حالىقارالىق «ماڭگىلىك ەل» اقىندار ايتىسىنىڭ باس جۇلدەسى قوس اقىنعا بۇيىردى
ايتۋلى جىر دوداسىندا قازاقستان، قىتاي جانە موڭعوليا ەلدەرىنەن 26 ۇزدىك سۋىرىپ سالما اقىن ءسوز سايىستىردى.
«ماڭگىلىك ەل» حالىقارالىق اقىندار ايتىسى ەكى كەزەڭنەن تۇردى - ىرىكتەۋ كەزەڭى مەن فينال. ونى مۇقاعالي ماقاتايەۆ اتىنداعى سىيلىقتىڭ يەگەرى، ايتىس اقىندارى مەن جىرشى- تەرمەشىلەردىڭ حالىقارالىق وداعىنىڭ ءتوراعاسى، اقىن ءجۇرسىن ەرمان جۇرگىزدى.
ايتىسقا يرانعايىپ كۇزەمبايەۆ، اينۇر تۇرسىنبايەۆا، رينات زايىتوۆ، ايبەك قاليەۆ، بەكارىس شويبەكوۆ، التىنكۇل قاسىمبەكوۆا، اسپانبەك شۇعاتايەۆ، مەيىربەك سۇلتانحان سىندى بەلگىلى قازاقستاندىق اقىندار قاتىستى. ولارمەن بىرگە جامبىلدىق جاس اقىندار - قانات مىرزاحان، دارحان ءابدىمانات پەن نۇرلىبەك قۇرمانوۆتار باق سىنادى.
ايتىس قورىتىندىسى بويىنشا، باس جۇلدە مەن ءبىرىنشى ورىننىڭ جۇلدەسى بىرىكتىرىلىپ، بولاتبەك مەيىربەك ۇلى مەن اسپانبەك شۇعاتايەۆقا تەڭ ءبولىنىپ بەرىلدى. قوس باس جۇلدەنى جەڭىپ العان اقىندارعا 2,5 ميلليون تەڭگەدەن سىياقى بەرىلدى.
ەكىنشى ورىندى قىزىلوردالىق ازۋلى اقىن يرانعايىپ كۇزەمبايەۆ ەنشىلەدى. قازاقتىڭ «التىن بالاسى» اتانىپ جۇرگەن يرانعايىپقا 2 ميلليون تەڭگەنىڭ سەرتيفيكاتى تابىستالدى.
ءۇشىنشى ورىندى ايبەك قاليەۆ پەن جاس تا بولسا جالىندى اقىن مەيىربەك سۇلتانحان ءوزارا ءبولىستى. ولاردىڭ ءارقايسىسىنا 650 مىڭ تەڭگەدەن سىياقى بەرىلدى.
ايتىس «نۇر وتان» پارتياسىنىڭ قولداۋىمەن «ماڭگىلىك ەل» جالپى ۇلتتىق يدەياسىن ناسيحاتتاۋ اياسىندا ۇيىمداستىرىلدى.
