گولوۆكين - قازاقستاننىڭ كاسىپقوي بوكستاعى «التىن» ساقاسى
قارسىلاسى - IBF تۇجىرىمى بويىنشا ورتا سالماقتا الەم چەمپيونى اتاعىنىڭ يەگەرى داۆيد لەمە.
كەزىندە اۋەسقوي بوكستا قارسىلاستارىن بەت قاراتپاي ۇتىپ، قازاقستان قورجىنىن مەدالدارعا تولىقتىرعان بوكسشىمىز گەننادي قازىرگى تاڭدا كاسىپقوي بوكستا دا قارسىلاس شاق كەلتىرمەي ءجۇر. وسىنداي مەملەكەتىمىزدىڭ ابىرويىن اسىرىپ جۇرگەن ازاماتىمىز تۋرالى قانشا جازساق تا كوپتىك ەتپەيتىنى انىق.
سەبەبى، ول - قازىر تاۋەلسىز قازاق ەلىنەن شىققان تۇڭعىش سۋپەرچەمپيون! الەمدىك بوكس سەرياسىنداعى ءبىر ەمەس ەكى بىردەي بەلدىكتىڭ (WBA جانە IBO) يەگەرى. ول - كەز-كەلگەن جەكپە-جەگىندە شارشى الاڭعا قازاقتىڭ ۇلتتىق ۇلگىسىندەگى شاپانىن جامىلىپ شىعىپ، بايراعىن كوتەرىپ جۇرگەن ناعىز پاتريوت ازامات. ول - قازىرگە دەيىن كاسىپقوي بوكستا 33 مارتە شارشى الاڭعا كوتەرىلىپ، بارلىعىن دا جەڭىسپەن اياقتادى. ونىڭ 30 ىن مەرزىمىنەن بۇرىن اياقتاپ، ورتا سالماقتاعى الەم بويىنشا ۇزدىك بوكسشىلاردىڭ ءبىرى اتاندى.
قازاق توپىراعىنان شىعىپ، الەمدى مويىنداتىپ، قازاق ەلىنىڭ نامىسىن ابىرويمەن قورعاپ جۇرگەن وسىنداي ازاماتتارىمىزدى قالاي ماقتان تۇتپاسقا؟! ولاي بولسا، جۇدىرىعى زىلدەي ۇرعانىن قۇلاتپاسا كوڭىلى كونشىمەيتىن بوكسشىمىزدىڭ ءومىرى جايىندا ايتا كەتسەك ارتىقتىق ەتپەسى انىق.
گەننادي گولوۆكين 1982-جىلى 8- ساۋىردە قاراعاندى قالاسىندا دۇنيەگە كەلدى. ول جارىق دۇنيە ەسىگىن اشقاندا جالعىز بولعان جوق. التىن قۇرساق اناسى گەنامەن بىرگە ماكسيم ەسىمدى ەگىز ۇلداردى ومىرگە اكەلدى. كەزىندە ەگىز باۋىرى ماكسيم دا بوكسپەن اينالىسىپ، كەيىن بەلگىلى ءبىر سەبەپتەرگە بايلانىستى سپورتتان كەتكەن ەكەن. الايدا، سپورتتان كەتسە دە ءبىر قۇرساقتى تەپكىلەپ بىرگە جاتقان سىڭارىنىڭ قاسىنان الىستاعان ەمەس. گەنا قايدا جۇرسە سوندا، اركەز شارشى الاڭعا شىققاندا قاسىنان تابىلىپ، قولداۋ كورسەتىپ جۇرگەنىن جاقسى بىلەمىز.
