سولتۇستىك افريكا مەن تاياۋ شىعىس بوسقىندارىنىڭ پروبلەماسىن شەشۋ قارجىلىق جانە ادامي مول رەسۋرستاردى قاجەت ەتەدى - ن. نازاربايەۆ
دەپ حابارلايدى قازاقپارات ءتىلشىسى.
«سوڭعى ۋاقىتتا الەم ءوزىنىڭ كوپتەگەن سالالارىندا، ەڭ الدىمەن، ەكونوميكا مەن قاۋىپسىزدىك ماسەلەلەرىندە جاھاندىق وزگەرىستەرگە ۇشىراۋى ەشكىمگە دە قۇپيا ەمەس. ورىن الىپ جاتقان جايت ءبىزدىڭ ۇيىمنان دا سايكەسىنشە دامۋدى، جاڭا جاعدايعا بەيىمدەلۋدى تالاپ ەتپەي قويمايدى. ت م د جاڭا بولمىستارعا ەۆوليۋتسيالانىپ، بەيىمدەلۋى ءتيىس، جاھاندىق وزگەرىستەر مەن قاتەرلەرگە ءتيىمدى ارەكەت ەتۋى ءتيىس»، - دەدى ق ر پرەزيدەنتى.
ەلباسى ءوز سوزىندە بۇگىنگى كۇنگى ت م د ىنتىماقتاستىعى قاۋىپسىزدىك سالاسىنداعى حالىقارالىق جاي- كۇي ەكەنىن باسا ايتتى. حالىقارالىق لاڭكەستىك كوپتەگەن ەلدەردەگى احۋالعا كەرى اسەرىن تيگىزىپ، بەيبىت حالىقتىڭ، اسىرەسە جاستار مەن بالالاردىڭ ولىمىنە تۇرتكى بولىپ وتىرعانىن اتاپ ءوتتى.
«مۇنىڭ ناتيجەسىندە ەكىنشى دۇنيەجۇزىلىك سوعىستان كەيىنگى ەڭ اۋقىمدى ءماجبۇرلى كوشى- قون، سولتۇستىك افريكا مەن تاياۋ شىعىس حالقىنىڭ ەۋروپاعا اۋا كوشۋىنە اكەلدى. بۇل پروبلەمانى شەشۋ جولىندا مول قارجىلىق جانە ادامي رەسۋرستار قاجەت ەتىلەدى. بۇعان قوسا، بوسقىن اتىن جامىلعان لاڭكەستەر دە بولۋى مۇمكىن. ولاردىڭ ماقساتى تۇراقسىزدىق وشاعىن قالىپتاستىرۋ بولىپ سانالادى»، - دەدى ەلباسى.
ق ر پرەزيدەنتى ت م د مەملەكەتتەرىنىڭ باسشىلارى قاۋىپسىزدىككە تونەتىن لاڭكەستىك قاتەردىڭ الدىن الۋ ءۇشىن ءتيىمدى شارالار قابىلداۋ قاجەتتىگىنە دەن قوياتىندىعىن اتاپ ءوتتى.
«ب ۇ ۇ مىنبەرىنەن اتاپ وتكەنىمدەي، بىرىككەن ۇلتتار ۇيىمىنىڭ ماقۇلداۋىمەن دۇنيەجۇزىلىك لاڭكەستىك ۇيىمدارمەن كۇرەس جەلىسىن قۇرۋ قاجەت. بىزدەرگە بۇل باعىتتاعى جۇمىستاردى كۇشەيتۋ، ت م د انتيتەرروريستىك ورتالىعىنىڭ الەۋەتىن بارىنشا پايدالانۋ قاجەت. سوندىقتان دا ت م د مەملەكەت باسشىلارىنىڭ بىرىككەن ۇلتتار ۇيىمىنىڭ قۇرىلعانىنا 70 جىل تولۋىنا وراي حالىقارالىق لاڭكەستىكپەن كۇرەس تۋرالى مالىمدەمەسى بۇگىن دەر ۋاقىتىندا قابىلداندى»، - دەدى ن. نازاربايەۆ.
اۆتور: مارلان جيەمباي
