قازاقستاندا قانشا نەمىس تۇرادى
بۇل تۋرالى بۇگىن ەلوردادا وتكەن «قازاقستان نەمىستەرى: استانا مەن بەرلين اراسىنداعى كوپىر» تاقىرىبىنداعى حالىقارالىق عىلىمي- تاجىريبەلىك كونفەرەنسيانىڭ نەگىزگى سەسسياسىندا ءماجىلىس دەپۋتاتى ولگا كيكولەنكو ايتتى.
«وزدەرىڭىز دە بىلەتىندەي، بۇل بايلانىستار وتە قاجەت. قازىرگى ۋاقىتتا گەرمانيادا قازاقستاننان قونىس اۋدارىپ بارعان نەمىس وتە كوپ. ەلىمىزدە دە نەمىس ۇلتىنىڭ شامامەن 200 مىڭ وكىلى ءومىر سۇرۋدە. ولاردىڭ اراسىنداعى بايلانىس قازىرگى ۋاقىتتا وتە جاقسى. وسى ورايدا بۇگىنگى كونفەرەنسيانىڭ جالعىز مەملەكەتارالىق كوميسسيا ەكەندىگىن اتاپ وتكىم كەلەدى»، - دەدى ول.
ونىڭ اتاپ وتۋىنشە، مۇنداي كوميسسيالار ءوزارا تىعىز جۇمىس ىستەپ، ءبىر ۇلتتىڭ ەكى مەملەكەتتە تۇرىپ جاتقان ادامدارى اراسىندا دانەكەر كوپىرگە اينالۋى ءتيىس. «ول جاققا كوشىپ بارعانداردىڭ دا پروبلەمالارى بار. سول سياقتى وسى جاقتا تۇرىپ جاتقان نەمىستەردە دە پروبلەما كەزدەسىپ جاتادى. سوندىقتان ولار سول پروبلەمالاردى شەشۋدە ءبىر-بىرىنە جاردەم بەرىپ وتىرۋى قاجەت»، - دەدى ءماجىلىس دەپۋتاتى.
ايتا كەتەرلىگى، ەلىمىزدە قازاقستان حالقى اسسامبلەياسى جىلى اياسىندا «قازاقستان نەمىستەرى: استانا مەن بەرلين اراسىنداعى كوپىر» تاقىرىبىندا حالىقارالىق عىلىمي- تاجىريبەلىك كونفەرەنسيا ءۇش كۇنگە سوزىلدى. ءبىرىنشى كۇنى حالىقارالىق شارا الماتى قالاسىندا ۇيىمداستىرىلسا، ودان كەيىن ەلوردا تورىندە ءوتتى. جالپى، بۇگىندە گەرمانيادا قازاقستاننان كوشىپ بارعان 800 مىڭعا جۋىق نەمىس تۇرىپ جاتىر.
اۆتور: مارلان جيەمباي