گولوۆكين ءوزىنىڭ سپورتتىق مانسابىن اۋەسقوي بوكستان باستادى. العاش بىلعارى قولعاپتى 11 جاسىندا كيدى. سودان بەرى مىنە، قولعابىن شەشكەن ەمەس. كاسىپقوي بوكسقا كەتپەي تۇرىپ، قازاقستاننىڭ جەتى دۇركىن چەمپيونى اتاندى. ال 2000-جىلى جاستار اراسىندا الەم چەمپيونىندا جەڭىس تۇعىرىنىڭ ەڭ بيىك ساتىسىنان كورىندى. 2001-جىلى شىعىس ازيا ويىندارىنىڭ، 2002-جىلى ازيا ويىندارىندا قارسىلاس شاق كەلتىرمەي، باس جۇلدەنى قانجىعاسىنا بايلادى. 2003-جىلى الەم چەمپيونى اتانسا، 2004-جىلى افينا قالاسىندا وتكەن وليمپيادا ويىندارىندا كۇمىس جۇلدەگەرى اتاندى. سونىمەن قاتار، وزگە دە حالىقارالىق سايىستاردا دا اتويلاپ العا شىعىپ، جەڭىستەرىمەن بايراعىمىزدى جەلبىرەتە ءبىلدى. تەك، اۋەسقوي بوكستا گەنانىڭ قورجىنىندا وليمپيادانىڭ التىنى جوق دەگەنىمىز بولماسا، باسقا ءبىراز بيىكتەردى باعىندىرىپ ۇلگەردى.
ال گولوۆكين 2006-جىلى اۋەسقوي بوكسقا قوش ايتىسىپ، كاسىپقوي بوكسقا بەت الدى. ول وسى جىلى ورتاشا (72 كەلى) سالماقتاعى دەڭگەيدە العاش كاسىپقوي بوكستىڭ شارشى الاڭىنا كوتەرىلدى. العاشقى 8 جەكپە-جەگىن مەرزىمىنەن بۇرىن اياقتاپ، الەم نازارىن بىردەن وزىنە اۋدارا باستادى.
2007-جىلدىڭ قىركۇيەك ايىندا فرانسۋز مەحدي بوۋدلامەن كەزدەسىپ (11-1)، 2008-جىلى ءساۋىر ايىندا يان گاردنەردى (20-3)، وسى جىلى قاراشا ايىندا بەلارۋس ماليك دزياررانى (29-3) ەسەپتەرىمەن ايقىن باسىمدىلىقپەن جەڭەدى. ال 2009-جىلى شىلدەنىڭ 11 كۇنى ءبىرىنشى رەت 12 راۋندتىق جەكپە-جەككە شىعادى. گەنانىڭ دا كۇتكەنى وسى ەدى...
بۇل كۇنى ءبىزدىڭ دارىندى بوكسشىمىز WBO سەرياسى بويىنشا برازيليالىق دجون اندەرسون كارۆالونمەن جۇدىرىقتاسىپ، بار بولعانى 2 راۋندتا نوكاۋتپەن تىزە بۇكتىرىپ، العاش رەت WBA دارەجەسى بويىنشا الەم چەمپيونى اتاعىنا قول جەتكىزەدى. وسىلاي گەنانىڭ كاسىپقوي بوكستاعى جاۋاپتى ءارى جارقىن جولدارعا باستايتىن جەڭىستى سەرياسى باستالادى.
ال 2010-جىلى كولۋمبيالىق ميلتون نۋنەستى جەڭىپ، WBA (بۇكىل الەمدىك بوكس اسسوتسياتسياسى) ۋاقىتشا چەمپيونى اتانادى. 2011-جىلى امەريكالىق لاحۋان سايموندى ءبىرىنشى راۋندتا-اق قۇلاتىپ، IBO (حالىقارالىق بوكس قاۋىمداستىعى) تۇجىرىمى بويىنشا چەمپيون اتاعىنا قول جەتكىزدى.
2012-جىلى تيتۋلدى ءۇشىنشى رەت قورعاۋدا گولوۆكين جاپوندىق ماكوتتو فۋچيگاميدى ەسىنەن تاندىردى. سونداي-اق، وسى جىلى قىركۇيەتىڭ 1 ءى كۇنى HBO امەريكالىق تەلەارناسىندا گەنناديدىڭ دەبيۋتى ءوتتى. گولوۆكين رينگكە جاس پولياك گجەگوج پروكسامەن جۇدىرىقتاسىپ، ءبىرىنشى راۋندتا-اق قارسىلاسىن سۇلاتىپ تاستادى.
