ا. لۋكاشەنكو قازاقستان پرەزيدەنتىن «حالىقتار دوستىعى» وردەنىمەن ماراپاتتادى

 بۋراباي. قازاقپارات - بۇگىن اقمولا وبلىسىنا قاراستى بۋراباي كەنتىندە ءوتىپ جاتقان تاۋەلسىز مەملەكەتتەر دوستاستىعى مەملەكەت باسشىلارى كەڭەسىنىڭ كەڭەيتىلگەن وتىرىسى بارىسىندا بەلارۋس پرەزيدەنتى الەكساندر لۋكاشەنكو ق ر پرەزيدەنتى نۇرسۇلتان نازاربايەۆتى «حالىقتار دوستىعى» وردەنىمەن ماراپاتتادى،

دەپ حابارلايدى قازاقپارات ءتىلشىسى.

«ءدال وسى زالدا، ءدال وسى قۇرامدا مەن ونىمەن بىرنەشە عانا ادام ماراپاتاتتالعان جوعارى مەملەكەتتىك ناگرادانى تابىس ەتكىم كەلەدى. نۇرسۇلتان ءابىش ۇلى «حالىقتار دوستىعى» وردەنىمەن باياعىدا ماراپاتتالعان. سوندىقتان بۇگىن ءبىزدىڭ كەڭەستىڭ ءدال وسى قۇرامىندا، ارىپتەستەرىمىز - پرەزيدەنتتەردىڭ كوز الدىندا وسى ناگرادانى تابىس ەتكىم كەلەدى. بەلارۋس حالقى اتىنان وسىناۋ ميسسيانى ورىنداۋعا رۇقسات ەتىڭىزدەر»، دەدى ا. لۋكاشەنكو.

بەلارۋس پرەزيدەنتى ەلباسى ن. نازاربايەۆتىڭ ت م د- نىڭ قالىپتاسۋى جولىندا زور ەڭبەك سىڭىرگەنىن، ەۋرازيالىق ەكونوميكالىق وداق قۇرۋ يدەياسىن ۇسىنعانىن اتاپ ءوتتى. «سوندىقتان دا ماعان وسىناۋ ماڭىزدى ميسسيانى اتقارۋعا، ونى قۇتتىقتاپ، ناگرادانى تابىس ەتۋگە رۇقسات ەتىڭىزدەر»، - دەدى ول.

 ايتا كەتەيىك، جوعارى دەڭگەيدەگى وتىرىسقا ارمەنيا پرەزيدەنتى سەرج سارگسيان، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى المازبەك اتامبايەۆ، رەسەي پرەزيدەنتى ۆلاديمير پۋتين، ازەربايجان پرەزيدەنتى يلحام اليەۆ، تاجىكستان پرەزيدەنتى ەمومالي راحمون، وزبەكستان پرەزيدەنتى يسلام كارىموۆ، مولدوۆا سىرتقى ىستەر جانە ەۋروپالىق ينتەگراتسيا ءمينيسترىنىڭ ورىنباسارى اندرەي گالبۋر، تۇركىمەنستان مينيسترلەر كابينەتى ءتوراعاسىنىڭ ورىنباسارى ساتلىق ساتلىكوۆ، ۋكراينانىڭ قازاقستانداعى ىستەرىنىڭ ۋاقىتشا سەنىمدى وكىلى يۋريي لازەبنيك، تمد اتقارۋ كوميتەتىنىڭ ءتوراعاسى - اتقارۋشى حاتشىسى سەرگەي لەبەديەۆ قاتىسۋدا.

اۆتور: مارلان جيەمباي