ەلباسى قىزىلوردادا جەم شىعارۋ زاۋىتىندا بولدى
ءوندىرىس ورنىنا ايالداعان مەملەكەت باسشىسى اۋىل شارۋاشىلىعىن دامىتۋ، جاڭا تەحنولوگيالاردى ەنگىزۋ ماسەلەلەرىن ءسوز ەتتى.
«اۋىل شارۋاشىلىعى داعدارىس كەزىندە دە ەكونوميكانىڭ لوكوموتيۆى بولىپ قالا بەرەدى»، - دەدى ەلباسى.
زاۋىتتا 250 گە جۋىق ادام جۇمىس جاسايدى. كاسىپورىندا شيكىزات جانە دايىن ونىمدەر ساقتايتىن قويمالار، اۆتوتارازى مەن زەرتحانا، قالتالاۋ سەحى، ۇن تارتۋ ديىرمەنى مەن ماكارون شىعارۋ وندىرىستەرى بار. اتالعان وندىرىستەردەن شىعاتىن ءداندى داقىل قالدىقتارىن قۇراما جەم شىعارۋعا پايدالانادى.
جىل سايىن وبلىس كولەمىندە مال باسىنىڭ كوبەيۋى ءوز كەزەگىندە قۇراما جەم زاۋىتىنىڭ قاجەتتىلىگىن ارتتىرۋدا. كاسىپورىن باسشىسى باقداۋلەت ماقاشيەۆ بۇل جۇمىستاردىڭ ءارى قاراي جالعاساتىنىن ايتا كەلە، كەلەشەكتە ۇن شىعارۋ زاۋىتىن جانە ماكارون فابريكاسىن ىسكە قوسۋدى جوسپارلاپ وتىرعانىن جەتكىزدى. قازىرگى تاڭدا ولاردىڭ بارلىق عيماراتتارى سالىنۋلى تۇر.
جوبا قۇنى - 375,9 ميلليون تەڭگە. زاۋىت مەملەكەتتىك جانە جەكە ارىپتەستىك نەگىزدە جۇمىس جاساپ وتىر. «بايقوڭىر» ا ك ك» ا ق- نىڭ ۇلەسى - %49، ياعني 137 ميلليون تەڭگە بولسا، قالعانى «جان اراي جەم» ج ش س- نىڭ ءوز ۇلەسىنە تيەدى. ءوندىرىس وشاعىنا «بيزنەستىڭ جول كارتاسى-2020» باعدارلاماسى ارقىلى ينفراقۇرىلىم تەگىن جەتكىزىلىپ بەرىلگەن.
كاسىپورىنعا قاجەتتى شيكىزاتتى - كۇرىشتى، ءبيدايدى، جۇگەرىنى جانە كۇنباعىستى جەرگىلىكتى شارۋاشىلىقتار وسىرەدى. دالىرەك ايتساق، «جان اراي جەم» زاۋىتى قازىر وبلىستاعى ءبىرقاتار شارۋا قوجالىقتارىمەن بىرگە جۇمىس جاساۋدا. ولاردىڭ اراسىندا جاڭاقورعان اۋدانىنداعى «تۇگىسكەن ت ش» ج ش س، سىرداريا اۋدانىنداعى «قىزىلديحان» شارۋا قوجالىعى، قارماقشى اۋدانىنداعى «دوستىق جەر م ك» ج ش س بار. زاۋىت تاۋلىگىنە - 80، جىلىنا 30000 توننا قۇراما جەم وندىرۋگە قاۋقارلى.
جەم زاۋىتىنىڭ ءونىمى ساپالى، تەحنيكالارى تىڭ. ايتا كەتەيىك، كاسىپورىن قۇراما جەمدى نەمىس تەحنولوگياسى بويىنشا وندىرەدى. ياعني، زاۋىتتىڭ قوندىرعىلارى ءداندى داقىلدار وڭدەيتىن جابدىقتار شىعارۋدا الەمدەگى الدىڭعى قاتارلى گەرمانيالىق «پەتكۋس» كومپانياسىندا دايىندالعان. ال قۇنارى جوعارى مال ازىعىنىڭ ءبىر كەلىسى 50 تەڭگەگە باعالانىپ وتىر.
بۇگىندە ايماق شارۋالارى جىلىنا 60 مىڭ توننا مال ازىعىن تۇتىنادى. جاڭا قۇراما جەم زاۋىتى سول سۇرانىستىڭ جارتىسىن وتەمەك. بۇعان قوسا، جىل سايىن وبلىس كولەمىندە مال باسى كوبەيىپ كەلەدى. ونىڭ ۇستىنە، قازىرگى تاڭدا وبلىستىڭ اۋىل شارۋاشىلىعى سالاسىندا قۇراما جەم وندىرەتىن بىردە-ءبىر كاسىپورىن جوق ەكەنىن ەسكەرسەك، زاۋىت ونىمدەرىنە سۇرانىس ارتپاسا، كەمىمەيتىنى انىق.
جەم شىعارۋعا قاجەتتى شيكىزاتتار قاتارىندا كۇرىش، ءبيداي، جۇگەرى، سافلور، كۇنباعىس داقىلدارى بار. زاۋىت ءونىمى ايماقتا تەك قانا مال شارۋاشىلىعى ەمەس، سونىمەن قاتار قۇس، بالىق وسىرەتىن شارۋاشىلىقتاردىڭ دامۋىنا دا ىقپال ەتەدى. سونداي-اق، اگروكەشەن اۋماعىندا كۇرىش وڭدەۋ زاۋىتى دا ىسكە قوسىلىپ، جۇمىس ىستەۋدە. ول تاۋلىگىنە 150 توننا كۇرىش شىعارادى.
ايتا كەتەيىك، قىزىلوردا وبلىسى ءۇش جىل قاتارىنان كۇرىشتەن رەكوردتىق ءونىم الدى. سوڭعى جىلدارى وبلىسىمىزدىڭ اۋىل شارۋاشىلىعى سالاسى جاقسى دامىپ كەلەدى. سىر ەلىنىڭ باستى داقىلى كۇرىش ءوندىرىسىنىڭ كولەمى %11,6 ءوسىپ وتىر. مال شارۋاشىلىعى بويىنشا ءىرى قارا، جىلقى جانە تۇيە باسىنىڭ سانى ەڭ بەرەكەلى 90- جىلعى دەڭگەيدەن اسىپ ءتۇستى. ال اگروونەركاسىپ كەشەنىنە سالىنعان ينۆەستيتسيا كولەمى 7,7 ەسەگە ءوستى.
ايماقتا ەگىن شارۋاشىلىعىمەن بىرگە مال، بالىق شارۋاشىلىعىن دامىتۋ بارىسىندا دا تابىستار كوپ. بۇل سالالاردى ءارى قاراي دامىتۋ ماقساتىندا جاڭاقورعان اۋدانىندا ءبىرىنشى رەت مالشىلار سلەتى جانە ارال اۋدانىندا ءبىرىنشى رەت بالىقشىلار سلەتى ءوتتى. ايتا كەتەيىك، بيىل وبلىستا قۋاتى جىلىنا 7 مىڭ توننا توقتى ەتىن وڭدەيتىن ەت كومبيناتىن جانە ءىرى مال بورداقىلاۋ الاڭدارىن سالۋ جۇمىستارى قولعا الىندى.
اۆتور: ەلۋباي اۋەزوۆ
