قازاقستاندا ىشىمدىكتەن باس تارتۋعا ارنالعان شارالار باستالدى
بۇل تۋرالى ق ر دەنساۋلىق ساقتاۋ جانە الەۋمەتتىك مينيسترلىگىنەن حابارلاندى.
شارانى وتكىزۋدەگى ماقسات - حالىقتىڭ الكوگولدى ىشىمدىكتەردىڭ اعزاعا تيگىزەتىن كەرى اسەرى تۋرالى حاباردارلىعىن ارتتىرۋ، بالالاردىڭ، جاسوسپىرىمدەر مەن جاستاردىڭ ءوز دەنساۋلىعىنا دەگەن جاۋاپكەرشىلىگىن قالىپتاستىرۋ، سالاۋاتتى ءومىر سالتىن ناسيحاتتاۋ.
ونكۇندىك بارىسىندا مەديتسينالىق ۇيىمداردا ماماندار كەڭەسىنىڭ اشىق ەسىك كۇندەرى وتەدى: دوڭگەلەك ۇستەلدەر؛ پسيحولوگ، ناركولوگ، الەۋمەتتىك مامانداردىڭ قاتىسۋىمەن وقۋ ورىندارىندا الكوگولدى ىشىمدىكتەردەن باس تارتۋ ادەتىن قالىپتاستىرۋ؛ «دەنى ساۋ قالا» كەڭ كولەمدى اكتسياسى، جاسوسپىرىمدەر مەن جاستاردىڭ قاتىسۋىمەن حالىق كوپ شوعىرلانعان جەرلەردە فلەش- موبتار وتكىزۋ؛ ايماقتىق ءسوس ورتالىقتارى بازاسىندا جاستاردىڭ دەنساۋلىق ورتالىقتارى قىزمەتكەرلەرى جانە مەكتەپ ديرەكتورلارىنىڭ تاربيە ءىسى جونىندەگى ورىنباسارلارى ءۇشىن شەبەرلىك سىنىپتارى؛ «بالالار ليگاسى ىشىمدىككە قارسى!» ۇرانىمەن وقۋشىلار اراسىنداعى بايقاۋلار.
الكوگولدى ىشىمدىكتەردى شامادان تىس قولدانۋ ءولىمنىڭ كوبەيۋىنە، دەنساۋلىقتىڭ جانە تۇرعىنداردىڭ ەڭبەككە قابىلەتتىلىگىنىڭ ناشارلاۋىنا باستى سەبەپ بولىپ وتىر. ول پسيحيكالىق جانە مىنەز- قۇلىقتىق اۋىتقۋلارعا، ونىڭ ىشىندە ىشىمدىككە تاۋەلدىلىككە، باۋىر تسيرروزى، قاتەرلى ىسىكتىڭ كەيبىر تۇرلەرىنە، جۇرەك- قان تامىرلارىنىڭ اۋرۋلارى جانە تاعى باسقا اۋىر جۇقپالى اۋرۋلارعا اكەپ سوعادى.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرىنە سايكەس، الەمدە ىشىمدىكتى شامادان تىس قولدانۋدىڭ ناتيجەسىندە جىل سايىن 3,3 ميلليون ادام كوز جۇمادى.
ەستەرىڭىزگە سالا كەتەيىك، قازاقستاندا الكوگولدى ىشىمدىكتەن باس تارتۋ ۇلتتىق كۇنى 2007 -جىلدان بەرى اتالىپ كەلەدى.
اۆتور: رۋسلان عابباسوۆ
