ماقپال ءجۇنىسوۆانى ماسقارالاعان جىگىت ءوز قىلىعى ءۇشىن ۇيالمايتىنىن ايتتى

استانا. قازاقپارات - جاقىندا ماقپال ءجۇنىسوۆا ءوزىنىڭ كەيپىنە ەنىپ، تويلاردا ءان سالىپ جۇرگەن جىگىتتى سىنعا العان بولاتىن.

قازاقستاننىڭ حالىق ءارتىسى جاس جىگىتتىڭ بۇل ارەكەتى ءۇشىن ۇيالعانىن دا ايتقان.

الايدا، ماقپال ءجۇنىسوۆاعا پاروديا جاساپ، تويلاردان ءناپاقاسىن تاۋىپ جۇرگەن ايدوس جاقانوۆ ەسىمدى جىگىت بۇل قىلىعى ءۇشىن استە ۇيالمايدى ەكەن.

بۇل تۋرالى زامانا باسىلىمى حابارلايدى.

 جۋىردا ماقپال ءجۇنىسوۆا Instagram-داعى پاراقشاسىنا ءتۇر- الپەتىن وزىنە ۇقساتىپ بوياپ العان ءبىر جىگىتتىڭ سۋرەتىن ورنالاستىرىپ: «مىناۋ بارىپ تۇرعان كورگەنسىزدىك! بۇل -  ونەر ەمەس، مەنىڭ ەڭبەگىمدى ۇرلاۋ. اينالايىن جىگىتىم، ماعان بۇلاي جارناما جاساماي-اق قوي. ەگەر مىنا تىرلىگىڭدى قويماساڭ، سەنى سوتقا بەرەمىن!» - دەپ جازدى.

كەيىن بەلگىلى بولعانداي، الگى جىگىت تالدىقورعان قالاسىندا ءوتىپ جاتقان تويلاردا ماقپال ءجۇنىسوۆا بولىپ ونەر كورسەتەدى ەكەن. ءتىپتى ماقپال ءجۇنىسوۆانىڭ داۋسى جازىلعان اۋديوجازبالاردى رۇقساتسىز پايدالانادى جانە وتە قوماقتى «گونورار»(اقى) تالاپ ەتەدى دەگەن اڭگىمە شىقتى.

ايدوس جاقانوۆ شىعىس قازاقستان وبلىسىنىڭ زايسان اۋدانىندا دۇنيەگە كەلگەن ەكەن. كەيىننەن اكەسىنىڭ قىزمەت بابىمەن تالدىقورعان قالاسىنا قونىس اۋدارىپتى. ءوزى بەلگىلى ءانشى ەربولات قۇدايبەرگەنوۆتىڭ بولەسى بولىپ شىقتى.

«نەگىزى مەن بالا كەزىمنەن ءان ايتامىن، مۋزىكالىق كوللەدجدە ءبىلىم العانمىن، قازىر جۇرگەنوۆ اتىنداعى ونەر اكادەمياسىندا سىرتتاي وقيمىن. پاروديا جانرىندە ونەر كورسەتىپ كەلە جاتقانىما كوپ بولا قويعان جوق. ازىرگە تەك ماقپال ءجۇنىسوۆاعا، جانار ايجانوۆاعا جانە رەسەيلىك ماشا راسپۋتيناعا عانا پاروديا جاسايمىن. ەشكىمنىڭ اۋديوجازباسىن پايدالانبايمىن. جاسىرمايمىن، ءبىر كۇنى اسىعىپ ءجۇرىپ ديسكىمدى ۇمىتىپ كەتىپپىن، سودان شەگىنەرگە جول جوق بولعان سوڭ انسامبلدەگى جىگىتتەر ماقپال اپايدىڭ «ەركەم-ايىن» قوسىپ بەرىپ، فونوگرامماسىن پايدالاندىم. قىرسىق شالعاندا، ءدال سونى الدەكىمدەر تەلەفونىنا جازىپ الىپ، ماقپال ءجۇنىسوۆاعا جىبەرىپتى. سودان بەرى حالىق ءارتىسى ماعان رەنجىپ، ونىسىن تەلەارنالار ارقىلى كورسەتىپ جاتىر. مەن ماقپال ءجۇنىسوۆادان تاعى دا كەشىرىم سۇرايمىن»، -  دەيدى ايدوس جاقانوۆ.

ايدوستىڭ تويدا ونەر كورسەتۋ اقىسى ماقپال ءجۇنىسوۆا ايتقانداي قوماقتى ەمەس ەكەن. ول نەبارى 10-15 مىڭ تەڭگەنىڭ كولەمىندە «گونورار» الاتىنىن ايتادى. سوعان قاراماستان ارنايى اپپاق «S» كلاستى «مەرسەدەس» كولىگىن جالعا الىپ، تويعا سونىمەن باراتىن كورىنەدى. كۇنىنە كەم دەگەندە ءۇش- ءتورت تويعا كىرىپ شىعادى ەكەن.

«اناۋ- مىناۋ ەمەس، حالىق ارتىسىنە پاروديا جاساۋ ۇلكەن جاۋاپكەرشىلىكتى تالاپ ەتەدى. داۋسىنان بولەك ءتۇرىن، «ميميكاسىن»، ءىس- قيمىلىن، ءتىپتى ءبيىن دە اينىتپاي سالۋعا تۋرا كەلەدى. سوندىقتان مەن كوپ دايىندالامىن. ارنايى ءتورت ءتۇرلى كويلەك تىكتىرگەنمىن. ونىڭ ءارقايسىسى 40-50 مىڭ تەڭگەدەن ءتۇستى. ايەلدەرگە ارنالعان قىمبات باعالى «شانەل» ءيىسسۋىن ساتىپ العانمىن. قانشا دەگەنمەن سۋرەتكە ءتۇسۋ ءۇشىن جانىما كوپ ادام جاقىندايدى، «پرياتنو» بولۋى كەرەك قوي. ال كۇندەلىكتى «ماكياجدى» ءوزىم جاسايمىن»، - دەيدى ايدوس.

ايدوس جاقانوۆ ەسترادادا جۇرگەن ەر- ازامات انشىلەرگە پاروديا جاسامايتىنىن ايتتى. ايتۋىنشا، ءانشى اعالاردىڭ داۋسى تويعا جينالعان قاۋىمعا قىزىقسىز ەكەن.

«ءارى جىگىتتىڭ ايەلدىڭ وبرازىنا ەنىپ، سونىڭ داۋسىن اينىتپاي سالۋى ەكىنىڭ ءبىرىنىڭ قولىنان كەلە بەرمەيدى عوي»، - دەيدى ول.

پارودياشى جىگىت مۇنىسى ءۇشىن مۇلدەم ۇيالمايتىنىن، قايتا ءار جەردە اراق- شاراپ ءىشىپ، بوسقا سەندەلىپ جۇرگەن قۇرداستارىنان ءوزىن مىڭ ەسە ارتىق سانايتىنىن جەتكىزدى.

«بۇل - ونەر. ال ونەردە شەك جوق. قولىنان كەلسە، كەز-كەلگەن ادام انشىلەرگە پاروديا جاساي بەرسىن. مەن مۇنىمەن شەكتەلمەيمىن. رەپەرتۋارىما باسقا دا انشىلەردىڭ اندەرىن كىرگىزەمىن دەپ ءجۇرمىن»، - دەيدى ايدوس.

دەرەككوز: Zamana.kz