ق ر پرەزيدەنتى ۇكىمەتكە داعدارىسقا قارسى جۇمىس جوسپارىن جاساۋدى تاپسىردى
اقوردانىڭ باسپا ءسوز قىزمەتىنىڭ حابارلاۋىنشا، كەزدەسۋ بارىسىندا ك. ءماسىموۆ مەملەكەت باسشىسىنا ەلدىڭ الەۋمەتتىك- ەكونوميكالىق دامۋى جانە نەگىزگى مەملەكەتتىك باعدارلامالاردىڭ جۇزەگە اسىرىلۋ بارىسى تۋرالى باياندادى.
ەلباسى بۇگىندە رەسپۋبليكا ەكونوميكاسى كۇردەلى رەجىمدە جۇمىس ىستەپ جاتقانىنا نازار اۋداردى.
«ەنەرگيا تاسىمالداۋشى ونىمدەر باعاسىنىڭ تومەندەۋى سەبەپتى ەل بيۋدجەتىنە تۇسەتىن كىرىستەر 40 پايىزعا قىسقاردى. سونىمەن قاتار، وزگە ەكسپورتتىق تاۋارلاردىڭ نەگىزگى تۇرلەرىنىڭ، سونىڭ ىشىندە قارا جانە ءتۇستى مەتالداردىڭ، كومىردىڭ باعاسى تومەندەدى. بۇل رەتتە اۋىل شارۋاشىلىعى ازداعان ءوسىمدى قامتاماسىز ەتىپ وتىر، ال ونەركاسىپتىك كاسىپورىندار، سونىڭ ىشىندە ماشينا جاساۋ سالاسىنداعى كاسىپورىندار ءوندىرىستى ازايتتى»، - دەدى قازاقستان پرەزيدەنتى.
مەملەكەت باسشىسى الەمدىك نارىقتاعى كۇردەلى احۋالعا قاتىستى تۇجىرىمدار قىتايدا، ا ق ش- تا وتكەن، سونداي- اق رەسەي باسشىلىعىمەن بولعان كەلىسسوزدەردىڭ نەگىزىندە جاسالىپ وتىرعانىنا نازار اۋداردى.
«الەمدەگى، سونىڭ ىشىندە ەۋروپا مەن شىعىس ازياداعى ەكونوميكانىڭ احۋالىن ەسكەرە وتىرىپ، جاعدايدىڭ جۋىق ارادا جاقسارۋىن بولجاۋ مۇمكىن ەمەس. حالقىمىز قالىپتاسقان جاعدايدى ءبىلۋى ءتيىس، كاسىپورىندارىمىزدىڭ كىرىسى ازايىپ، تابىستىڭ تومەندەۋى جانە جۇمىس ورىندارىنىڭ قىسقارۋى ىقتيمال. 2007-2009 - جىلدارداعىدان دا كۇشتى، ناعىز داعدارىس دەندەپ كەلەدى. وسىعان بايلانىستى ۇكىمەتكە تالداۋ جاساۋدى، داعدارىسقا قارسى جۇمىستاردىڭ جوسپارىن ازىرلەۋدى، قاجەتتى شارالاردى بەلگىلەپ، ونى حالىققا جەتكىزۋدى تاپسىرامىن»، - دەدى مەملەكەت باسشىسى.
قازاقستان پرەزيدەنتى مەملەكەت ازاماتتاردىڭ الەۋمەتتىك كوڭىل- كۇيىنىڭ تومەندەۋىنە جول بەرمەيتىنىن تاعى دا قاداپ ايتتى.
«نۇرلى جول» باعدارلاماسى ەڭبەكپەن قامتۋ باعدارلاماسىن تولىقتىرۋعا، كاسىپتىك- تەحنيكالىق ءبىلىم ارقىلى جاڭا ماماندىق الۋ مۇمكىندىگىن كەڭەيتۋگە جاعداي جاسايدى. وسىلايشا جۇرت قاجەت بولعان جاعدايدا ءوز كاسىپورنىندا جاڭا ماماندىق الا الاتىن بولادى. سونىمەن قاتار، بىزدە حالىقتىڭ الەۋمەتتىك ءالسىز توپتارىن قولداۋ باعدارلاماسى دايىن بولۋى ءتيىس»، - دەدى نۇرسۇلتان نازاربايەۆ.
مەملەكەت باسشىسى ونەركاسىپتىك كاسىپورىنداردىڭ كورسەتكىشىن ارتتىرۋدىڭ، سالىنىپ قويعان نىسانداردىڭ قۋاتىن پايدالانۋدىڭ ماڭىزدىلىعىن اتاپ ءوتتى.
«كاسىپورىندار مەملەكەت قاراجاتپەن قامتاماسىز ەتەدى دەپ كۇتپەۋى ءتيىس. ولاي بولمايدى، ۇلتتىق قوردىڭ اقشاسىن جاڭا نىساندار قۇرىلىسىنا، سونداي- اق ناشار جۇمىس ىستەيتىن كاسىپورىنداردى قولداۋعا، سۋبسيديالاۋعا پايدالانۋعا تىيىم سالامىن. بۇل جاعدايدا قانداي ءوندىرىس ءتيىمدى، قايسىسى ءتيىمسىز جۇمىس ىستەيتىنى بىردەن كورىنەدى. سونداي- اق ءبىز بارىنشا ءتيىمدى مەنەدجەمەنت تارتۋ ءۇشىن جەكەشەلەندىرۋ جۇرگىزەمىز»، - دەدى قازاقستان پرەزيدەنتى.
كەزدەسۋ قورىتىندىسى بويىنشا مەملەكەت باسشىسى ءبىرقاتار ناقتى تاپسىرما بەردى.
