مەملەكەت حالىقتىڭ ءال-اۋقاتىن جاقسارتۋ ءۇشىن بارلىق جاعدايدى جاساپ جاتىر - ن. نازاربايەۆ

 استانا. قازاقپارات - ەلباسى نۇرسۇلتان نازاربايەۆ قىزىلوردا وبلىسىنا جۇمىس ساپارىنىڭ قورىتىندىسى جونىندە ب ا ق وكىلدەرى ءۇشىن بريفينگ وتكىزدى.

بۇل تۋرالى اقوردانىڭ باسپا ءسوز قىزمەتىنەن حابارلادى.

مەملەكەت باسشىسى ءوز سوزىندە قازاقستاننىڭ بارلىق وڭىرلەرى سياقتى قىزىلوردا وبلىسى دا ءوسىپ-وركەندەپ جاتقانىنا توقتالدى.

«وڭىردە مەملەكەتتىك باعدارلامالار تابىستى جۇزەگە اسىرىلۋدا. يندۋستريالاندىرۋ اياسىندا وبلىستا بۇكىل قازاقستاندى ونىممەن قامتاماسىز ەتەتىن اينەك زاۋىتى سالىندى. قىزىلوردا وبلىسىنىڭ اۋماعىمەن «باتىس ەۋروپا - باتىس قىتاي» اۆتوكولىك جولى، سونداي-اق ەلىمىزدىڭ نەگىزگى تەمىرجول جەلىسى وتەدى. قالانىڭ اجارى كوركەيىپ، ساياباقتارى كوبەيدى، سىردىڭ سول جاعالاۋىنا شىعاتىن كوپىر قۇرىلىسى جۇرگىزىلۋدە. تۇرعىن ۇيلەر، بالاباقشا، مەكتەپ، اۋرۋحانا جانە جولدار سالىنۋدا. مەملەكەت حالىقتىڭ ءال-اۋقاتىن جاقسارتۋ ءۇشىن بارلىق جاعدايدى جاساپ جاتىر»، - دەدى نۇرسۇلتان نازاربايەۆ.

مەملەكەت باسشىسى ەلدىڭ ءال-اۋقاتىنىڭ ارتۋى، ءوڭىردىڭ گۇلدەنۋى تىكەلەي ەڭبەكپەن بايلانىستى ەكەنىن ايتتى. وسى ورايدا، تۇزدى جەردە ورمان ءوسىرىپ جاتقان ازاماتتاردىڭ ەڭبەگى ەلەۋلى ەكەنىن دە اتاپ ءوتتى.

ەلباسى سونداي-اق بيىل كۇرىشتى رەكوردتىق كولەمدە جيناعان ديقانداردى دا قۇتتىقتادى.

«كۇرىش قىزىلوردانىڭ ەڭ نەگىزگى داقىلى بولىپ سانالادى. بيىل ءار گەكتارىنان 50 سەنتنەردەن ارتىق كۇرىش الىندى. كەڭەس وداعى كەزىندە بۇنداي بولعان ەمەس»، - دەپ اتاپ ءوتتى مەملەكەت باسشىسى.

قازاقستان پرەزيدەنتى سوڭىندا قىزىلوردالىقتارعا باق-بەرەكە جانە يگىلىك تىلەدى.