مەن ءوز ەلىمدى ماقتان ەتەمىن - م. پاك، قازاقستاندىق كورەي - فوتو

ورال. قازاقپارات - مەن ەلىمىزدەگى پاتريوتتاردىڭ باسىن قوسقان «ماڭگىلىك ەل - بولاشاعى ءبىرتۇتاس ەل» فورۋمىنا قاتىسقانىما وتە قۋانىشتىمىن.

كورەي حالقىنىڭ وكىلدەرى ءۇشىن «مەن قازاقستاندىقپىن» دەگەن ءسوز ەرەكشە جاقىن ءارى ىستىق. ويتكەنى كورەيلەر قازاقستانعا جەر اۋدارىلىپ كەلگەندە، ءبىزدى باۋىرىنا باسىپ، قۇشاعىنا العان قازاق حالقى بولاتىن. ءبىز مۇنى ەشقاشان ۇمىتپايمىز. ءدال وسىنى ورال قالاسىندا كورەي دياسپوراسىنىڭ قاراجاتىنا بوي كوتەرگەن «قازاق حالقىنا مىڭ العىس» مونۋمەنتى ايعاقتاپ، بارشا ەلگە پاش ەتىپ تۇر. بۇل تۋرالى استانادا وتكەن ەل پاتريوتتارىنىڭ فورۋمىنا قاتىسىپ قايتقان بقو كورەي ەتنومادەني قوعامدىق بىرلەستىگىنىڭ ءتوراعاسى ماكسيم پاك ءمالىم ەتتى.

 ونىڭ ايتۋىنشا، قازاقستان حالقى اسسامبلەياسى قىزمەتىنە ارالاسقاننان بەرى ەلباسى نۇرسۇلتان نازاربايەۆپەن بىرنەشە رەت كەزدەسىپ، ءسوزىن تىڭداعان. مەملەكەت باسشىسى ق ح ا سەسسيالارىندا ەلدى بىرىگۋگە ۇندەپ، ورتاق ماقساتقا جۇمىلدىرا ءبىلدى. ءبىزدىڭ بۇگىنگى تابىستارىمىز بەن جەڭىستەرىمىزدىڭ ءبارى - ەلباسى جۇرگىزىپ وتىرعان ساياساتتىڭ ارقاسى.

ەل پاتريوتى، قازاقستان حالقى اسسامبلەياسىنىڭ مۇشەسى رەتىندە ورتاق ءۇيىمىز - قازاقستاننىڭ ودان ءارى گۇلدەنىپ، قارقىندى دامۋىنا بارىنشا ۇلەس قوسىپ كەلەمىز. ءبىز ءار ەلدى مەكەندە، مەكتەپتە ەتنومادەني بىرلەستىكتەردىڭ قاتىسۋىمەن جاستاردى وتانشىلدىق رۋحتا تاربيەلەۋگە اتسالىسۋدامىز. اتالمىش فورۋمدا عارىشكەر ايدىن ايىمبەت بيىل جازدا سۋعا باتىپ بارا جاتقان قوس بىردەي قىزدى قۇتقارىپ قالعانى ءۇشىن «جىل پاتريوتى» اتانعان باتىس قازاقستاندىق وقۋشى نيكيتا تيۋكينگە «ەرلىگى ءۇشىن» اتالىمىن تابىس ەتتى. وسى ساتتە ءبىز جاس جەتكىنشەكتەرىمىزدىڭ وسىلايشا، اتا- بابانىڭ ەرلىك داستۇرىنە ساي ءوسىپ كەلە جاتقانىن سەزىنىپ، كوڭىلىمىز اسپانداي ءتۇستى.

«كورەي ەتنومادەني بىرلەستىگى وبلىستا الەۋمەتتىك جوبالاردى جۇزەگە اسىرىپ كەلەدى. مۇنىڭ كوپشىلىگى قايىرىمدىلىق پەن مۇمكىندىگى شەكتەۋلى جاندارعا كومەك كورسەتۋگە ارنالعان. ايتالىق، «20 ىزگى ءىس» اياسىندا «اربا» قوعامدىق بىرلەستىگىمەن بىرلەسىپ اربادا وتىراتىن مۇگەدەكتەرگە تەگىن دارىگەرلىك جاردەم بەرۋدى كوزدەيتىن «كەلەشەككە كوزقاراس» جوباسى جۇزەگە اسىرىلۋدا. قازىرگى كەزدە اتالمىش قوعامدىق بىرلەستىك عيماراتىندا مۇگەدەكتەرگە ارنالعان سىلاۋ كابينەتى جۇمىس جاسايدى.

ارينە، ىزگى ىستەر ق ح ا جىلىمەن شەكتەلمەيدى. ول الداعى ۋاقىتتا دا جالعاسادى. «ماڭگىلىك ەلگە» اينالۋ ءۇشىن «نۇرلى جول» باعدارلاماسىنا سايكەس ورتاق وتانىمىزدىڭ تۋىن كوتەرىپ، ءبىر- بىرىمىزگە دەم بەرىپ، جارقىن بولاشاققا قول سوزۋ - بارشامىزدىڭ پارىزىمىز»، دەپ تۇيىندەدى ويىن م. پاك.