2013-جىلدىڭ 19- قاڭتارىندا Madison Square Garden ارەناسىندا گولوۆكين ەرىكتى تۇردە تيتۋلدى قورعاۋعا شىققان ا ق ش بوكسشىسى گابريەل روسادومەن جۇدىرىقتاستى. گەننادي ونى تەحنيكالىق نوكاۋتپەن جەڭەدى.
2013-جىلدىڭ 30- ناۋرىزىندا موناكودا گەننادي گولوۆكين جاپون بوكسشىسى نوبۋحيرو يسيدومەن قولعاپ ءتۇيىستىردى. بۇل جولى دا قارسىلاسىن نوكاۋتقا ءتۇسىرىپ، ونى كاسىپقوي بوكستاعى العاشقى جەڭىلىسىنە ۇشىراتتى.
2013-جىلدىڭ 29- ماۋسىمىندا ا ق ش- تا گ. گولوۆكين بەلگىلى بريتانيالىق بوكسشى مەتتيۋ ماككلينمەن شارشى الاڭدا كەزدەستى. بۇل جەكپە-جەك تە قازاقستاندىقتىڭ ايقىن باسىمدىعىمەن اياقتالدى.
2013-جىلدىڭ 2- قاراشاسىندا گەننادي ا ق ش- تا جەرگىلىكتى بوكسشى كەرتيس ستيۆەنسپەن جۇدىرىقتاسىپ، قارسىلاسىن 8- راۋندتا ەسىنەن تاندىردى.
2014-جىلدىڭ 1- اقپانىندا گولوۆكين مونتە-كارلودا گانالىق وسۋمان ادامامەن جەكپە-جەككە شىقتى. گولوۆكيننىڭ شويىن جۇدىرىعىنان قاۋىپتەنگەن ادامانىڭ باپكەرى جەتىنشى راۋندتا ەسەڭگىرەپ قالعان شاكىرتىن شارشى الاڭعا ورامال لاقتىرىپ، توقتاتىپ الدى. وسى جىلدىڭ ماۋسىم ايىندا گولوۆكين WBA سۋپەرچەمپيونى اتاندى.
2014-جىلى 26- شىلدەدە گولوۆكين اۆستراليانىڭ تانىمال بوكسشىسى، بۇرىنعى الەم چەمپيونى دەنيەل گيلمەن جەكپە-جەككە شىقتى. ءۇشىنشى راۋندتا گولوۆكين كەزەكتى جەڭىسىنە جەتتى.
2014-جىلدىڭ 19- قازانىندا گەننادي گولوۆكين تانىمال مەكسيكالىق بوكسشى، WBC نۇسقاسى بويىنشا ۋاقىتشا الەم چەمپيونى ماركو انتونيو رۋبيومەن جۇدىرىقتاسىپ، قارسىلاسىن ەكىنشى راۋندتا سۇلاتىپ سالدى.
ال بيىل، ياعني 2015-جىلى گەننادي ەكى كەزدەسۋ وتكىزدى. ونىڭ ءبىرى 21- اقپاندا موناكودا وتكەن بولاتىن. وندا جەرلەسىمىز مارتين ميۋررەيدى ويىننىڭ 10-راۋندىندا جەڭگەن بولاتىن. ال ەكىنشىسىن مامىر ايىنىڭ 17- كۇنى كاليفورنيا شتاتى، ينگلۆۋد قالاسىنداعى «فورۋم» ستاديونىندا امەريكاندىق بوكسشى كىشى ۆيللي مونرومەن جۇدىرىقتاسىپ، قارسىلاسىن ەكىنشى رۋاندتا ەكى رەت ەسەڭگىرەتىپ تاستادى. الايدا، مارتين تاباندىلىق تانىتا ءبىلدى. 6- راۋندقا دەيىن جەتتى. ال قازاننىڭ 17- كۇنى وتەتىن جەكپە-جەگى گەنانىڭ وسى جىلداعى ءۇشىنشى جەكپە-جەگى بولماق. جەرلەسىمىز بۇل جولى دا جەڭىستى جولىن ۇزبەي، ءۇمىتىمىزدى اقتايدى دەپ سەنەمىز.
