ءماجىلىس ورالماندار ءۇشىن قازاقستان ازاماتتىعىن الۋدى جەڭىلدەتەتىن زاڭ جوباسىن ەكىنشى وقىلىمدا ماقۇلدادى
ەندى قۇجات پارلامەنت سەناتىنا جولدانادى.
ايتا كەتەيىك، قۇجاتتا ەتنيكالىق قازاقتاردى تاريحي وتانىنا ورالۋىن ىنتالاندىرۋ ماقساتىندا زاڭ جوباسىمەن ولاردىڭ قونىستانۋ وڭىرىنە قاراماستان ورالمان مارتەبەسىن الۋ، شەتەلدىك ازاماتتارعا قاراعاندا تولەم قابىلەتىن راستاۋسىز ۋاقىتشا تۇرۋ ىقتيارحاتىن الۋ مۇمكىندىگى بەرىلەدى. بۇل رەتتە ۇكىمەت بەلگىلەگەن وڭىرلەرگە قونىستانعان جاعدايدا ورالماندارعا جاعدايلار جاسالادى. ماسەلەن، جۇمىسپەن قامتۋ بويىنشا شارالار شەڭبەرىندەگى ەتنيكالىق قازاقتار ءۇشىن كولىك شىعىندارىن وتەيتىن، قىزمەتتىك باسپانا نەمەسە جاتاقحانادان بولمە بەرۋدى قۇرايتىن الەۋمەتتىك پاكەتتەر قامتىلماق. بۇنداي الەۋمەتتىك كومەكتەر ەلىمىزدىڭ ءبىر وڭىرىنەن ۇكىمەت ايقىنداعان ەكىنشى وڭىرىنە قونىستانعان ورالماندار ءۇشىن دە بەرىلەدى. ال العاشقى قونىستانعان، ياعني ۇكىمەت ايقىنداعان وڭىرىنەن بەس جىل مەرزىمىنەن بۇرىن ءوز بەتىنشە كوشىپ- قونىپ، قونىس اۋدارىپ كەتكەندەر، قازاقستان رەسپۋبليكاسىنىڭ ازاماتتىعىن الۋدان باس تارتقاندار وزدەرى العان مەملەكەتتىك قولداۋلاردى قايتاراتىن بولادى. سونىمەن قاتار، ورالماندارعا قازاقستان رەسپۋبليكاسىنىڭ ازاماتتىعىن بەرۋ مەرزىمىن تۇراقتى تۇرۋ ىقتيارحاتىن العاننان كەيىن ءبىر جىل ىشىندە شەشۋ كوزدەلەدى.
«زاڭ جوباسىندا بۇگىنگى كۇنى شەت ەلدەردەگى قانداستارىمىزدىڭ قازاقستان ازاماتتىعىن الۋدا تۋىنداپ وتىرعان ءبىرقاتار ماسەلەلەرى شەشىمىن تاپتى. اتاپ ايتقاندا، ەندىگى جەردە ەتنيكالىق قازاقتار قونىستانعان وڭىرىنە قاراماستان ورالمان مارتەبەسىن الا الادى. سونداي- اق، ولار قازاقستاننىڭ ازاماتتىعىن تۇرعىلىقتى تۇرۋعا رۇقساتتى العاننان كەيىن ءبىر جىل مەرزىمىندە، ءوتىنىش بەرگەن كۇنىنەن باستاپ ءۇش اي ىشىندە جەڭىلدەتىلگەن تارتىپپەن الا الاتىن بولدى. بۇرىنعى زاڭ بويىنشا ولار قازاقستان ازاماتتىعىن الۋ ءۇشىن ەلىمىزدە ءتورت جىل تۇراقتى تۇرۋعا مىندەتتى ەدى» ، - دەپ ءتۇسىندىردى ءماجىلىس دەپۋتاتى گۇلنار سەيتماعانبەتوۆا.
اۆتور: قانات مامەتقازى ۇلى
