۆ

الماتى. قازاقپارات - بۇگىن الماتىداعى دوستىق ۇيىندە ق ر ب ع م عىلىم كوميتەتى فيلوسوفيا، ساياساتتانۋ جانە ءدىنتانۋ ينستيتۋتى، س. ب. سۇلەيمەنوۆ اتىنداعى شىعىس تانۋ ينستيتۋتى جانە «قازاقستاندىق فيلوسوفيالىق كونگرەسس» قوعامدىق ۇيىمىنىڭ ۇيىمداستىرۋىمەن «قازاقستاننىڭ رۋحاني ءومىرى: تاريح جانە قازىرگى زامان» اتتى حالىقارالىق عىلىمي- تەوريالىق كونفەرەنتسيا ءوتىپ جاتىر.

 وعان وتاندىق جانە شەتەلدىك فيلوسوف عالىمدار، ساياساتتانۋشىلار، مادەنيەتتانۋشىلار، ءدىنتانۋشىلار، تاريحشىلار، ءدىن، مادەنيەت جانە ءبىلىم سالاسىنىڭ قىزمەتكەرلەرى قاتىسۋدا.

جيىندا ق ر ءبىلىم جانە عىلىم مينيسترلىگى عىلىم كوميتەتىنىڭ فيلوسوفيا، ساياساتتانۋ جانە ءدىنتانۋ ينستيتۋتى ديرەكتورىنىڭ ورىنباسارى سەرىك نۇرمۇراتوۆ قازىرگى جاعدايدا قازاقستان قوعامىنىڭ رۋحاني ءومىرىن جالپىۇلتتىق «ماڭگىلىك ەل» يدەياسى تۇرعىسىنان زەردەلەۋ قاجەتتىگىن اتاپ كورسەتتى.

«ءبىز رۋحاني ءومىردىڭ تاريحى مەن تامىرىن زەردەلەپ قانا قويماي، وسى سالاداعى وزەكتى ماسەلەلەردى دە كوتەرۋىمىز قاجەت. بۇل جەردە قازاق حالقىنىڭ رۋحاني قۇندىلىقتارىنا ارقا سۇيەي وتىرىپ، قازىرگى قازاقستان قوعامىنىڭ دۇنيەتانىمىنا كوڭىل ءبولۋىمىز كەرەك. ءبىز تەك قازاق حالقىنىڭ تاريحىن عانا ەمەس، باسقا دا حالىقتاردىڭ رۋحاني قۇندىلىقتارى مەن جەتىستىكتەرىن زەردەلەيتىن بولساق، جاhاندانۋ الەمىندە ءوز ورنىمىزدى تابا بىلەمىز»، - دەدى ول.

اۆتور: جاپپاربەرگەن ايبوتا