جەرلەسىمىز گەنناديدىڭ بارلىق جەتىستىكتەرى تۋرالى جوعارىدا جىپكە تىزگەن مارجانداي ايتىپ وتتىك. ەندى گولوۆكيننىڭ قارسىلاسىنا دا از-كەم توقتالا كەتەيىك. بۇل كەزدەسۋدىڭ وزگە جەكپە-جەكتەرگە قاراعاندا ورنى بولەك بولعالى تۇرعانى ايتپاساق تا تۇسىنىكتى. قارسىلاسى دا وسال ەمەس.
داۆيد لەمە كاسىپقوي بوكستاعى 34 جەكپە-جەگىنىڭ 33 ءىن تۋعان قالاسىندا وتكىزگەن. IBF (دۇنيەجۇزىلىك بوكس فەدەراتسياسى) تۇجىرىمى بويىنشا چەمپيوندىق بەلبەۋىنىڭ يەگەرى. ول بۇل اتاعىن وتانداسىمىزعا قارسى ءبىرىنشى رەت قورعاماق. لەمە بۇل چەمپيوندىق اتاعىن سوڭعى رەت فرانسۋز حاسسان ن'دام ن'جيكامعا قارسى جەكپە-جەكتە جەڭىپ العان. بوكسپەن 10 جاسىنان باستاپ شۇعىلدانعان ەكەن. اۋەسقوي بوكستان ءۇش دۇركىن كانادا چەمپيونى.
داۆيد لەمە كاسىپقوي بوكستاعى ءبىرىنشى جەكپە-جەگىن 2007-جىلدىڭ 14- ساۋىرىندە وتكىزىپ، مەكسيكالىق بوكسشى حوسە كاندەلاريو توررەستى ۇتقان. وسىلاي ونىڭ دا جەڭىستى جولدارى ساتىمەن باستالادى. 25 جەكپە-جەگىندە جەڭىستى جولى جالعاسىپ، 2011-جىلى مەكسيكالىق ماركو انتونيو رۋبيودان ۇتىلىپ قالادى. وسى جەڭىلىستەن كەيىن، اراعا 8 اي سالىپ، گايتي ەلىنىڭ بوكسشىسى جواشەن السينگە قارسى جەكپە-جەك وتكىزىپ، تاعى دا جەڭىلىس تابادى. ءسويتىپ، «WBC International» چەمپيوندىق اتاعىنان ايىرىلدى.
2012-جىلى كاسىپقوي بوكستاعى جولىن قايتا جالعاپ، مەكسيكالىق حاۋدەل سەپەتانى جەڭىپ، 2011-جىلعى ەكى جەڭىلىسىنەن كەيىن جەڭىستى جولى قايتا جالعاسادى. داۆيد لەمە وسىعان دەيىن جالپى 36 كەزدەسۋ وتكىزىپ، 34 ىندە جەڭىسكە جەتكەن. 31 كەزدەسۋىن مەزگىلىنەن بۇرىن اياقتاعان. بۇگىندە ول گەننادي گولوۆكينمەن ناعىز تارتىسقا تولى جەكپە-جەك وتكىزەمىن دەپ وزىنە سەنىپ وتىر. وعان ءبىزدىڭ جەرلەسىمىز جەڭىستى وڭاي ۇستاتا سالمايتىنى انىق.
قوس بوكسشى اراسىنداعى جەكپە-جەك 17- قازان كۇنى نيۋ-يوركتاعى «Madison Square Garden» كەشەنىندە وتەدى. جەرلەسىمىزگە جانكۇيەر بولايىق.
كۇنسۇلتان وتارباي
