ەلىمىزدە ءۇش دەڭگەيلى سالىقتىق رەجيمدى ەنگىزۋ جوسپارلاندى - ە. دوسايەۆ
بۇگىن پارلامەنت سەناتىندا سالىق سالۋ ماسەلەلەرىنە ارنالعان دوڭگەلەك ۇستەل بارىسىندا بايانداما جاساعان ۇلتتىق ەكونوميكا ءمينيسترى ەربولات دوسايەۆ وسىلاي مالىمدەدى.
ءمينيستردىڭ سوزىنە قاراعاندا، بەس ينستيتۋتسيونالدىق رەفورما اياسىنداعى «100 ناقتى قادام» ۇلت جوسپارىنىڭ 44 جانە 45-قادامدارىن جۇزەگە اسىرۋ ماقساتىندا كەلەسى جىلى سالىق زاڭناماسىنا وزگەرىستەر مەن تولىقتىرۋلار ەنگىزىلەتىن بولادى. بۇل رەتتە زاڭ جوباسى نەگىزىنەن جاناما سالىقتاردى اكىمشىلەندىرۋ جانە كولەڭكەلى ەكونوميكانى تومەندەتۋ شارالارىن قامتىماق.
«ماسەلەن، 44-قادامدى جۇزەگە اسىرۋ اياسىندا جاناما سالىق سالۋ تەتىكتەرىن وزگەرتەتىن نورما قاراستىرىلادى، سونىڭ ىشىندە قوسىلعان قۇن سالىعىن ساتۋ سالىعىنا اۋىستىرۋ تەتىكتەرى قارالادى. بۇدان بولەك، تاۋەكەلدەردى باسقارۋ جۇيەسىنىڭ ەنگىزىلۋىنە بايلانىستى، مەملەكەتتىك كىرىس ورگاندارىنىڭ جاڭادان ەنگىزىپ جاتقان ەلەكتروندىق تۇبىرتەكتەر بەرۋىن ۋاقىتشا توقتاتۋ مۇمكىندىگى قاراستىرىلۋى ىقتيمال. بۇدان بولەك، مەملەكەتتىك كىرىس ورگاندارىنا مالىمەتتەردى ونلاين رەجيممەن بەرەتىن تەرمينالدار مەن كاسسالىق اپپاراتتاردى ەنگىزۋ كوزدەلەدى. قولما- قول اقشا اينالىمىن تومەندەۋ ماقساتىندا كارتوچكامەن ەسەپ ايىرىسۋلارعا كوميسسيا تومەندەتىلىپ، تولەم تەرمينالدارىنا جەڭىلدىكتى ليزينگتەر قارالۋى ىقتيمال»، - دەدى ە. دوسايەۆ.
ونىڭ ايتۋىنا قاراعاندا، قوسىلعان قۇن سالىعى بويىنشا قولدانىستاعى جەڭىلدىكتەر ايتارلىقتاي قىسقارادى. ال ساتۋعا سالىناتىن سالىقتاردى ەنگىزۋ مۇمكىندىگىنە قاتىستى ماسەلەلەردى قاراستىرۋ ءۇشىن 2015 -جىلدىڭ 1 -قاراشاسىنان ارنايى جۇمىس توبى قۇرىلاتىن بولادى.
«ۇلت جوسپارىنىڭ 45 -قادامى اياسىندا زاڭ جوباسىمەن شىعىستار مەن كىرىستەردىڭ مىندەتتى سالىقتىق ەسەپتىلىگىن قامتي وتىرىپ، قولدانىستاعى سالىق رەجيمىن وڭتايلاندىرۋ كوزدەلەدى. ال بۋحگالتەرلىك ەسەپ جۇرگىزۋ مەن ەسەپتىلىكتى تاپسىرۋ بويىنشا قىزمەتتەر كورسەتۋدى ۇلتتىق كاسىپكەرلەر پالاتاسى مەن كاسىپكەرلەردى قولداۋ ورتالىعىنىڭ بازاسىندا جۇزەگە اسىرۋ ۇسىنىلادى.
بۇدان بولەك، ءۇش دەڭگەيلى سالىقتىق رەجيمدى 2017 -جىلدىڭ قاڭتارىنان ەنگىزۋ جوسپارلانىپ وتىر. بۇنىڭ ءبىرىنشىسى جەكە كاسىپكەرلەر ءۇشىن پاتەنت، ەكىنشىسى كىرىستەر مەن شىعىستاردىڭ سالىقتىق ەسەپتىلىگىن جۇرگىزەتىن شاعىن جانە ورتا بيزنەس ءۇشىن ارنايى سالىق رەجيمى. ءۇشىنشى نارىقتىڭ بارلىق سۋبەكتىلەرىنە ارنالعان جالپى رەجيم»، - دەدى ە. دوسايەۆ.
اۆتور: قانات مامەتقازى ۇلى
