ۆاليۋتالىق باعام نارىعىن تۇراقتاندىرۋعا قىسقا مەرزىمدى پەرسپەكتيۆادا قول جەتكىزۋگە بولادى - ق. كەلىمبەتوۆ

 استانا. قازاقپارات - ۆاليۋتالىق باعام نارىعىن تۇراقتاندىرۋعا قىسقا مەرزىمدى پەرسپەكتيۆادا قول جەتكىزۋگە بولادى. بۇل تۋرالى بۇگىن پارلامەنت ءماجىلىسىنىڭ جالپى وتىرىسىندا قر ۇلتتىق بانكى ءتوراعاسى قايرات كەلىمبەتوۆ وسىلاي مالىمدەدى.

ەسكە سالايىق، جالپى وتىرىستا دەپۋتاتتار «استانا» حالىقارالىق قارجى ورتالىعى تۋرالى» زاڭ جوباسىن تالقىلاعان بولاتىن.

جيىن بارىسىندا دەپۋتات جۇماتاي اليەۆ ەلىمىزدىڭ دوللارسىزداندىرۋ ماسەلەسىن كوتەرگەن بولاتىن. بۇل رەتتە دەپۋتات تالقىلانىپ وتىرعان قۇجات دوللارعا تاۋەلدىلىكتى ودان سايىن ارتتىرىپ جىبەرمەي مە، دەگەن قاۋپىن العا تارتتى. «ينۆەستورلار وسى زاڭ جوباسىن قابىلداعاننان سوڭ ەلگە كەلۋى كۇتىلەدى. بالكىم ولار تەڭگەنى ساتىپ الۋعا ىنتالانىپ، ۇلتتىق ۆاليۋتانى كۇشەيتەرمىز؟ ءبىزدى وسى ماسەلە تولعاندىرادى، دوللارسىزداندىرۋعا بۇل زاڭ جوباسى قالاي اسەر ەتەدى؟ » - دەپ سۇرادى دەپۋتات ج. اليەۆ.

 ءوز كەزەگىندە ۇلتتىق بانك باسشىسى اعىمداعى جاعدايعا زاڭ جوباسىنىڭ اسەرى تۋرالى پىكىرىمەن بولىسە كەلە، بۇل قۇجات ەلىمىزگە كەمىندە 50 جىل قىزمەت ەتەتىنىن العا تارتتى. «بۇگىنگى قيىندىقتار ايلارعا، بالكىم جىلدارعا جالعاسۋى مۇمكىن، ءبىراق 50 -جىلعا سوزىلمايدى. الەمدىك ەكونوميكا بىردە تومەن قۇلدىراپ، بىردە جوعارى سەكىرىپ تۇراتىن سيكلعا يە. ءبىز 1991 -جىلدان بەرى الەمدىك ەكونوميكانىڭ بولشەگىنە اينالدىق، جاھاندىق ويىن ءتارتىبىنىڭ اراسىندا ءجۇرمىز. بۇعان دەيىنگى ون جىل ىشىندە ا ق ش دوللارى «باسەڭدەپ» ول بارىمىزگە جاعىمدى بولدى، ال ەندى «قىمبات دوللار داۋىرىنە» كەزىككەنىمىز تۋرالى ايتىلىپ جاتىر»، - دەپ ءتۇسىندىردى باس بانكير.

 بۇل رەتتە قايرات كەلىمبەتوۆ الەم بويىنشا بارلىق ۆاليۋتا دوللارعا قارسى السىزدىك تانىتىپ وتىرعانىنان مىسالدار كەلتىردى. ماسەلەن، ونىڭ ايتۋىنشا، رەسەي رۋبلىنەن باستاپ، اۆستراليا، كانادا دوللارى دا ا ق ش ۆاليۋتاسىنا قارسى قۇبىلدى، نورۆەگيانىڭ كرونوسى دا تەڭسەلگەن. «مىزعىماس رەزەرۆتىك ۆاليۋتا» رەتىندە ايتىلىپ جۇرگەن قىتاي يۋانى دا ديەۆالۆاتسياعا ۇشىرادى.

«سوندىقتان دا، بۇگىنگى احۋالدىڭ ءوزى دوللارعا تاۋەلدىلىك ەلەمەنتىن كورسەتەدى. ءبىزدىڭ ەكونوميكا دا سولاي، ءبىز مۇناي ساتامىز، ال ول دوللارمەن بايلانىستى. وسىعان وراي ءبىز ۆاليۋتالىق باعام نارىعىن تۇراقتاندىرۋمەن اينالىسىپ جاتىرمىز. سونىمەن قاتار، ءبىز بۇعان قىسقا مەرزىمدى پەرسپەكتيۆادا قول جەتكىزۋگە بولادى دەپ سانايمىز»، - دەدى ۇب باسشىسى.

«ەشكىم دە مۇنايعا باعانىڭ ەرتەڭ قانداي بولاتىنىن ايتا المايدى. ال مۇنايعا باعا 60-70-80 دوللار بولىپ وسسە، وندا تەڭگە دە نىعايادى. كەرىسىنشە، مۇناي باعاسى تومەندەسە وندا قولدان كەلەر قايران جوق، ءبارىمىز الەمدە ورىن الىپ جاتقان جاعدايعا ساي ءومىر سۇرەتىن بولامىز. دەگەنمەن، بۇل - قىسقا مەرزىمدىك پروبلەما»، - دەدى ق. كەلىمبەتوۆ.

اۆتور: قانات مامەتقازى ۇلى